༩ དེར་བསླེབས་ནས། ཕུག་པ་ཞིག་གི་ནང་དུ་ཞུགས་བསྡད་པ་ལས། ཀྱེ་ཧོ། ཡ་ཧོ་ཝཱའི་བཀའ་བྱུང་ནས་དེ་ལ། ཨེ་ལི་ཡཱ། ཁྱོད་འདིར་ཅི་བྱེད། ༡༠ དེས་ཞུ་ལན་དུ། ཡ་ཧོ་ཝཱ་དཔུང་ཚོགས་ཀྱི་དཀོན་མཆོག་གི་ཕྱིར་བདག་ལ་ཁྲག་རླུང་ལྡང་ངོ་། ཅིའི་ཕྱིར་ཞེ་ན། ཨིས་ར་ཨེལ་གྱི་བུ་བརྒྱུད་ཀྱིས་ཁྱེད་ཀྱི་ཞལ་ཆད་སྤངས་ཏེ། ཁྱེད་ཀྱི་མཆོད་ཁྲི་རྣམས་བཤིགས། ལུང་སྟོན་པ་རྣམས་ནི་རལ་གྲིས་བཀུམ་ནས། ད་བདག་གཅིག་པུ་ལུས་ཡོད་རུང་། དེ་རྣམས་ཀྱིས་བདག་གི་སྲོག་ཀྱང་ལེན་དུ་སྙེགས་པའི་སྟབས་བྱེད་ཀྱིན་འདུག ཅེས་ཞུས་པས། ༡༡ ཁོང་གིས་དེ་ལ། ད་ཕྱི་རོལ་དུ་ཐོན་ཅིག་དང་། ཡ་ཧོ་ཝཱའི་ཞལ་ངོར་རི་ལ་ལངས་ནས་སྡོད་ཅིག ཅེས་བསྒོ་བ་དང་། ཀྱེ་ཧོ། ཡ་ཧོ་ཝཱ་དེའི་མདུན་ནས་ཕར་གཤེགས་པ་ལས། ཡ་ཧོ་ཝཱའི་མདུན་དུ་རི་རྣམས་འགྱེས་བྱེད་དང་། བྲག་རྣམས་སིལ་བུར་གཅོག་པའི་རླུང་དྲག་པོ་ཤིན་ཏུ་ཆེ་བ་ཞིག་བྱུང་ཡང་། ཡ་ཧོ་ཝཱ་རླུང་དྲག་གི་ནང་ན་མཆིས་པ་མ་ཡིན། རླུང་དྲག་གི་འོག་ཏུ་ས་གཡོ་བ་བྱུང་ཡང་། ཡ་ཧོ་ཝཱ་ས་གཡོ་བའི་ནང་ན་མཆིས་པ་མ་ཡིན། ༡༢ ས་གཡོ་བའི་འོག་ཏུ་མེ་འཁྱུག་བྱུང་ཡང་། ཡ་ཧོ་ཝཱ་མེའི་ནང་ན་མཆིས་པ་མ་ཡིན། མེའི་འོག་ཏུ་སྐད་ཐིང་འཇམ་པ་ཞིག་བྱུང་། ༡༣ ཨེ་ལི་ཡཱས་དེ་ཐོས་པར་ཙམ་གྱིས། གཟན་གོས་ཀྱིས་རང་གི་གདོང་པ་བཀབ་སྟེ། ཕྱིར་ཐོན་ནས། ཕུག་པའི་སྒོ་འགྲམ་དུ་ཀེ་རེ་བསྡད་པ་དང་། ཀྱེ་ཧོ། ཨེ་ལི་ཡཱ། འདིར་ཅི་བྱེད། ཅེས་པའི་སྐད་བྱུང་བས། ༡༤ དེས་ཁོང་ལ། ཡ་ཧོ་ཝཱ་དཔུང་ཚོགས་ཀྱི་དཀོན་མཆོག་གི་ཕྱིར་བདག་ལ་ཁྲག་རླུང་ལྡང་ངོ་། ཅིའི་ཕྱིར་ཞེ་ན། ཨིས་ར་ཨེལ་གྱི་བུ་བརྒྱུད་ཀྱིས་ཁྱེད་ཀྱི་ཞལ་ཆད་སྤངས་ཏེ། ཁྱེད་ཀྱི་མཆོད་ཁྲི་རྣམས་བཤིགས། ལུང་སྟོན་པ་རྣམས་ནི་རལ་གྲིས་བཀུམ་ནས། ད་བདག་གཅིག་པུ་ལུས་ཡོད་རུང་། དེ་རྣམས་ཀྱིས་བདག་གི་སྲོག་ཀྱང་ལེན་དུ་སྙེགས་པའི་སྟབས་བྱེད་ཀྱིན་འདུག