དེ་ནས་དཱ་བིད་ཀྱིས་ཨིས་ར་ཨེལ་གྱི་དཔོན་པོ་ཐམས་ཅད་ཅེ་ན། སྡེ་སོ་སོའི་འགོ་དཔོན་དང་། རེས་མོས་ཀྱིས་རྒྱལ་པོ་ལ་ཞབས་ཏོག་བྱེད་པའི་རུ་དཔོན་རྣམས་དང་། སྟོང་དཔོན་དང་། བརྒྱ་དཔོན་རྣམས་དང་། རྒྱལ་པོ་དང་རྒྱལ་སྲས་ཀྱི་ནོར་རྫས་དང་ཕྱུགས་ཐམས་ཅད་ཀྱི་ཕྱག་མཛོད་རྣམས་དང་། ཉུག་རུམ་དང་། དཔའ་རྩལ་ཅན་དང་། དཔའ་བདུད་རྣམས་ཡེ་རུ་ཤ་ལེམ་དུ་བསགས་ཏེ། ༢ རྒྱལ་པོ་དཱ་བིད་རང་གི་ཞབས་ཐེར་བཙུགས་ནས། བཞེངས་ཏེ་གསུངས་པ། ངའི་སྤུན་དང་ངའི་མི་སྡེ་རྣམས། ངའི་གཏམ་ལ་ཉན་ཚལ། ཡ་ཧོ་ཝཱའི་ཞལ་ཆད་ཀྱི་སྒྲོམ་གྱི་ཕྱིར་བསྟི་གནས་དང་། ངེད་ཀྱི་དཀོན་མཆོག་གི་དོན་དུ་ཞབས་སྟེགས་ཤིག་བཞེངས་པའི་འདུན་པ་ངའི་སྙིང་དུ་བྱུང་ནས། མཁར་ལས་ཀྱི་ཕྱིར་ཐམས་ཅད་བཤམས་མོད། ༣ དཀོན་མཆོག་གིས་ང་ལ། ཁྱོད་ནི་དམག་གི་སྐྱེ་བོ་སྟེ། མིའི་ཁྲག་ཕོས་པས་ན། ངའི་མཚན་གྱི་ཕྱིར་ཁྱོད་ཀྱིས་ཕོ་བྲང་ཞིག་མ་རྩིགས་ཤིག་གསུངས་སོ། ༤ འོན་ང་ནི་དུས་རྒྱུན་དུ་ཨིས་ར་ཨེལ་གྱི་རྒྱལ་པོར་འགྱུར་བའི་ཕྱིར་དུ། ཡ་ཧོ་ཝཱ་ཨིས་ར་ཨེལ་གྱི་དཀོན་མཆོག་གིས་ངའི་ཕ་ཚན་ཐམས་ཅད་ཀྱི་ནང་ནས་ང་ནི་འདམས་པར་མཛད། ཅིའི་ཕྱིར་ཞེ་ན། ཁོང་གིས་ཡ་ཧུ་དཱ་ནི་མི་དཔོན་དུ་ཕྱེས་ཏེ། ཡ་ཧུ་དཱའི་ཕ་སྤད་ལས་ངའི་བརྒྱུད་པ་དང་། ངའི་ཕའི་བུ་རྣམས་ཀྱི་ཁྲོད་ལས། ང་ཨིས་ར་ཨེལ་ཡོངས་ཀྱི་ཐོག་ཏུ་རྒྱལ་པོར་མཛད་པ་ལ་ཁོང་ཐུགས་དགྱེས་པ་ཡིན། ༥ ཡ་ཧོ་ཝཱས་ང་ལ་བུ་མང་ཙམ་གནང་བས། ངའི་བུ་ཀུན་གྱི་ནང་ནས་ཨིས་ར་ཨེལ་ལ་རྒྱལ་སྲིད་བྱེད་དུ་ཡ་ཧོ་ཝཱའི་རྒྱལ་ཁམས་ཀྱི་རྒྱལ་ཁྲིར་འཁོད་པ་ལ་ངའི་བུ་ཤ་ལོ་མོ་ནི་འདམས་པ་ལགས་ཏེ། ༦ ཁོང་གིས་ང་ལ། ཁྱོད་ཀྱི་བུ་ཤ་ལོ་མོས་ངའི་ཕོ་བྲང་དང་ཁྱམས་རྣམས་རྩིག་པར་འགྱུར་རོ། དེ་ཅིའི་ཕྱིར་ཞེ་ན། དེ་ནི་ངའི་བུ་ལ་འགྱུར་བར་འདམས་པས། ང་ནི་དེའི་ཕ་ལ་འགྱུར་བར་འགྱུར། ༧ ཇི་སྟེ་དེས་ད་ལྟ་ལྟར་ངའི་བཀའ་དང་བཀའ་ཁྲིམས་སྲུང་དུ་རེམ་པར་བྱེད་ན། ངས་ཀྱང་དེའི་རྒྱལ་སྲིད་དུས་གཏན་གྱི་ཕྱིར་བརྟན་པར་བྱའོ་གསུང་བྱུང་། ༨ དེའི་ཕྱིར་དུ་ད་ལྟ་ཡ་ཧོ་ཝཱའི་མི་ཚོགས་ཨིས་ར་ཨེལ་ཡོངས་ཀྱི་མཐོང་ངོར། འོ་སྐོལ་གྱི་དཀོན་མཆོག་གིས་གསན་སར། ཁྱོད་ཚོས་ཡུལ་བཟང་པོ་འདི་བདོག་པ་དང་། ཁྱོད་ཅག་གི་རྗེས་སུ་ཁྱོད་ཅག་གི་བུ་བརྒྱུད་ལ་ཡང་གཏན་དུ་ས་སྐལ་ལ་ལུས་པའི་ཕྱིར། ཡ་ཧོ་ཝཱ་རང་གི་དཀོན་མཆོག་གི་བཀའ་རྒྱ་ཐམས་ཅད་སྲུང་བ་དང་སྙེགས་པའི་ཕྱིར་དུ་ངས་ཁྱོད་ཚོ་ལ་སྐུལ་ལོ༎