༢༨ ཡང་མི་བྱིངས་དང་། བླ་མ་དང་། ལེ་ཝི་པ་དང་། སྒོ་སྲུང་པ་དང་། མགུར་ལེན་མཁན་དང་། ནེ་ཐི་ནིམ་པ་དང་། དཀོན་མཆོག་གི་བཀའ་ཁྲིམས་ཀྱི་དོན་དུ་ཡུལ་སོ་སོའི་མི་རྣམས་དང་འབྲེལ་བཅད་པ་ཐམས་ཅད་དང་། དེ་རྣམས་ཀྱི་ཆུང་མ་དང་བུ་བུ་མོའི་ནང་ནས་གོ་བ་དང་རྟོགས་པ་ཡོད་པ་ཐམས་ཅད། ༢༩ རང་གི་སྤུན་ཡ་རབས་རྣམས་དང་འདྲེས་ཏེ་དམོད་པ་བོར་ཅིང་མནའ་བསྐྱལ་ནས། བདག་ཅག་ནི་དཀོན་མཆོག་གི་བྲན་པོ་མོ་ཤེས་གནང་བའི་དཀོན་མཆོག་གི་བཀའ་ཁྲིམས་བཞིན་དུ་འགྲུལ་ཏེ། ཡ་ཧོ་ཝཱ་བདག་རྣམས་ཀྱི་གཙོ་བོའི་བཀའ་དང་ཁྲིམས་དང་སྤྱད་མཚམས་ཐམས་ཅད་སྲུང་ཞིང་། ༣༠ ངེད་ཀྱིས་རང་གི་བུ་མོ་རྣམས་ཡུལ་གྱི་གཞི་མི་རྣམས་ལ་མི་གཏང་། དེ་དག་གི་བུ་མོ་རྣམས་ཀྱང་རང་གི་བུ་རྣམས་ལ་མནའ་མར་མི་ལེན། ༣༡ ཡང་གལ་ཏེ་གཞི་མི་རྣམས་ཀྱིས་ཤབ་བཱད་ཀྱི་ཉིན་པར་ཚོང་ངམ་ཟ་རྒྱུའི་རིགས་ཅི་འཚོང་དུ་འཁྱེར་ཡོང་ན། ངེད་རྣམས་ཀྱིས་ཤབ་བཱད་ཡང་ན་དམ་པའི་ཉིན་མོ་གཞན་ལ་དེ་ཚོ་ལས་ཅིའང་མི་ཉོ། དེ་མ་ཟད་ལོ་བདུན་པར་ཞིང་ཡང་མི་རྨོ། བུ་ལོན་ཚང་མ་ཡང་འབུད་པར་བྱ།

༣༢ ཡང་དཀོན་མཆོག་གི་ཕོ་བྲང་གི་བདག་རྐྱེན་དོན་ལ་ཁྲིམས་བཙུགས་ཏེ། ངེད་རྣམས་ཀྱིས་ལོ་རེ་བཞིན་ཤེ་ཀེལ་གྱི་གསུམ་ཆ་ཞིག་འབུལ་བ་དང་། ༣༣ གཟིགས་པའི་བག་ལེབ་དང་། རྒྱུན་གྱི་ཞལ་ཟས་དང་། ཤབ་བཱད་དང་ཟླ་གསར་ལ་འབུལ་བའི་རྒྱུན་གྱི་སྦྱིན་སྲེག་དང་། དུས་ཆེན་སོ་སོ་དང་། རྫས་དམ་པ་དང་། ཨིས་ར་ཨེལ་གྱི་སྡིག་བཤགས་ཀྱི་མཆོད་པ་དང་། ངེད་ཀྱི་དཀོན་མཆོག་གི་ཕོ་བྲང་གི་ལས་ཐམས་ཅད་ཀྱི་ཕྱིར་ཁུར་བ་ཡིན། ༣༤ ཡང་བཀའ་ཁྲིམས་ན་བྲིས་པ་བཞིན་དུ། ཡ་ཧོ་ཝཱ་ངེད་ཀྱི་དཀོན་མཆོག་གི་མཆོད་ཁྲིའི་ཁར་མེ་སྦར་བའི་དོན་དུ། ངེད་ཅག་གི་ཕ་མེས་ཀྱི་ཁང་པ་རེ་རེ་ནས་དུས་དུས་སུ་ལོ་ལྟར་བྱི་མེ་ཤིང་ཀི་འབུལ་བ་དེ་ངེད་ཀྱི་དཀོན་མཆོག་གི་ཕོ་བྲང་དུ་སྐྱེལ་བའི་ཕྱིར་དུ། ངེད་རྣམས་ཀྱིས་བླ་མ་དང་ལེ་ཝི་པ་དང་མི་བྱིངས་ཀྱི་ནང་དུ་རྟགས་རིལ་བཏབ་བོ། ༣༥ ལོ་རེ་བཞིན་རང་གི་ཐོག་ཕུད་དང་རྩི་ཤིང་གི་འབྲས་བུ་ཐམས་ཅད་ཀྱི་ཕུད་དེ་ཡ་ཧོ་ཝཱའི་ཕོ་བྲང་དུ་སྐྱེལ་བ་དང་། ༣༦ བཀའ་ཁྲིམས་ན་བྲིས་ཡོད་པ་བཞིན་དུ། ངེད་རྣམས་ཀྱིས་རང་གི་བུ་དང་ཕྱུགས་དང་བ་གླང་དང་ལུག་ཁྱུའི་སྔོན་སྐྱེས་རྣམས། བདག་ཅག་གི་དཀོན་མཆོག་གི་ཕོ་བྲང་དུ། དཀོན་མཆོག་གི་ཁྱིམ་ན་ཞབས་ཏོག་བྱེད་པའི་བླ་མ་རྣམས་ཀྱི་དྲུང་དུ་འབུལ་བ་དང་། ༣༧ རང་གི་བག་ཟན་གྱི་ཕུད་དང་། བཟའ་ཤིང་རིགས་ཐམས་ཅད་ཀྱི་འབྲས་བུ་དང་རྒུན་ཆང་དང་འབྲུ་མར་གྱི་ཕུད་ནི། བདག་ཅག་གི་དཀོན་མཆོག་གི་ཕོ་བྲང་གི་ནང་མིག་ཏུ་བླ་མ་རྣམས་ཀྱི་དྲུང་དུ་འབུལ་ཞིང་། སྟོན་ཐོག་གི་བཅུ་ཁག་ལེ་ཝི་པ་རྣམས་ལ་སྟེར་བའི་ཕྱིར་དུ། གྲོང་ཁྱེར་ཐམས་ཅད་ན་སོ་ནམ་བྱེད་པའི་བཅུ་ཁག་ནི་ལེ་ཝི་པ་རྣམས་ལ་འབུལ་བར་བྱའོ། ༣༨ ཡང་ལེ་ཝི་པ་རྣམས་ཀྱིས་བཅུ་ཁག་ལེན་དུས་སུ། ཨ་རོན་གྱི་བུའམ་བླ་མ་དེ་ལེ་ཝི་པ་རྣམས་དང་མཉམ་དུ་ཡོད་པར་དགོས། དེ་ནས་ལེ་ཝི་པ་རྣམས་བཅུ་ཁག་རྣམས་ཀྱི་བཅུ་ཟུར་ནི་ངེད་ཀྱི་དཀོན་མཆོག་གི་ཕོ་བྲང་གི་གཏེར་མཛོད་ཀྱི་ནང་མིག་རྣམས་ཀྱི་ནང་དུ་འཇོག་པར་དགོས། ༣༩ དེ་ཅིའི་ཕྱིར་ཞེ་ན། ཨིས་ར་ཨེལ་གྱི་བུ་དང་ལེ་ཝི་པའི་བུ་རྣམས་ཀྱིས་འབྲུ་དང་། རྒུན་ཆང་གསར་བ་དང་། སྣུམ་གྱི་འབུལ་བ་རྣམས་ནི། གནས་དམ་པའི་སྣོད་དང་། ཞབས་ཏོག་འབུལ་བའི་བླ་མ་དང་། སྒོ་སྲུང་པ་དང་། མགུར་ལེན་མཁན་རྣམས་བཞུགས་པའི་ནང་མིག་རྣམས་ནང་ཡར་འདྲེན་པར་དགོས། ངེད་ཅག་གིས་རང་གི་དཀོན་མཆོག་གི་ཕོ་བྲང་སྤོང་བར་མི་བྱའོ་ཞེས་དམ་བཅས་སོ༎