ཅེས་ཞུས་པས། ༡༥ ཡ་ཧོ་ཝཱས་དེ་ལ། ད་སོང་ལ། འབྲོག་སྟོང་གི་ལམ་བཟུང་ནས་ད་མཱ་སེག་ཏུ་སོང་ཞིག ཡང་དེར་ཕྱིན་པའི་དུས་སུ། ཨ་རམ་གྱི་རྒྱལ་པོར་ཧ་ཟ་ཨེལ་དང་། ༡༦ ཨིས་ར་ཨེལ་གྱི་རྒྱལ་པོར་ནིམ་ཤིའི་བུ་ཡེ་ཧུ་ལ་སྣུམ་སྐུས་ཤིག ཁྱོད་ཀྱི་ཚབ་ཏུ་ལུང་སྟོན་པར་འགྱུར་བ་ལ་ཨ་བེལ་མེ་ཧོ་ལཱ་པ་ཤ་ཕད་ཀྱི་བུ་ཨེ་ལི་ཤཱ་ལ་སྣུམ་སྐུས་ཤིག ༡༧ དེ་ནས་ཧ་ཟ་ཨེལ་གྱི་རལ་གྲི་ལས་ཐར་པ་ཐམས་ཅད་ནི་ཡེ་ཧུས་གསད། ཡེ་ཧུའི་རལ་གྲི་ལས་བུད་པ་ཐམས་ཅད་ཨེ་ལི་ཤཱས་གསད་དོ། ༡༨ དེའང་ཁོ་བོས་བ་ཨཱལ་གྱི་མདུན་དུ་པུས་མོ་མ་བཙུགས་པའམ། དེ་ལ་ཁ་ཡང་མ་བསྐྱལ་བའི་ཨིས་ར་ཨེལ་གྱི་ཁྲོད་དུ་མི་སྟོང་བདུན་ད་བར་བཞག་པ་ཡིན། ཞེས་བཀའ་སྩལ་པ་དང་།

༡༩ ཁོང་དེ་ནས་པོས་ཏེ། མདུན་དུ་གླང་དོར་བཅུ་གཉིས་བཙུགས་ནས་ཞིང་རྨོ་ཞིང་ཡོད་པའི་ཤ་ཕད་ཀྱི་བུ་ཨེ་ལི་ཤཱ་དང་ཕྲད་དེ། དོར་བཅུ་གཉིས་པ་དང་མཉམ་དུ་དེ་རང་ཡོད་པ་ལས། ཨེ་ལི་ཡཱ་མདུན་དུ་བྱོན་ནས། དེའི་ཐོག་ཏུ་རང་གི་གཟན་ཕངས་བཏང་བས། ༢༠ དེས་གླང་རྣམས་བོར་ཏེ། ཨེ་ལི་ཡཱའི་ཕྱི་བཞིན་རྒྱུག་ཅིང་དེ་ལ། རང་གི་ཕ་དང་མ་ལ་ཁ་སྐྱེལ་དུ་བདག་ལ་དགོངས་པ་གནོང་ཞིག་དང་། དེ་ནས་ཁྱེད་ཀྱི་ཕྱི་བཞིན་འབྲང་བར་བྱའོ། ཞེས་ཞུས་པས། ཁོང་གིས་དེ་ལ། ངས་ཁྱོད་ལ་ཅི་བྱེད། ཕྱིར་ལོག་སོང་ཞིག གསུངས་པས། ༢༡ ཁོང་གི་དྲུང་ནས་ལོག་འོངས་ནས། གླང་དོར་གཅིག་ཁྱེར་ནས་བསད་དེ། རྨོ་བའི་ཆས་ཀྱིས་དེ་དག་གི་ཤ་བཙོས་ནས། མི་རྣམས་ལ་བྱིན་ཏེ། དེ་རྣམས་ཀྱིས་ཟོས་པ་དང་། དེ་ལངས་ནས། ཨེ་ལི་ཡཱའི་ཕྱི་བཞིན་འབྲངས་ཏེ། ཞབས་ཏོག་བྱས་སོ༎