དེ་ལྟར་རྒྱལ་པོ་དང་ཧ་མན་གཉིས་པོ་རྒྱལ་མོ་ཨེས་ཐེར་གྱི་སྐྱེམས་མགྲོན་ལ་ཕེབས་སོ། ༢ དེ་ནས་ཞག་གཉིས་པར་རྒུན་སྐྱེམས་ཀྱི་མགྲོན་དུ་རྒྱལ་པོས་ཡང་སྐྱར་ཨེས་ཐེར་ལ་རྒྱལ་མོ་ཨེས་ཐེར་ལགས་ཞུ་བ་ཅི་ཡོད། ཁྱོད་ལ་གནང་བར་བྱའོ། ཅི་འདོད། རྒྱལ་ཁམས་ཕྱེད་ཀྱི་བར་དུའང་ཁྱེད་ལ་གཏོང་བར་བྱ། ཞེས་གསུངས་ནས། ༣ རྒྱལ་མོ་ཨེས་ཐེར་གྱིས་ལན་དུ། རྒྱལ་པོ་ལགས། བདག་ལ་ཁྱེད་ཀྱི་སྤྱན་སྔར་གཟིགས་པ་བརྙེད་དེ། རྒྱལ་པོའི་ཐུགས་སུ་འབྱོན་ན། བདག་གི་སྲོག་སྐྱོབ་པ་ནི་ངའི་ཞུ་བ་དེ་ཡིན། བདག་གི་མི་བརྒྱུད་ཀྱི་ཚེ་ཐར་དུ་འཇུག་པ་ནི། ངའི་སྙན་ཞུ་དེ་ཡིན། ༤ དེ་ཅི་ལ་ཞེ་ན། བདག་དང་བདག་གི་མི་བརྒྱུད་ནི་ཚར་དུ་གཅོད་པ་དང་། འགུམ་པ་དང་། མེད་པར་བྱེད་པའི་ཕྱིར་བཙོང་ཚར་འདུག འོན་ཀྱང་གལ་ཏེ་བདག་ཅག་ནི་ཚེ་གཡོག་ཚེ་གཡོག་མོར་བཙོང་བ་ཡིན་རུང་། དགྲ་བོས་དེ་ལྟར་བྱེད་དེ་རྒྱལ་པོའི་གྱོང་དེ་གསོ་བར་མི་ནུས་ནའང་། བདག་ཁ་རོག་བསྡད་པ་ཡིན། ཞེས་ཞུས་པས། ༥ རྒྱལ་པོ་ཨ་ཧས་ཝེ་རོས་ཀྱིས་རྒྱལ་མོ་ཨེས་ཐེར་ལ། འདི་ལྟར་བྱེད་པའི་ཧམ་པའི་སྙིང་ཡོད་པ་དེ་ནི་སུ་ཡིན། ག་ན་ཡོད་དྲིས་པ་དང་། ༦ ཨེས་ཐེར་གྱིས། དགྲ་དང་ཕ་རོལ་པ་དེ་ནི་མི་ངན་ཧ་མན་འདི་ཀ་ཡིན་ཞུས་པས།