ཡང་དཱ་བིད་ཀྱི་གྲོང་ཁྱེར་དུ་དཱ་བིད་ཀྱིས་རང་གི་ཕྱིར་ཕོ་བྲང་བརྩིགས་ཏེ། དཀོན་མཆོག་གི་སྒྲོམ་གྱི་ཕྱིར་གནས་ཤིག་བཤམས་ནས། སྒྲོམ་དེའི་ཕྱིར་གུར་ཞིག་ཀྱང་ཕུབས་སོ། ༢ དེར་དཱ་བིད་ཀྱི་ཞལ་ནས། ཡ་ཧོ་ཝཱས། ལེ་ཝི་པ་རྣམས་ཀྱིས་དཀོན་མཆོག་གི་སྒྲོམ་འཁུར་བ་དང་། དུས་རྒྱུན་དུ་ཁོང་ལ་ཞབས་ཏོག་བྱེད་དུ་འདམས་པ་ཡིན་པས། དེ་རྣམས་མ་གཏོགས་པར་གཞན་སུས་ཀྱང་དཀོན་མཆོག་གི་སྒྲོམ་འཁུར་བའི་མི་རིགས་སོ། ཞེས་བསྒོ་སྟེ། ༣ དཱ་བིད་ཀྱིས་ཡ་ཧོ་ཝཱའི་སྒྲོམ་དེ་ནི་དེའི་ཕྱིར་བཤམས་པའི་གནས་སུ་གདན་འདྲེན་པར། དཱ་བིད་ཀྱིས་ཨིས་ར་ཨེལ་ཐམས་ཅད་ཡེ་རུ་ཤ་ལེམ་དུ་བསྡུས་སོ། ༤ དཱ་བིད་ཀྱིས་ཨ་རོན་གྱི་བུ་བརྒྱུད་དང་ལེ་ཝི་པ་རྣམས་ཀྱང་བསྡུས་ཏེ། ༥ ཀོ་ཧད་ཀྱི་བུ་བརྒྱུད་ལས། འགོ་དཔོན་ཨུ་རི་ཨེལ་བཅས་དེའི་སྤུན་བརྒྱ་དང་ཉི་ཤུ། ༦ མེ་རཱ་རིའི་བུ་བརྒྱུད་ལས། འགོ་དཔོན་ཨ་ས་ཡཱ་བཅས་དེའི་སྤུན་ཉིས་བརྒྱ་དང་ཉི་ཤུ། ༧ གེར་ཤོན་གྱི་བུ་བརྒྱུད་ལས། འགོ་དཔོན་ཡོ་ཨེལ་བཅས་དེའི་སྤུན་བརྒྱ་དང་སུམ་ཅུ། ༨ ཨེ་ལི་ཚ་ཕན་གྱི་བུ་བརྒྱུད་ལས། འགོ་དཔོན་ཤེ་མ་ཡཱ་བཅས་དེའི་སྤུན་ཉིས་བརྒྱ། ༩ ཧེབ་རོན་གྱི་བུ་བརྒྱུད་ལས། འགོ་དཔོན་ཨེ་ལི་ཨེལ་བཅས་དེའི་སྤུན་བརྒྱད་ཅུ། ༡༠ ཨུ་ཟི་ཨེལ་གྱི་བུ་བརྒྱུད་ལས། འགོ་དཔོན་ཨ་མི་ནཱ་དབ་བཅས་དེའི་སྤུན་བརྒྱ་དང་བཅུ་གཉིས་སོ། ༡༡ དེ་ནས་དཱ་བིད་ཀྱིས་ཙ་དོག་དང་ཨབ་ཡ་ཐར་བླ་མ་གཉིས་པོ་དང་། ལེ་ཝི་པའི་ནང་ནས་ཨུ་རི་ཨེལ་དང་། ཨ་ས་ཡཱ་དང་། ཡོ་ཨེལ་དང་། ཤེ་མ་ཡཱ་དང་། ཨེ་ལི་ཨེལ་དང་། ཨ་མི་ནཱ་དབ་དང་དྲུག་བོས་ནས། ༡༢ དེ་དག་ལ། ཁྱེད་རྣམས་ལེ་ཝི་པའི་ཕ་ཚན་གྱི་འགོ་དཔོན་ཡིན་པས། ཁྱེད་ཅག་རང་དང་། ཁྱེད་ཅག་གི་སྤུན་རྣམས་ཀྱིས་ཡ་ཧོ་ཝཱ་ཨིས་ར་ཨེལ་གྱི་དཀོན་མཆོག་གི་སྒྲོམ་དེ་ནི། ངས་དེའི་དོན་དུ་བཤམས་པའི་གནས་སུ་གདན་འདྲེན་པའི་ཕྱིར་དུ་གཙང་སྦྲ་གྱིས་ཤིག ༡༣ སྔར་ཁྱེད་ཅག་གིས་དེ་བཞིན་དུ་མ་བྱས་པར། ངེད་ཀྱིས་རིགས་པ་བཞིན་དུ་ཁོང་མ་བཙལ་བའི་རྐྱེན་གྱིས། ཡ་ཧོ་ཝཱ་ངེད་ཀྱི་དཀོན་མཆོག་གིས་འོ་ཅག་དྲལ་བ་ཡིན། ཞེས་སྨྲས་པ་དང་། ༡༤ བླ་མ་དང་ལེ་ཝི་པ་རྣམས་ཀྱིས་ཡ་ཧོ་ཝཱ་ཨིས་ར་ཨེལ་གྱི་དཀོན་མཆོག་གི་སྒྲོམ་དེ་གདན་འདྲེན་དུ་གཙང་སྦྲ་བྱས་སོ། ༡༥ ཡང་ཡ་ཧོ་ཝཱའི་བཀའ་བཞིན་དུ་མོ་ཤེས་སྔར་བསྒོ་བ་ལྟར་དུ། ལེ་ཝི་པའི་བུ་རྣམས་ཀྱིས་དཀོན་མཆོག་གི་སྒྲོམ་དེ་ལ་གདང་བུ་རྒྱུས་ནས་དཔུང་པར་བཀུར་བ་དང་།