དེའི་འོག་ཏུ་ཡོབ་ཀྱིས་ཁ་ཕྱེས་ནས། རང་གི་ཚེ་ལ་དམོད་པ་བོར་ཏེ། ༢ གཏམ་ལན་གཏོང་ཞིང་། འདི་སྐད་སྨྲས་པ། ༣ བདག་ནི་བཙས་པར་གྱུར་པའི་ཉིན་མོ་དང་། བུ་ཕོ་ཞིག་མངལ་དུ་ཆགས་པར་གྱུར་ཏོ། སྨྲས་པའི་མཚན་མོ་བཅས་པ་སྟོངས་པར་ཤོག ༤ ཉིན་མོ་དེ་ཡང་མུན་པ་རུ་གྱུར་ཅིག སྟེང་དཀོན་མཆོག་གིས་དེ་ལ་མ་གཟིགས་ཤིག དེ་ཐོག་འོད་ཀྱང་འཆར་བར་མ་གྱུར་ཅིག ༥ མུན་པ་འཆི་གྲིབ་ཀྱིས་དེ་ཟློག་གྱུར་ཅིག དེ་ཐོག་སྤྲིན་ཞིག་འཁྲིག་པར་འགྱུར་བར་ཤོག ཉིན་མོ་མུན་བྱེད་ཀུན་གྱིས་དེ་འཇིགས་ཤོག ༦ མཚན་དེ་མུན་སྟུག་པོས་ནི་འཆང་བར་ཤོག ལོ་རྩིས་ནང་དེ་སྲེ་བར་མ་གྱུར་ཅིག ཟླ་རྩིས་ནང་དེ་རྩི་བར་མ་གྱུར་ཅིག ༧ ཀྱེ་ཧོ་མཚན་མོ་དེ་གཅིག་པུར་ལུས་ཤོག དེའི་ནང་དགའ་སྤྲོའི་སྐད་མི་འབྱུང་བར་ཤོག ༨ ཉིན་མོར་སྨད་ཅིང་མཁའི་སྲིན་པོ་སློང་བའི། རྩལ་དང་ལྡན་པས་དེ་ལ་སྨོད་བོར་ཤོག ༩ སྲོད་དེའི་སྐར་མ་རྣམས་ཀྱང་སྒྲིབ་པར་ཤོག འོད་ལ་དེས་རེ་ཡང་མི་རྙེད་པར་ཤོག དེས་ཐོ་རངས་ཀྱི་སྤྱན་མི་མཐོང་བར་ཤོག ༡༠ དེས་ངའི་མའི་མངལ་སྒོ་མ་བཅད་པར། ངའི་མིག་ནས་སྡུག་བསྔལ་ཡང་མ་སྦས་སོ༎