ཤ་ཨུལ་གྲོངས་ནས། དཱ་བིད་ནི་ཨ་མ་ལེག་པ་རྣམས་ལ་དམག་བཏང་ནས་ཕྱིར་ལོག་སྐབས་སུ། དཱ་བིད་ཞག་གཉིས་ཙིག་ལག་ཏུ་གནས་སོ། ༢ ཞག་གསུམ་པར་འདི་ལྟར་བྱུང་། ཤ་ཨུལ་གྱི་དམག་སྒར་ནས་མི་ཞིག་གོས་བཤགས་ཏེ། མགོའི་ཁར་ས་གོན་ནས་འོངས་སོ། མི་དེ་དཱ་བིད་ཀྱི་དྲུང་དུ་བསླེབས་པ་ཙམ་གྱིས། མགོ་རྒུས་ཏེ། ཕྱག་བཙལ་ཏོ། ༣ དཱ་བིད་ཀྱིས་དེ་ལ། ཁྱོད་གང་ནས་འོང་ཞེས་དྲིས་པས། མི་དེས། ཨིས་ར་ཨེལ་གྱི་དམག་སྒར་ནས་བདག་ཐར་ཏེ་འོང་ངོ་ཞེས་ཞུས་སོ། ༤ དེ་ནས་དཱ་བིད་ཀྱིས། དེ་རུ་ཅི་བྱུང་བ་ནི་ང་ལ་ཤོད་ཅིག་སྨྲས་པས། མི་དེས། ཡུལ་མི་རྣམས་འཐབ་མོ་ནས་བྲོས་ནས། མི་སྡེའི་ནང་ནས་མི་མང་པོ་གྱེལ་ནས་ཤིའོ། དེ་མ་ཟད། ཤ་ཨུལ་དང་དེའི་སྲས་ཡོ་ན་ཐན་གཉིས་ཀྱང་སྐུ་གཤེགས་པར་གྱུར་ཏོ། ༥ ཞེས་ཞུས་པས་དཱ་བིད་ཀྱིས་གཞོན་ནུ་དེ་ལ། ཁྱོད་ལ་ཤ་ཨུལ་དང་དེའི་སྲས་ཡོ་ན་ཐན་གཉིས་གྲོངས་པའི་ཆ་ཅི་ལྟར་བྱུང་དྲིས་པས། ༦ འཕྲིན་བཤད་པའི་གཞོན་ནུ་དེས། རི་གིལ་བོ་ཨ་རུ་བདག་བློ་བུར་དུ་ཤ་ཨུལ་དང་ཕྲད་པ་དང་། ཀྱེ་ཧོ། ཤ་ཨུལ་ནི་ཉིད་ཀྱི་མདུང་ལ་བརྟེན་ཅིང་། ཤིང་རྟ་དང་རྟ་པ་རྣམས་ཁོང་གི་རྗེས་སུ་འདེད་པར་མཐོང་ངོ་། ༧ ཡང་ཁོང་གིས་ཕྱི་མིག་གཟིགས་ཏེ། བདག་མཐོང་སྟེ། བདག་ལ་བོས་པས། བདག་གིས་ནི། བཀའ་སྩོལ་ཞིག་ཞུས་པ་ཡིན། ༨ ཁོང་གིས་བདག་ལ། ཁྱོད་སུ་ཡིན་དྲིས་ནས། བདག་གིས་ནི། ང་ཨ་མ་ལེག་པ་ཡིན་ཞེས་ཞུས་པས། ༩ ཁོང་གིས་བདག་ལ། ངའི་གཞོགས་སུ་སྡོད་དང་། ང་གསོད་ཅིག ད་རུང་ཡང་ང་ལ་དབུགས་ཡོད་ཀྱང་། མུན་ནག་དྲག་པོ་ཞིག་གིས་ང་བཟུང་ངོ་། ༡༠ ཞེས་སྨྲས་པས། བདག་ཁོང་གི་གཞོགས་སུ་ལངས་ནས། ཁོང་བསད་པ་ཡིན། དེ་ཅིའི་ཕྱིར་ཞེ་ན། ཁོང་གྱེལ་ཚར་བས་མི་འཚོ་བར་བརྟགས་པའི་ཕྱིར་རོ། དེ་ནས་ཁོང་གི་དབུ་ལ་ཡོད་པའི་ཅོད་པན་དང་། ཕྱག་ལ་ཡོད་པའི་གདུབ་བུ་གཉིས་བླངས་ནས། འདི་རུ་བདག་གི་ཇོ་བོའི་དྲུང་དུ་ཁྱེར་ཏེ་འོངས་པ་ཡིན།