དེ་ནས་ཞག་གསུམ་པ་ལ། ཨེས་ཐེར་གྱིས་རྒྱལ་མོའི་ན་བཟའ་གསོལ་ནས། རྒྱལ་ཚབ་ཀྱི་ཚོམས་སྐོར་ནང་མར་རྒྱལ་པོའི་ཁང་བཟང་གི་ཐད་ཀར་བཞེངས་ནས་བཞུགས་པ་དང་། རྒྱལ་པོ་ནི་སྒོའི་ཐད་ཀར་རྒྱལ་པོའི་ཁང་བཟང་ནང་རྒྱལ་ཁྲིའི་ཁར་བཞུགས་ཡོད་པ་ལས། ༢ རྒྱལ་པོས་རྒྱལ་མོ་ཨེས་ཐེར་ཚོམས་ནང་ལངས་སྡོད་པ་གཟིགས་ཏེ། མོ་ལ་ཁོང་གི་དྲུང་དུ་ཐུགས་རྗེ་བརྙེད་དེ། རྒྱལ་པོས་ཕྱག་ཏུ་བསྣམས་པའི་གསེར་གྱི་ཕྱག་བེར་དེ་ཨེས་ཐེར་གྱི་ཕྱོགས་བཏེགས་པས། ཨེས་ཐེར་ཉེ་བར་སོང་སྟེ། ཕྱག་བེར་གྱི་མགོ་ལ་རེག་པར་བྱས་སོ། ༣ དེ་ནས་རྒྱལ་པོས། རྒྱལ་མོ་ཨེས་ཐེར། ཅི་འདོད། ཞུ་བ་ཅི་ཡོད། རྒྱལ་སྲིད་ཀྱི་ཕྱེད་ཀ་བར་དུ་ཡང་ཁྱོད་ལ་སྦྱིན་པར་བྱའོ་གསུངས་པ་དང་། ༤ ཨེས་ཐེར་གྱིས། རྒྱལ་པོ་ཐུགས་དགྱེས་ན། རྒྱལ་པོ་སྐུ་ཉིད་ཧ་མན་དང་བཅས་དེ་རིང་བདག་གིས་བཤམས་པའི་མགྲོན་དུ་ཕེབས་རོགས་གནང་ཞེས་ཞུས་པས། ༥ ཨེས་ཐེར་གྱིས་སྨྲས་པ་ལྟར་ཧ་མན་ལ་མགྱོགས་པོ་བྱེད་དུ་ཆུག་ཅིག ཅེས་རྒྱལ་པོས་བསྒོ་བ་དང་། ཨེས་ཐེར་གྱིས་བཤམས་པའི་མགྲོན་ལ་རྒྱལ་པོ་དང་ཧ་མན་གཉིས་པོ་ཕེབས་སོ། ༦ ཡང་སྐྱེམས་མགྲོན་གྱི་སྐབས་སུ་རྒྱལ་པོས་ཨེས་ཐེར་ལ། ཞུ་བ་ཅི་ཡོད། ངས་གནང་བར་བྱ། ཅི་འདོད། རྒྱལ་ཁམས་ཕྱེད་ཀྱི་བར་དུ་ཡང་ཁྱོད་ལ་སྟེར་བར་བྱའོ་སྨྲས་པའི་ལན་དུ། ༧ ཨེས་ཐེར་གྱིས། བདག་གི་ཞུ་བ་དང་འདོད་པ་ནི། ༨ གལ་ཏེ་བདག་ལ་རྒྱལ་པོའི་སྤྱན་སྔར་གཟིགས་པ་བརྙེད་དེ། བདག་གི་ཞུ་བ་ལ་གསན་ཏེ། དོན་སྒྲུབ་པར་མཛད་དུ། རྒྱལ་པོ་ཐུགས་མཉེས་ན། རྒྱལ་པོ་ཁྱེད་ཧ་མན་དང་བཅས་ཡང་བདག་གིས་བཤམས་བྱའི་མགྲོན་ལ་ཕེབས་རོགས་མཛོད། སང་ཉིན་བདག་གིས་རྒྱལ་པོས་བསྒོ་བ་བཞིན་དུ་བྱའོ་ཞེས་ཞུས་སོ༎