ངས་རང་གི་སྙིང་ལ་འདི་སྐད་དུ། ད་ཤོག་དང་། ངས་ཁྱོད་འདོད་ཡོན་གྱིས་དཔྱོད་པར་བྱ་སྟེ། སྐྱིད་པར་བྱོས་ཤིག་བྱས་ཀྱང་། འདི་ལ་ཡང་སྙིང་པོ་མེད། ༢ ངས་དགོད་འཛུམ་ལ། སྨྱོན་པའོ་དང་། དགའ་སྤྲོ་ལ། བྱེད་ཅི་བྱེད་སྨྲས་པ་ཡིན། ༣ གནམ་འོག་ཏུ་མིའི་བུས་རང་གི་ཚེ་གང་ཅི་བྱེད་པ་དེའི་ནང་ན་ཕན་ཐོགས་ཅི་ཡོད་པ་མ་རྟོགས་པའི་བར་དུ། ངའི་སྙིང་ལ་ཡེ་ཤེས་ཁོང་དུ་ཆུད་དེ། བློ་རྨོངས་པ་དེ་དབང་དུ་འགུག་པའི་དོན་དུ། རྒུན་ཆང་གིས་ལུས་སྐྱིད་པའི་སྐོར་རང་གི་སྙིང་དུ་རྩད་བཅད་པ་ཡིན། ༤ ངས་ལས་ཆེན་པོ་རྣམས་བྱས་ཏེ། རང་གི་ཕྱིར་ཕོ་བྲང་རྣམས་བཞེངས། རྒུན་ཚལ་རྣམས་བཙུགས། ༥ ངས་རང་གི་དོན་ལ་ཚལ་དང་སྐྱེད་མོས་ཚལ་རྣམས་བཟོས་ཏེ། དེ་དག་གི་ནང་དུ་རྩི་ཤིང་གི་རིགས་མཐའ་དག་བཙུགས། ༦ ངས་ནགས་ཚལ་གྱི་ལག་ར་རྣམས་ལ་ཆུ་གཏོང་བའི་ཆེད་དུ་རྫིང་བུ་རྣམས་ཀྱང་བཟོས། ༧ ངས་བྲན་པོ་དང་བྲན་མོ་རྣམས་ཉོས་ནས། རང་གི་ཁྱིམ་དུ་བཙས་པའི་བྲན་པོ་རྣམས་ཀྱང་ཡོད་དེ། བདག་ལས་གོང་དུ་ཡེ་རུ་ཤ་ལེམ་ན་བྱུང་བ་ཀུན་ལས་ཀྱང་བདག་ལ་ཕྱུགས་དང་། ར་ལུག་གི་ཁྱུ་ལྷག་པར་དུ་ཆེ་བ་ཡོད་པ་ཡིན། ༨ ངས་གསེར་དངུལ་དང་། རྒྱལ་པོ་དང་སྡེ་རྣམས་ཀྱི་གཏེར་མཛོད་རྣམས་ཀྱང་། རང་གི་ཕྱིར་བསགས་པ་ཡིན། གླུ་མཁན་ཕོ་མོ་རྣམས་དང་། མིའི་བུའི་ཡིད་དུ་འོང་བའི་བཙུན་མོ་དང་བྱན་ཆུང་རྣམས་ཀྱང་རང་གི་ཕྱིར་བསྡུས་པ་ཡིན། ༩ དེ་ལྟར་ཁོ་བོ་ཆེན་པོ་དང་། བདག་ལས་གོང་དུ་ཡེ་རུ་ཤ་ལེམ་ལ་བྱུང་བ་ཀུན་ལས་ཀྱང་ལྷག་པར་དུ་དར་ཏེ། ངའི་ནང་དུ་རང་གི་ཡེ་ཤེས་ཀྱང་མལ་དུ་ལུས་སོ། ༡༠ ཡང་ངས་རང་གི་མིག་ལ་རན་ཚད་གང་ཡང་མ་བཞག་སྟེ། སྐྱིད་པོ་གང་ལས་ཀྱང་རང་གི་སྙིང་བཀག་པ་མ་ཡིན། དེ་ཅིའི་ཕྱིར་ཞེ་ན། ངའི་སྙིང་རང་གི་ལས་ཐམས་ཅད་ལ་དགའ་མགུ་ཞིང་། འདི་ནི་ངས་དཀའ་ལས་བྱས་པ་ཐམས་ཅད་ཀྱི་ཟ་སྐལ་ཡོད་པ་ཡིན། ༡༡ དེ་ནས་ངས་རང་གི་ལག་པས་བྱས་པའི་ལས་ཐམས་ཅད་དང་། ངས་དཀའ་ལས་བྱས་པའི་ལས་རྣམས་ལ་བལྟས་པ་དང་། ཀྱེ་ཧོ། དེ་ཐམས་ཅད་སྙིང་པོ་མེད་པ་དང་། རླུང་ལ་འདེད་པའོ། ཉི་མའི་འོག་ཁེ་སྤོགས་ཅིའང་མེད།