ཡང་ཨ་རོན་གྱི་བུ་རྣམས་ཀྱི་ཕ་རུས་སོ་སོ་རྣམས་ལ་ལྟ་སྟེ། ཨ་རོན་གྱི་བུ་ནི། ནཱ་དབ་དང་། ཨ་བི་ཧུ་དང་། ཨེལ་ཨ་ཟར་དང་། ཨི་ཐ་མར་བཅས་བཞི་སྟེ། ༢ ནཱ་དབ་དང་ཨ་བི་ཧུ་རང་གི་ཕ་ཡི་སྔོན་དུ་ཤི། དེ་གཉིས་ལ་ཕྲུ་གུ་མེད་པས། ཨེལ་ཨ་ཟར་དང་ཨི་ཐ་མར་གྱིས་བླ་མའི་ལས་ཚན་བྱས་པ་ཡིན། ༣ དེ་ནས་དཱ་བིད་ཀྱིས་རེ་རང་གི་ཞབས་ཏོག་གི་ལས་སྣེ་བཞིན་དུ། ཨེལ་ཨ་ཟར་གྱི་བུ་བརྒྱུད་ཀྱི་ནང་ནས་ཙ་དོག་དང་། ཨི་ཐ་མར་གྱི་བུ་བརྒྱུད་ལས་ཨ་ཧི་མེ་ལེག་གཉིས་ལ་ལས་བགོས་ཏེ་གནང་ངོ་། ༤ ཡང་ཨི་ཐ་མར་གྱི་བུ་བརྒྱུད་ལས། ཨེལ་ཨ་ཟར་གྱི་བུ་བརྒྱུད་ཀྱི་ནང་ན་འགོ་བྱེད་མང་དུ་ཐོན་ནོ། ཡང་དེ་དག་འདི་ལྟར་བགོས་ཡོད་དེ། ཨེལ་ཨ་ཟར་གྱི་བུ་བརྒྱུད་ལས་རང་གི་ཕ་སྤད་ཀྱི་འགོ་བྱེད་བཅུ་དྲུག་དང་། ཨི་ཐ་མར་གྱི་བུ་བརྒྱུད་ལས་རང་གི་ཕ་སྤད་ཀྱི་འགོ་བྱེད་བརྒྱད་ཡོད་དོ། ༥ ཨེལ་ཨ་ཟར་གྱི་བུ་བརྒྱུད་དང་། ཨི་ཐ་མར་གྱི་བུ་བརྒྱུད་ཕན་ཚུན་གཉིས་པོས་རྟགས་རིལ་བརྒྱབས་ནས། གཙང་ཁང་གི་དཀོན་གཉེར་དང་། དཀོན་མཆོག་གི་དཀོན་གཉེར་བྱས་པ་ཡིན་ཏེ། ༦ ལེ་ཝི་པ་ནེ་ཐན་ཨེལ་གྱི་བུ་ཡིག་མཁན་ཤེ་མ་ཡཱས་རྒྱལ་པོ་དང་། བརྒྱ་དཔོན་རྣམས་དང་། བླ་མ་ཙ་དོག་དང་། ཨབ་ཡ་ཐར་གྱི་བུ་ཨ་ཧི་མེ་ལེག་དང་། བླ་མ་དང་། ལེ་ཝི་པའི་ཕ་སྤད་ཀྱི་འགོ་བྱེད་རྣམས་ཀྱི་མདུན་དུ། དེ་དག་གི་མིང་ཡི་གེར་བྲིས་སོ། ཨེལ་ཨ་ཟར་གྱི་ཕྱིར་ཕ་སྤད་གཅིག་དང་། ཨི་ཐ་མར་གྱི་ཕྱིར་ཕ་སྤད་གཅིག་ཕྱེས་པ་ཡིན།