དེ་ནས་ཨིས་ར་ཨེལ་གྱི་བུ་རྣམས་རང་གི་གྲོང་ཁྱེར་རྣམས་སུ་གནས་ཤིང་། ཟླ་བ་བདུན་པ་ལོན་པའི་ཚེ། མི་རྣམས་ཡེ་རུ་ཤ་ལེམ་དུ་མི་གཅིག་ལྟར་ཕྱོགས་གཅིག་ཏུ་འདུས་ཏེ། ༢ དེར་ཡོ་ཚ་དག་གི་བུ་ཡེ་ཤུ་ཨ་དང་། དེའི་སྤུན་བླ་མ་རྣམས་དང་། ཤེ་ཨལ་ཏི་ཨེལ་གྱི་བུ་ཟེ་རུབ་བཱ་བེལ་དང་། དེའི་སྤུན་རྣམས་ལངས་ཏེ། དཀོན་མཆོག་གི་སྐྱེས་བུ་མོ་ཤེའི་བཀའ་ཁྲིམས་ན་བྲིས་པ་བཞིན་དུ། སྦྱིན་སྲེག་གི་མཆོད་པ་འབུལ་བར་ཨིས་ར་ཨེལ་གྱི་དཀོན་མཆོག་གི་མཆོད་ཁྲི་དེ་བཞེངས་སོ། ༣ དེ་དག་ཡུལ་མི་རྣམས་ལ་འཇིགས་པས། མཆོད་ཁྲི་དེ་སྔར་གནས་སུ་བཞེངས་ནས། ཡ་ཧོ་ཝཱ་ལ་དེའི་ཁར་སྔ་དྲོ་དང་ཕྱི་དྲོའི་སྦྱིན་སྲེག་གི་མཆོད་པ་རྣམས་ཕུལ་ཏོ། ༤ ཡང་དེ་དག་གིས་མདོ་ན་བྲིས་པ་བཞིན་དུ། གུར་རྣམས་ཀྱི་དུས་ཆེན་བྱས་ཏེ། ཉིན་རེའི་སྦྱིན་སྲེག་གི་མཆོད་པ་རྣམས་གྲངས་ཀ་བཞིན་དུ་ཉིན་རེ་རེ་ལ་ཕུལ་ཏོ། ༥ ཡང་དེའི་རྗེས་སུ་རྒྱུན་གྱི་སྦྱིན་སྲེག་གི་མཆོད་པ་དང་། ཟླ་གསར་དང་། དམ་པར་བྱས་པའི་ཡ་ཧོ་ཝཱའི་དུས་ཆེན་གྱི་མཆོད་པ་དང་། ཡང་མི་རེ་རེས་དགའ་ཞིང་ཡ་ཧོ་ཝཱའི་ཕྱིར་ཕུལ་བའི་མཆོད་པ་རྣམས་ཕུལ་ཏོ། ༦ ཟླ་བ་བདུན་པའི་ཚེས་དང་པོར་དེ་དག་གིས་ཡ་ཧོ་ཝཱ་ལ་སྦྱིན་སྲེག་གི་མཆོད་པ་འབུལ་བར་བརྩམས་ཀྱང་། དུས་དེ་ལ་ཡ་ཧོ་ཝཱའི་མཆོད་ཁང་གི་རྨང་ད་དུང་བཏིང་ནས་མེད་པ་ཡིན་ནོ། ༧ ཡང་དེ་དག་གིས་རྩིག་དཔོན་དང་ཤིང་བཟོ་པ་ལ་དངུལ་སྤྲད་དེ། ཏ་ཟིག་གི་རྒྱལ་པོ་ཀོ་རེས་ཀྱི་བཀའ་བཞིན་དུ། ལི་བ་ནོན་ནས་རྒྱ་མཚོ་རྒྱུད་དེ་ཡོ་ཕཱའི་བར་དུ་འགྱམ་ཤིང་འདྲེན་པའི་ཕྱིར། ཚི་དོན་པ་དང་ཚོར་པ་རྣམས་ལ་བཟའ་བ་དང་བཏུང་བ་དང་སྣུམ་བྱིན་ཏོ༎