དེ་ནས་མི་ཐམས་ཅད་ནི་མི་གཅིག་ལྟར་ཆུའི་རྟ་སྒོའི་རྩར་ཡོད་པའི་ལམ་སྲང་དུ་འཛོམས་ནས། ཆོས་ལ་མཁས་པའི་ཨེས་རཱ་ལ། ཡ་ཧོ་ཝཱས་ཨིས་ར་ཨེལ་ལ་གསུངས་པའི་མོ་ཤེའི་བཀའ་ཁྲིམས་ཀྱི་མདོ་དེ་འདིར་བསྣམས་ཤོག་ཅེས་ཞུས་པས། ༢ བླ་མ་ཨེས་རཱས་ཟླ་བ་བདུན་པའི་ཚེས་དང་པོར་སྐྱེས་པ་དང་བུད་མེད་ཀྱི་ཚོགས་དང་། ཐོས་ཤིང་ཧ་གོ་ནུས་པ་ཐམས་ཅད་ཀྱི་མདུན་དུ་བཀའ་ཁྲིམས་ཀྱི་མདོ་དེ་གདན་ཞུས་ནས། ༣ སྔ་དྲོ་ནས་ཉིན་གུང་གི་བར་དུ་ཆུའི་རྟ་སྒོའི་རྩར་ཡོད་པའི་ལམ་ནང་སྐྱེས་པ་དང་བུད་མེད་དང་། ཧ་གོ་ནུས་པ་ཐམས་ཅད་ཀྱི་མདུན་དུ་བཀླགས་ཏེ། མི་ཐམས་ཅད་ཀྱིས་བཀའ་ཁྲིམས་ཀྱི་མདོ་དེ་ལ་མ་གཡེངས་པར་རྣ་བ་བཏུད་དོ། ༤ དེའི་དོན་དུ་བཟོས་པའི་ཤིང་གི་སྟེགས་ཤིག་གི་སྟེང་དུ་ཆོས་ལ་མཁས་པའི་ཨེས་རཱ་ནི་བཞེང་ནས་བསྡད། དེའི་གཡས་ཕྱོགས་སུ་མད་ཐིད་ཡཱ་དང་། ཤེ་མཱ་དང་། ཨ་ན་ཡཱ་དང་། ཨུ་རི་ཡཱ་དང་། ཧིལ་ཀི་ཡཱ་དང་། མ་ཨ་སེ་ཡཱ་དང་དྲུག་དང་། དེའི་གཡོན་ཕྱོགས་སུ་པེ་ད་ཡཱ་དང་། མི་ཤ་ཨེལ་དང་། མལ་ཀི་ཡཱ་དང་། ཧ་ཤུམ་དང་། ཧས་བད་ད་ནཱ་དང་། ཟ་ཀར་ཡཱ་དང་། མེ་ཤུལ་ལམ་དང་བདུན་འགྲེང་ཞིང་བསྡད་དོ། ༥ དེར་ཨེས་རཱ་མི་ཀུན་ལས་མཐོན་པོ་ལ་ཡོད་པ་དང་། མི་ཚང་མའི་མཐོང་སར་མདོ་དེ་ཕྱེས་ནས། ཁོང་གིས་ཕྱེས་མ་ཐག་ཏུ་མི་ཐམས་ཅད་ཡར་ལངས་སོ། ༦ དེར་ཨེས་རཱས་བླ་ན་མེད་པའི་དཀོན་མཆོག་ཡ་ཧོ་ཝཱ་ལ་ཤིས་བརྗོད་པ་དང་། མི་ཐམས་ཅད་ཀྱིས་ལག་པ་བཏེགས་ནས། ལན་དུ་ཨ་མེན་ཨ་མེན་ཞེས་ཞུས་ནས། མགོ་བཀུག་སྟེ་ལུས་ས་ལ་བརྡབས་ཏེ་ཡ་ཧོ་ཝཱ་ལ་ཕྱག་བཙལ་ཏོ། ༧ ཡང་ཡེ་ཤུ་ཨ་དང་། བཱ་ནི། ཤེ་རབ་ཡཱ། ཡ་མིན། ཨག་ཁུབ། ཤབ་ཐཱ་ཨི། ཧོ་དི་ཡཱ། མ་ཨ་སེ་ཡཱ། ཀེ་ལི་ཏཱ། ཨ་ཟར་ཡཱ། ཡོ་ཟ་བད། ཧ་ནན། པེ་ལ་ཡཱ་དང་ལེ་ཝི་པ་རྣམས་ཀྱིས་རང་རང་གི་གནས་སུ་ལངས་ནས་བསྡད་ཡོད་པའི་མི་ཀུན་ལ་བཀའ་ཁྲིམས་ཀྱི་མདོ་བཤད་དོ། ༨ དེ་དག་གིས་བཀའ་ཁྲིམས་ཀྱི་མདོ་དེ་སྐད་གསལ་པོར་བཀླགས་ནས། དོན་བཤད་ཅིང་། བཀླགས་པའི་དོན་ནི་ཧ་གོ་བར་བཅུག་གོ།