༡༠ ཞག་བདུན་པ་ལ་སྐྱེམས་ཀྱིས་རྒྱལ་པོའི་ཐུགས་སྐྱིད་པོ་ཚོར་བའི་ཚེ། རྒྱལ་པོ་ཨ་ཧས་ཝེ་རོས་ཀྱི་དྲུང་དུ་ཞབས་ཕྱི་བྱེད་པའི་མེ་ཧུ་མན་དང་། བིས་ཐཱ་དང་། ཧར་བོ་ནཱ་དང་། བིག་ཐཱ་དང་། ཨ་བག་ཐཱ་དང་། ཟེ་ཐཱར་དང་། ཀར་ཀས་བྱ་བའི་ཉུག་རུམ་བདུན་པོ་ལ་འདི་སྐད་ཅེས་བཀའ་སྩལ་པ། ༡༡ རྒྱལ་མོ་ཝས་ཏིའི་བྱད་མཛེས་པ་ཡུལ་མི་དང་སྐུ་དྲག་རྣམས་ལ་སྟོན་དུ། རྒྱལ་མོའི་ཅོད་པན་གསོལ་ནས་འདིར་འཁྲིད་ཤོག་ཅེས་བསྒོའོ། གང་ལ་ཞེ་ན། མོའི་བྱད་གཟུགས་ནི་རབ་ཏུ་མཚར་པོ་ཞིག་ཡོད་པ་ཡིན་ནོ། ༡༢ དེ་ནས་ཉུག་རུམ་རྣམས་ཀྱིས་རྒྱལ་པོའི་བཀའ་དེ་སྦྲན་ཀྱང་། རྒྱལ་མོ་ཝས་ཏིས་མི་འགྲོ་བྱས་པས། རྒྱལ་པོ་ཤིན་ཏུ་ཁྲོས་ནས། ཁོག་ནང་ན་ཁོང་ཁྲོའི་མེ་འབར་བར་གྱུར་ཏོ༎

༡༣ རྒྱལ་པོའི་ལས་ཐམས་ཅད་བཀའ་ཁྲིམས་དང་ཡུལ་ཁྲིམས་བཤེས་པ་རྣམས་དང་བསྟུན་ཏེ་བྱས་པས། རྒྱལ་པོས་དུས་ཚོད་ཤེས་པའི་མི་མཁས་པ་རྣམས་དང་བགྲོས་སོ། ༡༤ ཡང་རྒྱལ་པོའི་སྐུ་མདུན་པ་རྣམས་ནི། ཀར་ཤེ་ནཱ་དང་། ཤེ་ཐར་དང་། ཨད་མ་ཐཱ་དང་། ཐར་ཤིས་དང་། མེ་རེས་དང་། མར་སེ་ནཱ་དང་། མེ་མུ་ཀན་་ཏ་ཟིག་དང་མ་དཱ་ཨི་ཡུལ་གྱི་རྒྱལ་ཕྲན་བདུན་པོ་དེ་ཡིན་ཏེ། རྒྱལ་པོའི་ཞལ་མཇལ་མཁན་དང་། རྒྱལ་ཁམས་ཀྱི་ནང་ན་གྲལ་འགོ་འཛིན་མཁན་ཡོད་པ་ཡིན། ༡༥ རྒྱལ་པོས་དེ་རྣམས་ལ། བཀའ་ཁྲིམས་བཞིན་དུ་རྒྱལ་མོ་ཝས་ཏི་ལ་ཇི་ལྟར་བྱེད་པའི་རིགས། དེ་ཅིའི་ཕྱིར་ཞེ་ན། མོས་ནི་ཉུག་རུམ་དག་གིས་སྦྲན་པའི་རྒྱལ་པོ་ཨ་ཧས་ཝེ་རོས་ཀྱི་བཀའ་ལ་མ་ཉན་ཏོ། ༡༦ ཞེས་པའི་ལན་དུ་མེ་མུ་ཀན་གྱིས་རྒྱལ་བློན་རྣམས་ཀྱི་དྲུང་དུ། རྒྱལ་མོ་ཝས་ཏིས་ནི་རྒྱལ་པོ་གཅིག་པུ་ལ་མ་ཟད་པར། རྒྱལ་པོ་ཨ་ཧས་ཝེ་རོས་ཀྱི་སྡེ་ཁག་ཀུན་ན་སྡོད་པའི་རྒྱལ་ཕྲན་ཀུན་དང་། ཡུལ་མི་ཐམས་ཅད་ལའང་གནོད་པ་སྐྱེལ་བ་ཡིན། ༡༧ དེ་ཅིའི་ཕྱིར་ཞེ་ན། རྒྱལ་པོ་ཨ་ཧས་ཝེ་རོས་ཀྱིས། རྒྱལ་མོ་ཝས་ཏི་དྲུང་དུ་འཁྲིད་ཤོག་བྱས་ཀྱང་། མོ་དེར་མ་ཕྱིན་པས། རྒྱལ་མོའི་སྐད་ཆ་འདི་ནི་བུད་མེད་ཐམས་ཅད་ཀྱི་ནང་དུ་དར་ཞིང་། ཐོས་པའི་ཚེ་ན། དེ་དག་གིས་རང་རང་གི་བདག་པོ་ལའང་ཁྱད་དུ་གསོད་ཅིང་བརྙས་པར་བྱའོ། ༡༨ རྒྱལ་མོའི་གཏམ་དེ་ཐོས་པའི་ཏ་ཟིག་དང་མ་དཱ་ཨི་ཡུལ་གྱི་བཙུན་མོ་རྣམས་ཀྱིས་དེ་རིང་ཡང་རྒྱལ་པོའི་རྒྱལ་ཕྲན་ཐམས་ཅད་ལ་དེ་ལྟར་ཟེར་བར་འགྱུར་བས། རྔན་ཆེན་དང་འཁྲུག་པ་ཧ་ཅང་མང་པོ་ལྡང་བར་འགྱུར་རོ། ༡༩ རྒྱལ་པོའི་ཐུགས་འགྱེས་ན། ཏ་ཟིག་དང་མ་དཱ་ཨི་པའི་ཁྲིམས་འགྱུར་མེད་བཞིན་རྒྱལ་པོའི་བཀའ་ཤོག་ཅིག་སྤྲིང་བར་མཛོད་ཅིག དེའི་ནང་དུ། རྒྱལ་མོ་ཝས་ཏི་ད་ཕྱིན་ཆད་རྒྱལ་པོ་ཨ་ཧས་ཝེ་རོས་ཀྱི་དྲུང་དུ་སླེབ་མི་ཆོག ཡང་མོ་དེ་ལས་ལྷག་པར་བཟང་མོ་ཞིག་ལ་རྒྱལ་པོས་རྒྱལ་མོའི་གོ་ས་གནང་བར་བྱའོ། ཞེས་འབྲིར་ཆུག་མཛོད། ༢༠ ཞེས་པའི་བཀའ་མཆིད་ནི་རྒྱལ་ཁམས་རྒྱ་ཆེན་པོ་ལགས་པ་འདི་ཐམས་ཅད་དུ་རྒྱས་པར་བྱེད་པའི་ཚེ་ན། དྲག་པ་དང་ཞན་པ་གཉིས་ཀྱི་ཆུང་མ་རྣམས་ཀྱིས་རང་རང་གི་བདག་པོ་ལ་བཀུར་སྟི་བྱེད་པར་འགྱུར་རོ། ༢༡ གཏམ་འདི་ལ་རྒྱལ་བློན་རྣམས་དགྱེས་ནས། རྒྱལ་པོས་མེ་མུ་ཀན་གྱི་གཏམ་ཁོ་ན་བཞིན་དུ་བྱས་སོ། ༢༢ དེའི་ཕྱིར་རྒྱལ་པོའི་སྡེ་ཐམས་ཅད་དུ། མི་བརྒྱུད་རེ་རེའི་སྐད་ལུགས་དང་ཡི་གེ་བཞིན་དུ་སྐྱེས་པ་ཀུན་གྱིས་རང་གི་ཁང་པའི་ནང་དུ་གཙོ་བྱེད་པའི་རིགས་སོ། ཞེས་པའི་བཀའ་དེ་མི་རིགས་སོ་སོའི་སྐད་དུ་བཀར་བཏགས་སོ༎