༧ གང་ལ་ཞེ་ན་སྐྱེ་ཤིང་གཅོད་པ་ནི། ཕྱིས་སུ་ཤིང་གསར་འཁྲུངས་བའི་རེ་བ་ཡོད། དེ་ཡི་ལྕུག་གསར་གྱི་བར་འཆད་མི་འགྱུར། ༨ ས་ནང་རྩ་བ་རྙིང་པར་གྱུར་ན་ཡང་། དེ་ཡི་སྡོང་པོ་ས་ནང་ཤི་ན་ཡང་། ༩ ཆུ་ཡི་གཤེར་གྱིས་ལྕུག་གསར་སྐྱེ་འགྱུར་ཞིང་། ཚུགས་ལྕང་ལྟ་བུ་ཡལ་ག་འཐོན་འགྱུར་གྱིས། ༡༠ མི་ནི་འཆི་ཞིང་ཐལ་བར་གྱུར་བ་དང་། མི་ཡི་རྣམ་ཤེས་འཐོན་དུས་ཁོ་གར་ཡོད། ༡༡ མཚོ་ཡི་ཆུ་རྣམས་འབྲི་བར་འགྱུར་བ་དང་། གཙང་པོ་སྐམ་ཞིང་ཟད་པ་དང་མཚུངས་པར། ༡༢ མི་ནི་སར་ཉལ་བ་དང་མི་ལྡང་ངོ་། ནམ་མཁའ་རྣམས་མེད་པར་འགྱུར་བའི་བར་དུ། མི་རྣམས་རང་གི་གཉིད་ལས་ལྡང་མི་འགྱུར།

༡༣ བདག་ལ་དུས་བབས་དགོངས་ནས་ཐུགས་དྲན་ཕྱིར། ཐུགས་ཁྲོ་ཞི་རིང་བདག་སྦ་བར་མཛད་ཅིང་། བདག་གཤིན་ཡུལ་ནང་སྦ་ན་ཅི་མ་རུང་། ༡༤ ཤི་ཟིན་པའི་མི་ཡང་གསོན་པོར་འགྱུར་རམ། བདག་གི་སྐྱབས་མ་འབྱུང་བའི་བར་དུ་བདག རེ་ཞིང་ཚེའི་དུས་ཀུན་ནང་སྒུག་གིན་སྡོད། ༡༥ ཁྱེད་ཀྱིས་འབོད་ན་ངས་ཞུ་ལན་དབུལ་ལོ། ཁྱེད་ཀྱི་ཕྱག་གི་ཕྲིན་ལས་ལ་མཉེས་པར་འགྱུར། ༡༦ ད་ཁྱེད་ཀྱིས་ངའི་གོམ་པ་རྩི་བས་ན། བདག་གི་སྡིག་པ་ཁྱེད་ཀྱིས་མི་གཟིགས་སམ། ༡༧ བདག་གི་འགལ་སྐྱོན་ཕད་ནང་ཐེ་སྦྱར་གདའ། བདག་གི་མི་དགེ་བ་རྣམས་བསྡམས་ནས་འཇོག

༡༨ འོན་ཀྱང་རི་བོ་ལོག་ནས་མེད་པར་འགྱུར། བྲག་རི་རང་གི་གནས་ལས་འཕོ་བར་ངེས། ༡༩ ཆུས་རྡོ་རྣམས་ཟད་འཇུག་ཅིང་ཆུ་ལོག་གིས། སའི་ཐལ་བར་སྐྱེས་པ་ཀུན་འཁྱེར་བ་ལྟར། ཁྱེད་ཀྱིས་མི་ཡི་རེ་བ་ཚར་དུ་གཅོད། ༢༠ ཁྱེད་ཀྱིས་རྒྱུན་དུ་ནོན་པས་ཁོ་ནི་རྒུད། དེའི་གདོང་བསྒྱུར་མཛད་ནས་ཕར་དུ་སྤྱུགས་པས། ༢༡ དེའི་བུས་ཞེ་ས་རྙེད་ཀྱང་ཁོས་མི་རྟོགས། དེ་དག་ལྟུང་བར་འགྱུར་ཡང་དེས་མི་མཐོང་། ༢༢ འོན་ཀྱང་ཁོ་ཡི་ཤའི་ནང་དུ་གཟུག་དང་། ཁོག་ནང་སྲོག་གི་མྱ་ངན་བྱེད་པར་འགྱུར༎