༦ དེར་ཡོ་ན་ཐན་གྱིས་གོ་ཁྲབ་འཁུར་བའི་ཁྱེའུ་ལ། ད་འོངས་དང་། ངེད་གཉིས་ཕ་རོལ་དུ་ཡོད་པའི་མདུན་ལྤགས་མ་བཅད་པ་རྣམས་ཀྱི་སོ་པའི་ཚོགས་ཀྱི་རྩར་འགྲོ་བར་བྱ། ཡ་ཧོ་ཝཱས་ངེད་ཀྱི་དོན་དུ་ཕྲིན་ལས་མཛད་པར་བྱ། མང་བའམ་ཉུང་བའི་སྒོ་ནས་སྐྱབས་མཛད་པར་ཡ་ཧོ་ཝཱའི་དྲུང་དུ་གཅིག་པའོ། ཞེས་སྨྲས་པས། ༧ གོ་ཁྲབ་འཁུར་བའི་ཁྱེའུ་དེས། ཁྱེད་ཀྱི་ཐུགས་ལ་གང་ཡོད་པ་དེ་བཞིན་དུ་མཛོད་ཅིག ད་གཟིགས་ཤིག ཁྱེད་ཀྱི་སྙིང་གིས་སྟོན་པ་བཞིན་དུ་བདག་ནི་ཁྱེད་དང་བཅས་སུ་འགྲོ་བར་བྱ། ཞེས་ཞུས་ནས། ༨ ཡོ་ན་ཐན་གྱིས། ད་ལྟོས། ངེད་གཉིས་མི་དེ་རྣམས་ཀྱི་མདུན་དུ་སོང་སྟེ། ངེད་སུ་ཡིན་སྟོན་པར་བྱ། ༩ གལ་ཏེ་དེ་དག་གིས། ང་ཚོ་འོང་བའི་བར་དུ་སྲིང་ཞིག་ཟེར་ན། ངེད་གཉིས་དེ་དག་གི་མདུན་དུ་མ་སོང་སྟེ། འདུག་པའི་ས་གནས་སུ་སྡོད་པར་འགྱུར། ༡༠ གལ་ཏེ་དེ་དག་གིས། ང་ཚོའི་མདུན་དུ་གྱེན་དུ་འོང་ཞིག་ཅེས་ཟེར་ན། གཏམ་དེ་ནི་ཡ་ཧོ་ཝཱས་དེ་དག་ངེད་གཉིས་ཀྱི་ལག་ཏུ་གནང་བའི་རྟགས་ཤིག་ཡིན་པས། ངེད་གཉིས་དེ་རུ་འགྲོ་བར་བྱ། སྨྲས་སོ། ༡༡ དེ་ནས་དེ་གཉིས་ཀྱིས་ཕེ་ལེ་ཤེད་པའི་སོ་པ་རྣམས་ལ་རང་གི་ལུས་བསྟན་ནས། ཕེ་ལེ་ཤེད་པ་རྣམས་ཀྱིས། ད་ལྟོས་ཤིག ས་ཁུང་ན་ཡིབ་སྟེ་ཡོད་པའི་ཨིབ་རི་པ་རྣམས་འཐོན་ནོ་ཞེས་སྨྲས་སོ། ༡༢ དེ་ནས་སོ་པ་རྣམས་ཀྱིས་ཡོ་ན་ཐན་དང་དེའི་གོ་ཁྲབ་འཁུར་བའི་ཁྱེའུ་ལ། ང་ཚོའི་མདུན་དུ་གྱེན་དུ་འོང་ཞིག ང་ཚོས་ཁྱོད་གཉིས་ལ་ཁྲིམས་སྟོན་པར་བྱ་ཞེས་ཟེར་བས། ཡོ་ན་ཐན་གྱིས་གོ་ཁྲབ་འཁུར་མཁན་ལ། ཡ་ཧོ་ཝཱས་མི་དེ་ཐམས་ཅད་ཨིས་ར་ཨེལ་གྱི་ལག་ཏུ་གནང་བའི་ཕྱིར་ཁྱོད་ངའི་རྗེས་སུ་འབྲངས་ཏེ་འོང་ཞེས་བསྐུལ་ཏོ། ༡༣ དེ་ནས་ཡོ་ན་ཐན་གོག་སྟེ་རི་དེའི་གྱེན་དུ་འཛེགས་ཏེ། གོ་ཁྲབ་འཁུར་མཁན་དེ་རྗེས་སུ་འབྲངས་སོ། དེ་རུ་ཕེ་ལེ་ཤེད་པ་རྣམས་ཡོ་ན་ཐན་གྱི་མདུན་དུ་གྱེལ་ཏེ། གོ་ཁྲབ་འཁུར་མཁན་དེས་འབྲངས་ཏེ་བསད་དོ། ༡༤ མི་གསོད་དེ་ནི་ཡོ་ན་ཐན་དང་གོ་ཁྲབ་འཁུར་མཁན་དེའི་འཐབ་འཁྲུག་དང་པོ་ཡིན་ཏེ། མདའ་དང་ཞིང་གི་རྡོ་བའི་སྒོ་ནས་བསད་པའི་མིའི་གྲངས་ནི་ཉི་ཤུ་ཙམ་ཡོད་པ་ཡིན། ༡༥ དེ་རུ་ཞིང་གི་དམག་སྒར་དང་། མི་རྣམས་དང་། སོ་པ་དང་། འཛོམས་པ་རྣམས་འཇིགས་སྐྲག་པར་གྱུར་ཏེ། ས་ཡང་འགུལ་བས། དཀོན་མཆོག་གིས་གནང་བའི་འཇིགས་སྐྲག་དེ་ནི་དྲག་པོར་གྱུར་ཏོ༎

༡༦ དེ་ནས་བེན་ཡ་མིན་གྱི་གི་བེ་ཨ་ནས་ཤ་ཨུལ་གྱི་སོ་པ་རྣམས་ཀྱིས་བལྟས་པས། དམག་ཚོགས་མེད་པར་འགྱུར་བ་དང་། ཕར་ཚུར་རྒྱུག་པར་མཐོང་ངོ་། ༡༧ ཤ་ཨུལ་གྱིས་དྲུང་དུ་ཡོད་པའི་མི་རྣམས་ལ། ད་རྩིས་ཤིག་དང་། ངེད་རྣམས་ཀྱི་ཕྱོགས་ནས་སུ་སོང་ངོ་མཐོང་བར་འགྱུར་བསྒོ་བས། རྩིས་ཟིན་ཏེ། ཡོ་ན་ཐན་དང་དེའི་གོ་ཁྲབ་འཁུར་བའི་ཁྱེའུ་གཉིས་མི་འདུག་པར་ཤེས་སོ། ༡༨ དེར་ཤ་ཨུལ་གྱིས་ཨ་ཧི་ཡཱ་ལ། དཀོན་མཆོག་གི་སྒྲོམ་འདི་རུ་ཁུར་ཤོག་ཅེས་བཀའ་སྩལ་ཏོ། དེའི་དུས་སུ་དཀོན་མཆོག་གི་སྒྲོམ་ཨིས་ར་ཨེལ་པའི་ཁྲོད་དུ་ཡོད་པ་ཡིན།

༡༩ ཡང་ཤ་ཨུལ་གྱིས་བླ་མ་ལ་གཏམ་གླེང་བའི་ཚེ། ཕེ་ལེ་ཤེད་པའི་དམག་སྒར་གྱི་ནང་ནས་སྐད་དྲག་པོ་འབྱུང་གིན་འབྱུང་གིན་འཕེལ་བར་གྱུར་བས། ཤ་ཨུལ་གྱིས་བླ་མ་དེ་ལ། ཁྱོད་ཀྱི་ལག་པ་ཞོག་ཅིག་ཅེས་བཀའ་སྩལ་ནས། ༢༠ ཤ་ཨུལ་དང་དེ་དང་བཅས་སུ་ཡོད་པའི་མི་རྣམས་འཛོམ་སྟེ། དམག་རྒྱབ་ཏུ་སོང་ངོ་། དེ་རུ་རྡབ་པ་ཆེན་པོ་ཞིག་བྱུང་བས། ཀྱེ་ཧོ། མི་ཐམས་ཅད་ཀྱིས་རང་རང་གི་རལ་གྲི་གཞན་གྱི་ཕྱོགས་སུ་འདེབས་པར་གྱུར་ཏོ། ༢༡ ཡང་དུས་ཡུན་རིང་ཞིག་ནས་ཕེ་ལེ་ཤེད་པ་ལ་གཏོགས་པ་དང་། དེ་དང་མཉམ་དུ་དམག་ཏུ་འོང་བའི་ཨིབ་རི་པ་རྣམས་ནི་ཨིས་ར་ཨེལ་པ་དང་ཤ་ཨུལ་དང་ཡོ་ན་ཐན་གྱི་ཕྱོགས་སུ་གྱུར་ཏོ། ༢༢ ཡང་རི་ཨེབ་ར་ཨིམ་གྱི་ནང་ན་ཡིབ་སྟེ་ཡོད་པའི་ཨིས་ར་ཨེལ་པ་རྣམས་ཀྱིས། ཕེ་ལེ་ཤེད་པ་ཐམས་ཅད་བྲོས་སོ་ཞེས་ཐོས་པས། དེ་དག་ཀྱང་དམག་རྒྱབ་ཅིང་ཕེ་ལེ་ཤེད་པའི་རྗེས་སུ་འདེད་པར་སོང་ངོ་། ༢༣ དེ་ལྟར་ཡ་ཧོ་ཝཱས་ཨིས་ར་ཨེལ་སྒྲོལ་བར་མཛད་དེ། གསོད་གཅོད་དེ་ནི་བེད་ཨ་ཝེན་གྱི་བར་དུ་བྱུང་ངོ་༎

