དེ་ནས་དཱ་བིད་་རཱ་མཱ་ཡི་ནཱ་ཡོད་ནས་བྲོས་ནས། ཡོ་ན་ཐན་གྱི་དྲུང་དུ་འོང་སྟེ་ཟེར་པ། ངས་ཅི་བྱས་པ་ཡིན། ངའི་སྐྱོན་ཅི་ཡིན། ངས་ནི་ཁྱེད་ཀྱི་ཕ་ཡི་དྲུང་དུ་ཉེས་སྡིག་ཅི་བྱས་པ་ཡིན། དེས་ངའི་སྲོག་ལ་སྙེག་གོ། ༢ ཞེས་སྨྲས་པས་དེས་ནི། དེ་ལྟར་མིན། ཁྱོད་འཆི་བར་མི་འགྱུར། ད་ལྟོས་ཤིག བྱ་བ་ཞིག་ཆེན་པོ་ཡིན་ནམ་ཆུང་བ་ཡིན་ཀྱང་། ང་ལ་མ་བཤད་པའི་སྔོན་དུ་ངའི་ཕ་ཡིས་མི་བྱ། གཏམ་དེ་ནི་ངའི་ཕ་ཡིས་ང་ལ་ཅིའི་ཕྱིར་སྦ་བར་བྱ། དེ་ལྟར་མི་འོང་། ༣ དེ་རུ་དཱ་བིད་ཀྱིས་ཡང་མནའ་བསྐྱལ་ཏེ་དེ་ལ། ང་ལ་ཁྱེད་ཀྱི་སྤྱན་དྲུང་དུ་སྙིང་རྗེ་བརྙེད་ཡོད་པར་ཁྱེད་ཀྱི་ཕ་ཡིས་ལེགས་པར་ཤེས་པས། ཡོ་ན་ཐན་ལ་ཁོང་འཁྲུགས་མི་བྱུང་བའི་ཕྱིར་དུ་འདི་ནི་ཤེས་མ་ཆུག་ཅིག ཅེས་ཁྱེད་ཀྱི་ཕ་ཡིས་སྨྲས་སོ། ཡ་ཧོ་ཝཱ་དང་ཁྱེད་ཀྱི་སེམས་གསོན་པོ་ལགས་པར་ངེས་པ་ལྟར། ང་དང་འཆི་བ་གཉིས་ཀྱི་བར་དུ་གོམ་པ་གཅིག་མ་གཏོགས་མེད། ༤ ཅེས་པའི་ལན་དུ་ཡོ་ན་ཐན་གྱིས་དཱ་བིད་ལ། ཁྱེད་ཀྱི་སེམས་ནི་གང་ལ་དགའ་ན་ཡང་། དེ་ནི་ངས་ཁྱོད་ཀྱི་དོན་དུ་བྱའོ་ཞེས་སྨྲས་ནས། ༥ དཱ་བིད་ཀྱིས་ཡོ་ན་ཐན་ལ། ཀྱེ་ཧོ། སང་ཉིན་ཟླ་ཚེས་ཡིན་པས། ང་ནི་རྒྱལ་པོ་དང་མཉམ་ཁ་ཟས་ཟ་བ་ལ་སྡོད་པར་དགོས། དེའི་ཕྱིར་ང་འགྲོ་ཆུག ང་ཐང་དུ་སོང་སྟེ། ནུབ་མོ་གསུམ་གྱི་བར་དུ་ཡིབ་ནས་བསྡད་ཡོང་། ༦ གལ་ཏེ་ཁྱེད་ཀྱི་ཕས་ང་འཚོལ་ན། ཁྱེད་ཀྱིས་འདི་ལྟར་སྨྲོས་ཤིག དཱ་བིད་རང་གི་གྲོང་ཁྱེར་བེད་ལེ་ཧེམ་དུ་འགྲོ་བའི་ཕྱིར་ང་ནས་དགོངས་པ་ཞུས་སོ། དེ་རུ་དེའི་བརྒྱུད་ཀྱིས་ལོ་ལྟར་གྱི་མཆོད་པ་འབུལ་བར་བྱེད། ༧ གལ་ཏེ་ཁོང་གིས་ལེགས་སོ་སྨྲ་ན། ཁྱེད་ཀྱི་བྲན་བདག་ལ་ཞི་བདེ་འབྱུང་བར་འགྱུར། གལ་ཏེ་ཁོང་གིས་ཁྲོས་ན། ལས་ངན་པ་བྱེད་དུ་སེམས་ཐག་ཧྲིལ་བ་ཤེས་ཤིག ༨ ཁྱེད་ཀྱིས་ཉིད་ཀྱི་བྲན་བདག་ཡ་ཧོ་ཝཱའི་ཞལ་ཆད་ཀྱི་ནང་དུ་ཁྲིད་པས། ཁྱེད་ཀྱི་བྲན་མི་ལ་བཀའ་དྲིན་མཛོད་ཅིག བདག་གི་ནང་ན་ཉེས་སྡིག་ཡོད་ན། ཁྱེད་ཀྱིས་བདག་སོད་ཅིག ཁྱེད་ཀྱི་ཕ་ཡི་དྲུང་དུ་བདག་ནི་ཅིའི་ཕྱིར་འཁྲིད་པར་བྱ། ༩ ཞེས་ཞུས་ནས་ཡོ་ན་ཐན་གྱིས། དེ་ལྟར་མ་བྱུང་ཞིག ངའི་ཕ་ཡིས་ཁྱོད་ལ་ངན་བྱེད་ཐག་ཆོད་ཡིན་པ་ངས་རྟོགས་ན། ངས་ཁྱོད་ལ་ཅིའི་ཕྱིར་མི་ལབ། ༡༠ ཅེས་སྨྲས་ནས། དཱ་བིད་ཀྱིས་ཡོ་ན་ཐན་ལ། གལ་ཏེ་ཁྱེད་ཀྱི་ཕས་ཁྱེད་ལ་ལན་དྲག་པོ་ཞིག་གཏོང་ན། སུས་ང་ལ་ལབ་པར་བྱ། ༡༡ ཞེས་ཞུས་ནས་ཡོ་ན་ཐན་གྱིས་དཱ་བིད་ལ། ད་འགྲོ་དང་། ང་གཉིས་ཐང་དེ་རུ་འགྲོ་བར་བྱ་ཞེས་ཟེར་ནས། ཁོ་གཉིས་ཀ་ཐང་དེ་རུ་སོང་ནས།