དེ་ནས་རྒྱལ་པོ་ཨར་ཐག་ཤས་ཐཱས་སྲིད་བྱེད་པའི་ལོ་ཉི་ཤུ་པའི་ཟླ་བ་ནི་སཱན་གྱི་དུས་སུ་ཅི་བྱུང་ཞེ་ན། དེར་ཁོང་གི་མདུན་དུ་རྒུན་ཆང་ཡོད་དེ། ངས་རྒུན་ཆང་དེ་ཐོགས་ནས་རྒྱལ་པོ་ལ་ཕུལ་ཏོ། ཉིན་དེའི་བར་དུ་ང་ལ་རྒྱལ་པོའི་དྲུང་དུ་སེམས་སྐྱོ་བ་ནམ་ཡང་མ་བྱུང་བས། ༢ རྒྱལ་པོས་ང་ལ། ནད་མེད་པར་ཁྱོད་ཀྱི་གདོང་སྐྱོ་མོ་འདྲ་མཐོང་བ་དེ་ཅི་ཡིན། དེ་ནི་སྙིང་ཚེར་ལས་གཞན་གང་ཡང་མིན་ནོ་གསུངས་པ་དང་། ང་ནི་ཤིན་ཏུ་འཇིགས་སྐྲགས་ཏེ་རྒྱལ་པོ་ལ། ༣ རྒྱལ་པོའི་སྐུ་ཚེ་རྒྱུན་དུ་བརྟན་པར་ཤོག ངའི་ཡབ་མེས་ཀྱི་སྤུར་ཁང་ཡོད་པའི་གྲོང་ཁྱེར་དེ་སྟོངས་ནས། དེའི་རྟ་སྒོ་རྣམས་མེས་བསྲེགས་ནས་ཡོད་པས། ངའི་ངོ་གདོང་ནང་ཚེར་ཀ་ཅི་ལ་མི་འབྱུང་ཞུས་པ་ལས། ༤ རྒྱལ་པོས་ང་ལ། ད་ཁྱོད་ལ་ཞུ་བ་ཅི་ཡོད་གསུངས་པས། ངས་ནམ་མཁའི་དཀོན་མཆོག་ལ་གསོལ་བ་བཏབ་ནས་རྒྱལ་པོ་ལ། ༥ གལ་ཏེ་རྒྱལ་པོའི་ཐུགས་ལ་འབབ་ཅིང་། ཁྱེད་ཀྱི་ཞབས་ཕྱི་ང་ནི་ཐུགས་རྗེའི་གཟིགས་པ་ཐོབ་པ་ཞིག་ལགས་ན། ཕྲན་ཡ་ཧུ་དཱར་ངའི་ཡབ་མེས་ཀྱི་སྤུར་ཁང་ཡོད་པའི་གྲོང་ཁྱེར་དེ་རྩིག་པའི་ཕྱིར་དུ། དེར་གནང་དུ་གསོལ་ཞུས་པ་དང་། ༦ རྒྱལ་མོའང་ཁོང་དང་མཉམ་དུ་བཞུགས་ཡོད་དེ། རྒྱལ་པོས་ང་ལ། ཁྱོད་ལམ་ལ་ག་ཚོད་འགོར་ཡོང་། ནམ་ལོག་འོང་བར་བྱ་དྲིས་བྱུང་། དེའང་རྒྱལ་པོས་ང་གཏོང་བ་ཐུགས་ལ་བབ་པས། ངས་ཁོང་ལ་ཅི་ཙམ་འགོར་འོང་ཞུས་པ་ཡིན། ༧ གཞན་ཡང་ངས་རྒྱལ་པོ་ལ། རྒྱལ་པོ་ཐུགས་མཉེས་ན། གཙང་པོའི་ཕ་རོལ་གྱི་བློན་པོ་རྣམས་ཀྱིས་ང་ཡ་ཧུ་དཱའི་བར་དུ་སྐྱེལ་བའི་ཕྱིར་བཀའ་ཤོག་ཅིག་དང་། ༨ མཆོད་ཁང་དང་ཉེ་བར་ཡོད་པའི་རྒྱལ་ཁབ་ཀྱི་སྒོ་རྣམས་དང་གྲོང་ཁྱེར་གྱི་ལྕགས་དང་། ང་སྡོད་བྱའི་ཁྱིམ་གྱི་གདུང་མ་བཟོ་བའི་ཕྱིར་ཤིང་གཏོང་བའི་ཆེད་དུ། རྒྱལ་པོའི་ནགས་ཚལ་སྲུང་མཁན་ཨ་སབ་ལ་ཡང་བཀའ་ཤོག་ཅིག་གནང་རོགས་མཛོད་ཅེས་ཞུས་པས། དཀོན་མཆོག་གི་ཕྱག་བཀའ་དྲིན་ཅན་ངའི་ཁར་ཡོད་པས། རྒྱལ་པོས་དེ་བཞིན་དུ་གནང་བྱུང་།