དེ་ནས་ཚོར་གྱི་རྒྱལ་པོ་ཧི་རམ་གྱིས་རང་གི་བྲན་གཡོག་རྣམས་ཤ་ལོ་མོའི་དྲུང་དུ་བརྫངས་སོ། ཅིའི་ཕྱིར་ཞེ་ན། དེས་ནི། ཁོང་ཕའི་ཚབ་ཏུ་རྒྱལ་པོར་བྱུགས་པར་ཐོས་སོ། ཧི་རམ་ནི་དུས་རྒྱུན་དུ་དཱ་བིད་ཀྱི་མཛའ་བོ་ཡོད་པ་ཡིན། ༢ དེ་ནས་ཤ་ལོ་མོས་ཧི་རམ་ལ་འདི་སྐད་དུ། ༣ ངའི་ཡབ་དཱ་བིད་ཀྱིས་ཡ་ཧོ་ཝཱ་ཉིད་ཀྱི་དཀོན་མཆོག་གི་མཚན་ལ་ཕོ་བྲང་ཞིག་བཞེང་བར་མ་ནུས་སོ། གང་ལ་ཞེ་ན། ཡ་ཧོ་ཝཱས་དགྲ་རྣམས་ཁོང་གི་ཞབས་མཐིལ་གྱི་འོག་ཏུ་མ་བཅུག་པའི་བར་དུ་ཁོང་ལ་ཕྱོགས་བཞི་ནས་དམག་ཐོན་པའི་རྒྱུས་ཁྱེད་ལ་ཡོད་ཀྱི། ༤ ད་ཡ་ཧོ་ཝཱ་ངའི་དཀོན་མཆོག་གིས་ང་ལ་ཕྱོགས་བཞི་ལས་དུས་བདེ་གནང་བས། ང་ལ་དགྲ་དང་བར་ཆད་མེད་དོ། ༥ ད་གཟིགས་ཤིག ཡ་ཧོ་ཝཱས་ངའི་ཡབ་དཱ་བིད་ལ་འདི་སྐད་དུ། ངས་ཁྱོད་ཀྱི་ཚབ་ཏུ་ཁྱོད་ཀྱི་བུ་རྒྱལ་ཁྲིར་གདེག་པ་དེས་ངའི་མཚན་གྱི་ཕོ་བྲང་ཞིག་བཞེང་བར་བྱ། ཞེས་གསུངས་པ་བཞིན་དུ། ངས་ཡ་ཧོ་ཝཱ་རང་གི་དཀོན་མཆོག་གི་མཚན་གྱི་ཕོ་བྲང་ཞིག་བཞེང་བའི་འདུན་པ་བྱེད་པས། ༦ ད་ཁྱེད་ཀྱིས་ངའི་དོན་དུ་ལི་བ་ནོན་རི་ནས་འགྱམ་ཤིང་གཅོད་པའི་བཀའ་གནོང་ཞིག ཡང་ངའི་གཡོག་པོ་རྣམས་ནི་ཁྱེད་ཀྱི་གཡོག་པོ་རྣམས་དང་མཉམ་དུ་སོང་སྟེ། ངས་ཁྱེད་ལ་ཁྱེད་ཀྱི་གཡོག་པོ་རྣམས་ཀྱི་ལས་སྣ་ཚོགས་ཀྱི་ལག་གླ་ཁྱེད་ཀྱིས་གང་བཅད་པ་བཞིན་དུ་སྟེར་བར་བྱ། ཅིའི་ཕྱིར་ཞེ་ན། ང་རྣམས་ཀྱི་ཁྲོད་དུ་ཚི་དོན་པ་དང་འདྲ་བར་གདུང་མ་གཅོད་ཤེས་པ་གཅིག་ཀྱང་མེད་པར་ཁྱེད་ཀྱིས་མཁྱེན་ནོ། ཞེས་སྦྲན་ནོ༎