ཡང་ཉིན་མོ་ཞིག་དཀོན་མཆོག་གི་སྲས་རྣམས་ཡ་ཧོ་ཝཱའི་ཞལ་ངོར་འཚོགས་སུ་བྱུང་བ་དང་། དེ་དག་གི་ནང་དུ་སཱ་ཏན་ཡང་ཡ་ཧོ་ཝཱའི་ཞལ་ངོར་འོངས་པ་དང་། ༢ ཡ་ཧོ་ཝཱས་སཱ་ཏན་ལ། ཁྱོད་གང་ནས་འོངས་ཞེས་གསུངས་པ་དང་། སཱ་ཏན་གྱིས་ཞུ་ལན་དུ། ས་གཞིའི་ནང་དུ་ཕན་ཚུན་རྒྱུ་ཞིང་། ཡར་མར་འཁོར་ནས་འོངས་པ་ཡིན་ཞེས་ཞུས་པས། ༣ ཡ་ཧོ་ཝཱས་སཱ་ཏན་ལ། ཁྱོད་ཀྱིས་ངའི་ཕྱག་བརྙན་ཡོབ་ལ་ཞིབ་ཏུ་བལྟས་སམ། གང་ལ་ཞེ་ན། ས་སྟེང་དུ་དེ་ལྟ་བུའི་མི་ཕུན་སུམ་ཚོགས་པ། སེམས་རྒྱུད་དྲང་པོ། དཀོན་མཆོག་ལ་བག་བྱེད་པ་དང་། ཉེས་པ་ལས་འབྱོལ་བ་གཞན་སུ་ཡང་མེད་དེ། རྒྱུ་མཚན་མེད་པར་དེ་འཇོམས་པར་བྱེད་དུ་ཁྱོད་ཀྱིས་ང་ལ་ཀུན་སློང་བྱས་པའི་སྟེང་དུའང་། ད་དུང་དེས་རང་གི་བློ་གཟུ་བོ་དེ་དམ་དུ་བཟུང་ངོ་ཞེས་གསུངས་པས། ༤ སཱ་ཏན་གྱིས་ཡ་ཧོ་ཝཱ་ལ་ཞུ་ལན་དུ། པགས་པའི་ཚབ་ཏུ་པགས་པ། མིས་རང་གི་སྲོག་གི་དོན་དུ་ནོར་ཐམས་ཅད་སྦྱིན་པར་འགྱུར་གྱིས། ༥ ད་ལྟ་ཁྱེད་ཀྱི་ཕྱག་བརྐྱངས་ཏེ། དེའི་རུས་པ་དང་ཤ་ལ་རེག་པར་མཛོད་དང་། དེས་ཁྱེད་ཀྱི་ཞལ་ངོར་རྒོལ་བ་མི་ཞུའམ་ཞེས་གསོལ་པ་དང་། ༦ ཡ་ཧོ་ཝཱས་སཱ་ཏན་ལ། ལྟོས། ཁོ་ཁྱོད་ཀྱི་ལག་ཏུ་ཡོད། འོན་ཀྱང་དེའི་སྲོག་འབའ་ཞིག་ལུས་པར་ཆུག་ཅིག་ཅེས་བསྒོའོ༎