དེ་ནས་ཤ་ལོ་མོས་ཡ་ཧོ་ཝཱའི་ཕོ་བྲང་དང་། རྒྱལ་པོའི་ཁབ་དང་། ཤ་ལོ་མོས་སྒྲུབ་ཏུ་འདོད་པ་ཐམས་ཅད་སྒྲུབ་པའི་ཚེ། ༢ ཤ་ལོ་མོས་གི་བེ་ཨོན་དུ་ཡ་ཧོ་ཝཱ་མཇལ་བར་གྱུར་བ་ལྟར། སྐབས་གཉིས་པར་ཁོང་གི་མཇལ་ཁ་ཐོབ་པར་གྱུར་ཏེ། ༣ ཡ་ཧོ་ཝཱས་དེ་ལ་གསུངས་པ། ཁྱེད་ཀྱིས་ངའི་དྲུང་དུ་ཞུས་པའི་སྨོན་ལམ་དང་སློང་བ་རྣམས་ངས་གསན་ཏོ། ངའི་མཚན་རྟག་ཏུ་འདིར་གནས་པའི་ཕྱིར། ཁྱེད་ཀྱིས་བརྩིགས་པའི་ཕོ་བྲང་འདི་ངས་དམ་པར་བྱས་པས། ངའི་སྤྱན་དང་ངའི་ཐུགས་གཉིས་རྟག་ཏུ་དེར་མཆིས་པར་འགྱུར། ༤ ཁྱོད་ཀྱིས་ཕ་དཱ་བིད་ཀྱིས་སྙིང་དྲང་ཞིང་། དྲང་བ་ཉིད་ཀྱི་ངང་ནས་སྤྱད་པ་ལྟར། ཁྱོད་ཀྱིས་ཀྱང་བྱེད་ཅིང་། ངས་ཁྱོད་ལ་བསྒོ་བ་ཐམས་ཅད་དང་མཐུན་པར་སྤྱོད་དེ། ངའི་སྤྱད་མཚམས་དང་བཀའ་ཁྲིམས་རྣམས་སྲུང་ན། ༥ ངས་ཁྱོད་ཀྱི་ཕ་དཱ་བིད་ལ་ཞལ་ཆད་བྱས་ཤིང་། ཁྱོད་ཀྱི་ནང་ནས་ཨིས་ར་ཨེལ་གྱི་རྒྱལ་ཁྲིར་སྡོད་པའི་མིའི་རྒྱུན་ཆད་པར་མི་འགྱུར་རོ། ཞེས་སྨྲས་པ་བཞིན་དུ། ངས་ཁྱོད་ཀྱི་རྒྱལ་ཁམས་ཀྱི་རྒྱལ་ཁྲི་ནི་ཨིས་ར་ཨེལ་གྱི་ཐོག་ཏུ་རྒྱུན་དུ་བརྟན་པོར་བྱེད་པར་བྱ། ༦ སླར་གལ་ཏེ་ཁྱོད་རང་ངམ། ཁྱོད་ཀྱི་བུ་རྣམས་ངའི་རྗེས་སུ་འབྲང་བ་ལས་འབྱོལ་ཞིང་། ངས་ཁྱོད་ཅག་གི་མདུན་དུ་བཞག་པའི་བཀའ་རྒྱ་དང་སྤྱད་མཚམས་རྣམས་མ་སྲུང་བར། ལྷ་གཞན་རྣམས་ཀྱི་དྲུང་དུ་སོང་སྟེ། དེ་དག་ལ་རྟེན་ཏེ། བསྙེན་བཀུར་བྱེད་ཅིང་ཕྱག་འཚལ་ན། ༧ ངས་ཨིས་ར་ཨེལ་ནི་བཏད་པའི་ཡུལ་འདིའི་ནང་ནས་མེད་པར་བྱ་བ་དང་། བདག་ཉིད་ཀྱི་མཚན་གྱི་ཕྱིར་དམ་པར་བྱས་པའི་ཕོ་བྲང་འདི་ཡང་བདག་ཉིད་ཀྱི་སྤྱན་ལམ་ནས་འདོར་བར་བྱ་བ་དང་། ཨིས་ར་ཨེལ་ནི་མི་བརྒྱུད་ཐམས་ཅད་ཀྱི་ནང་དུ་དཔེ་འབོར་དང་ཁ་ཚིག་ཏུ་འགྱུར་བར་འགྱུར། ༨ ཡང་ཕོ་བྲང་མཐོན་པོ་འདིའི་མདུན་ནས་ཆས་པ་ཐམས་ཅད་ཧ་ལས་ཤིང་། ཐུ་ཐུ་སྨྲ་ཞིང་། ཡ་ཧོ་ཝཱས་ཡུལ་འདི་དང་ཕོ་བྲང་འདི་ལ་ཅིའི་སླད་དུ་འདི་ལྟར་མཛད། ཅེས་སྨྲ་བས། ༩ དེ་དག་གིས་ལན་དུ། ཁོ་རྣམས་ཀྱིས་རང་གི་དཀོན་མཆོག་ཡ་ཧོ་ཝཱ་དེ་སྤངས་སོ། དེས་ནི་ཁོ་རྣམས་ཀྱི་ཕ་མེས་རྣམས་མི་སེར་ཡུལ་གྱི་ནང་ནས་བཏོན་པར་མཛད་ཀྱང་། ཁོ་རྣམས་ཀྱིས་ལྷ་གཞན་དག་ལ་བརྟེན་ནས། དེ་དག་ལ་ཕྱག་བཙལ་ཏེ། དེ་དག་བཀུར་བའི་རྐྱེན་གྱིས། ཡ་ཧོ་ཝཱས་ཁོ་རྣམས་ཀྱི་ཐོག་ཏུ་བར་ཆད་འདི་ཐམས་ཅད་ཕབ་པ་ལགས། ཅེས་སྙད་པར་འགྱུར་རོ༎