དེ་ནས་དཱ་བིད་་ནོབ་ཏུ་བླ་མ་ཨ་ཧི་མེ་ལེག་ཞེས་བྱ་བའི་དྲུང་དུ་བསླེབས་ནས། ཨ་ཧི་མེ་ལེག་ནི་དཱ་བིད་དང་འཕྲད་དུ་འདར་གྱིན་འོངས་ཏེ་དེ་ལ། ཁྱེད་མཉམ་དུ་མི་གང་ཡང་མེད་དེ། ཁྱེད་གཅིག་པུར་ཅིའི་ཕྱིར་འོང་ཞེས་འདྲིས་ནས། ༢ དཱ་བིད་ཀྱིས་བླ་མ་ཨ་ཧི་མེ་ལེག་ལ། རྒྱལ་པོས་ང་ལ་ལས་ཤིག་བསྐོས་ཏེ་ང་ལ། ངས་ཁྱོད་གང་དུ་གཏོང་བ་དང་། ཁྱོད་ལ་ལས་གང་བསྐོས་པ། དེའི་རྒྱུས་མི་སུ་ལ་ཡང་མངོན་པར་མ་བྱེད་ཅིག་ཅེས་བཀའ་གནང་བས། ངས་ནི་རང་གི་གཞོན་ནུ་རྣམས་གནས་གཞན་ཞིག་ཏུ་བཏང་བ་ཡིན། ༣ ད་ལྟ་ཁྱེད་ཀྱི་ལག་ཐོག་ཅི་ཡོད། བག་ལེབ་ལྔའམ་འདིར་གང་ཡོད་པ་དེ་ངའི་ལག་ཏུ་གནོང་ཞིག ༤ ཅེས་པའི་ལན་དུ་བླ་མས་དཱ་བིད་ལ། དཀྱུས་མའི་བག་ལེབ་ནི་ང་རང་གི་ལག་ཐོག་མེད་དེ། འདི་རུ་བག་ལེབ་དམ་པ་ཡོད། གལ་ཏེ་ཁྱེད་ཀྱི་གཞོན་ནུ་རྣམས་ཀྱིས་རེ་རང་གི་ལུས་བུད་མེད་ལས་བསྲུངས་ཡོད་ན། ལེགས་སོ་སྨྲས་པས། ༥ དཱ་བིད་ཀྱིས་བླ་མ་ལ། བདེན་པར་ཞག་གསུམ་ནས་བཟུང་སྟེ། ང་ཚོས་རེ་རང་གི་ལུས་བུད་མེད་ལས་བསྲུངས་པ་ཡིན། འདི་ནི་རྒྱུན་གྱི་བྱེས་ཤིག་ཡིན་ནའང་། ཐོན་པའི་ཚེ་གཞོན་ནུ་རྣམས་ཀྱི་སྣོད་ཐམས་ཅད་གཙང་མ་ཡིན་ཏེ། དེ་རིང་ནི་ཅི་ནས་ཀྱང་དེ་དག་གི་སྣོད་རྣམས་ལྷག་པར་གཙང་བ་ཡོད་འགྲོ། ༦ ཞེས་སྨྲས་པས། བླ་མས་ཁོ་རྣམས་ལ་བག་ལེབ་དམ་པ་གནང་ངོ་། དེ་ཅིའི་ཕྱིར་ཞེ་ན། གཟིགས་པའི་བག་ལེབ་དེ་མ་གཏོགས་པར། གཞན་གང་ཡང་དེ་རུ་མེད་པ་ཡིན། ཡང་བག་ལེབ་ཚབ་ཞིག་འབུལ་བའི་སྐབས་སུ། བག་ལེབ་དེ་ནི་ཡ་ཧོ་ཝཱའི་སྤྱན་གྱི་དྲུང་ནས་འཁྱེར་ཏོ༎