དེ་ནས་ཡོབ་ཀྱིས་བདག་གི་གླེང་མོར་གསན། བདག་གི་གཏམ་གླེང་ཐམས་ཅད་གསན་པར་མཛོད། ༢ གཟིགས་ཤིག་ད་ནི་བདག་གི་ཁ་ཕྱེས་ཏེ། ངའི་ཁ་ནང་ན་ལྕེ་ཡིས་གཏམ་རོལ་ཞིང་། ༣ སྙིང་གཟུ་བོའི་ངང་ནས་ངའི་ཚིག་འཐོན་ཞིང་། མཆུས་གང་བཤེས་པ་གསོང་པོར་བརྗོད་པར་བྱ། ༤ དཀོན་མཆོག་གི་ཐུགས་ཉིད་ཀྱིས་བདག་བཀོད་དེ། ཀུན་དབང་ཞལ་དབུགས་ཀྱིས་བདག་ལ་སྲོག་གནང་། ༥ ཇི་སྟེ་བདག་ལ་ལན་འདེབས་པར་ནུས་ན། ངའི་མདུན་གཏམ་རྣམས་རིམ་པར་འཇོལ་ལ་ཞེངས། ༦ གཟིགས་ཁྱེད་འདོད་བཞིན་དཀོན་མཆོག་ཚབ་ང་ཡོད། བདག་ཀྱང་ཐལ་བའི་ནང་ནས་བཀོད་པ་ལགས། ༧ གཟིགས་ངའི་རབ་ངད་ཀྱིས་ཁྱེད་འཚབས་མི་བྱ། ཁྱེད་ཐོག་ངའི་ལག་ཀྱང་ལྕི་བར་མི་འགྱུར། ༨ བདག་གི་ཐོས་སར་ཁྱེད་ཀྱིས་སྨྲས་ངེས་ཏེ། སྨྲས་པའི་སྒྲ་ཡང་བདག་གིས་འདི་སྐད་ཐོས། ༩ ང་ནི་སྐྱོན་མེད་གཙང་ཞིང་ནོངས་མེད་དང་། ངའི་ནང་མི་དགེ་བ་ཡང་མེད་དོ་དང་། ༡༠ ལྟོས་ཁོང་ངའི་དགྲར་བཞེངས་པའི་སྐབས་རྙེད་ཅིང་། ཁོང་གི་ཕ་རོལ་པར་བདག་རྩི་བར་མཛད། ༡༡ ང་ཡི་རྐང་པ་ཁོང་གིས་གདོས་ནང་འཇུག ངའི་ལམ་ཀུན་ནང་རྟགས་རྒྱབ་མཛད་དོ་ཟེར། ༡༢ ཀྱེ་ཧོ་བྱ་བ་འདི་ནང་ཁྱེད་མི་དྲང་། མི་ལས་དཀོན་མཆོག་ཆེ་ཞེས་ངས་ལན་འདེབས། ༡༣ ཅིའི་ཕྱིར་ཁྱེད་ཀྱིས་ཁོང་ལ་རྒོལ་བར་བྱེད། ཁོང་གིས་དངོས་པོའི་རྩིས་སྤྲོད་མི་གནང་ངོ་། ༡༤ རྒྱུ་ནི་དཀོན་མཆོག་གིས་ཚེར་གཅིག་གསུང་སྟེང་། མིས་མ་ཉན་ན་ལྡབ་ནས་ཀྱང་གསུང་མཛད།