བདེན་པར་གཏེར་ཁ་ནང་དངུལ་ཡོད་ལགས་ཏེ། མིས་ལྷད་འདོན་པའི་གསེར་གྱི་གནས་ཀྱང་ཡོད། ༢ ལྕགས་ནི་ས་ཡི་ནང་ནས་འདོན་པར་བྱེད། བཟངས་ཀྱང་རྡོ་ཡི་ནང་ནས་བཞུ་ཞིང་འདོན། ༣ མིས་ནི་མུན་པ་ཟིན་པའི་མཚམས་ཤིག་བྱེད། སྨག་རུམ་རྡོ་དང་འཆི་བའི་གྲིབ་ཀྱི་རྡོ། ས་མཚམས་ཕུགས་ཀྱི་བར་དུ་འཚོལ་བར་བྱེད། ༤ མི་ཡི་གནས་ལས་རྒྱང་རིང་བུག་པ་རྟོལ། དེ་སྟེང་འགྲུལ་བའི་རྐང་པས་བརྗེད་ནས་མེད། མཐིལ་དུ་དཔྱང་ཐག་འགྲོ་ཞིང་ལིང་སེ་ལིང་། ༥ ས་གཞི་ལས་ནི་ཁ་ཟས་འབྱུང་བར་བྱེད། དེའི་འོག་མེས་ཟློག་ཚུལ་རྩ་རྩེ་ཟློག ༦ དེའི་རྡོ་རྣམས་ཨིནྡྲ་ནཱི་ལའི་ཚང་ལགས། དེའི་ནང་ན་གསེར་གྱི་ཕྱེ་མའང་ཡོད། ༧ དེའི་ལམ་བྱ་རྒོད་གང་གིས་ཀྱང་མི་ཤེས། བྱ་ཁྲའི་མིག་གིས་ཀྱང་དེ་མཐོང་མ་མྱོང་། ༨ རློམ་སེམས་ཅན་གྱི་གཅན་གཟན་དེར་མ་བསླེབ། དེ་ནས་སེང་གེ་དྲག་པོའང་མ་འགྲུལ་ཏོ། ༩ སྲ་བའི་བྲག་སྟེང་དེ་ཡི་ལག་པ་འཇོག རི་རྣམས་རྩ་བ་ནས་རྩ་རྩེ་ཟློག་གོ། ༡༠ བྲག་རྣམས་གཅོད་ཅིང་རྒྱུ་ལམ་འདོན་པར་བྱེད། མིག་གིས་རིན་སྣ་ཚོགས་མཐོང་བར་བྱེད། ༡༡ མི་ཐིག་དོན་དུ་གཙང་པོ་རྣམས་ཀྱང་སྡོམ། སྦས་པའི་དངོས་པོ་རྣམས་འོད་ནང་འདོན་ནོ༎