༢༤ དེའི་ཉིན་པར་ཨིས་ར་ཨེལ་པ་རྣམས་ངལ་ཀྱང་། ཤ་ཨུལ་གྱིས་མི་བརྒྱུད་དེ་ལ། མི་ཞིག་གིས་ནུབ་མོའམ། ངས་རང་གི་དགྲ་བོ་རྣམས་ལ་ལན་ངན་འདེབས་པའི་བར་དུ་བག་ལེབ་ཅིག་ཟ་ན། མི་དེ་ལ་བཀྲ་མི་ཤིས། ཤེས་པའི་མནའ་བསྐྱེལ་བས། མི་རྣམས་ཀྱིས་གང་ཡང་མ་བཟས་སོ། ༢༥ མི་རྣམས་ནི་ནགས་ཚལ་ཞིག་ཏུ་སོང་སྟེ། དེ་རུ་སའི་ཁར་སྦྲང་རྩི་ཡོད་པ་ཡིན། ༢༦ དེ་ནས་མི་རྣམས་ནགས་ཚལ་དེའི་ནང་དུ་བྱོན་ཏེ། སྦྲང་མ་འཐོན་ཏེ་མཐོང་ན་ཡང་། མནའ་དེ་ལ་འཇིགས་པས། མི་སུས་ཀྱང་རང་གི་ལག་པ་ཁ་རུ་མ་རེག་གོ། ༢༧ ཡོ་ན་ཐན་གྱིས། རང་གི་ཕས་མི་རྣམས་ལ་མནའ་བོར་བར་མ་ཐོས་བས། རང་གི་ལག་ཏུ་ཡོད་པའི་དབྱུག་པའི་རྩེ་མོ་སྦྲང་རྩིའི་ཚང་གི་ནང་དུ་བཅུག་སྟེ། རང་གི་ལག་པས་ཁ་རུ་རེག་པ་དང་། དེའི་མིག་གསལ་བར་གྱུར་ཏོ། ༢༨ དེ་རུ་མི་བརྒྱུད་ཀྱི་ནང་ནས་གཅིག་གིས། མི་ཐམས་ཅད་ངལ་ན་ཡང་། ཁྱེད་ཀྱི་ཡབ་ཀྱིས་མི་རྣམས་ལ་མནའ་སྐྱེལ་ཞིང་དེ་དག་ལ། དེ་རིང་གི་ཉིན་པར་ལྟོ་ཟ་བའི་མི་དེ་ལ་བཀྲ་མི་ཤིས་སྨྲས་སོ། ༢༩ ཞེས་ཞུས་པའི་ལན་དུ་ཡོ་ན་ཐན་གྱིས། ངའི་ཕས་ཡུལ་ཐམས་ཅད་ལ་ཚེར་བར་བཅུག་གོ། ད་ལྟོས་ཤིག ངས་སྦྲང་རྩི་ཕྲན་བུ་ཞིག་མྱངས་པས། མིག་ཅི་ལྟར་གསལ་བར་གྱུར། ༣༠ གལ་ཏེ་མི་ཐམས་ཅད་ཀྱིས་དགྲ་བོས་སྤངས་པའི་ལྟོ་ནས་བཟོས་པ་ཡིན་ན། ཕེ་ལེ་ཤེད་པ་འཕམ་པར་འགྱུར་བ་ནི། འདི་ལས་ལྷག་པར་ཆེ་བར་གྱུར་བ་མ་ཡིན་ནམ་ཞེས་སྨྲས་སོ༎

༣༡ མི་ཐམས་ཅད་ཤིན་ཏུ་ངལ་ཀྱང་། ཉིན་དེ་ལ་ཕེ་ལེ་ཤེད་པ་མིག་མས་ནས་ཨ་ཡ་ལོན་གྱི་བར་དུ་ཕམ་མོ། ༣༢ དེ་ནས་མི་རྣམས་ཀྱིས་དེ་དག་གི་ནོར་བཅོམ་སྟེ། ལུག་དང་། བ་གླང་དང་། བེ་ཏོ་ཁྱེར་ཞིང་། ས་དེ་རུ་བསད་ནས། ཁྲག་དང་མཉམ་དུ་བཟོས་སོ། ༣༣ དེར་མི་འགའ་ཞིག་གིས་ཤ་ཨུལ་ལ། མི་རྣམས་ཀྱིས་ཁྲག་དང་མཉམ་དུ་ཤ་ཟ་ཞིང་། ཡ་ཧོ་ཝཱའི་དྲུང་དུ་སྡིག་པ་བྱེད་དོ། ཞེས་སྤྲིངས་པས། ཤ་ཨུལ་གྱིས། ཁྱོད་རྣམས་ཀྱིས་སྡིག་པ་བྱེད། ད་རྡོ་བ་ཆེན་པོ་ཞིག་ངའི་མདུན་དུ་སྒྲིལ་ཞིག ༣༤ དེ་ནས་ཤ་ཨུལ་གྱིས། ཁྱོད་ཅག་མི་རྣམས་ཀྱི་ཁྲོད་དུ་སོང་སྟེ། མི་རྣམས་ལ། མི་རེ་རེས་རང་གི་བ་གླང་ངམ་ལུག་ཁྲིད་དེ། འདི་རུ་བསད་ནས་ཟོས་ཤིག ཁྲག་དང་མཉམ་དུ་ཟ་ཞིང་། ཡ་ཧོ་ཝཱའི་དྲུང་དུ་སྡིག་པ་མ་བྱེད། ཅེས་སྐུལ་ཅིག དེའི་ཕྱིར་མི་རྣམས་ཀྱིས་རེ་རང་གི་བ་གླང་ཁྲིད་དེ། མཚན་གྱི་དུས་སུ་དེ་རུ་བསད་དོ། ༣༥ དེ་ནས་ཤ་ཨུལ་གྱིས་ཡ་ཧོ་ཝཱ་ལ་མཆོད་ཁྲི་ཞིག་བརྩིགས་སོ། དེ་ནི་ཤ་ཨུལ་གྱིས་ཡ་ཧོ་ཝཱ་ལ་བརྩིགས་པའི་མཆོད་ཁྲི་དང་པོ་ལགས་སོ༎

༣༦ དེ་ནས་ཤ་ཨུལ་གྱིས། མཚན་གྱི་དུས་སུ་ཕེ་ལེ་ཤེད་པའི་རྗེས་སུ་འདེད་ཅིང་། ཐོ་རངས་ཀྱི་བར་དུ་བཅོམ་སྟེ། དེ་དག་གི་ནང་ནས་མི་གཅིག་ཀྱང་ཐར་དུ་མ་ཆུག་ཅིག་ཅེས་བསྐུལ་བས། མི་ཐམས་ཅད་ཀྱིས། ཁྱེད་ཀྱི་སྤྱན་དྲུང་དུ་བཟང་པོ་གང་ལགས། དེ་བཞིན་དུ་མཛོད་ཅིག་ཅེས་ཞུས་སོ། དེར་བླ་མས། ད་ལྟ་ངེད་རྣམས་དཀོན་མཆོག་གི་དྲུང་དུ་འདུས་ཤིག་ཅེས་བསྐུལ་བས། ༣༧ ཤ་ཨུལ་གྱིས་དཀོན་མཆོག་ལ། བདག་ནི་ཕེ་ལེ་ཤེད་པའི་རྗེས་སུ་འདེད་པར་རུང་ངམ། ཁྱེད་ཀྱིས་དེ་དག་ཨིས་ར་ཨེལ་གྱི་ལག་ཏུ་གནང་བར་མཛད་དམ་ཞེས་ཞུས་ཀྱང་། ཉིན་དེ་ལ་གསུང་ལན་གང་ཡང་མ་བྱུང་ངོ་། ༣༨ དེའི་ཕྱིར་ཤ་ཨུལ་གྱིས། དེ་རིང་བྱུང་བའི་ཉེས་སྡིག་ཆེ་བ་ནི་གང་དུ་བྱུང་ལྟ་ཞིང་རྟོགས་པའི་ཕྱིར། མི་བརྒྱུད་ཀྱི་རྗེ་བོ་རྣམས་འདིར་འཛོམ་ཞིག ༣༩ ཡ་ཧོ་ཝཱ་ཨིས་ར་ཨེལ་གྱི་སྐྱབས་མགོན་གསོན་པོར་བཞུགས་པར་ངེས་པའི་ཕྱིར། མི་དེ་ནི་ཡོ་ན་ཐན་ང་རང་གི་བུ་ཡིན་ན་ཡང་། ཁོ་ངེས་པར་འཆི་བར་འགྱུར། ཞེས་སྨྲས་ཀྱང་། མི་བརྒྱུད་ཀྱི་ནང་ནས་མི་གཅིག་གིས་ཀྱང་ལན་མ་ཞུས་སོ། ༤༠ དེ་ནས་ཁོང་གིས་ཨིས་ར་ཨེལ་ཐམས་ཅད་ལ། ཁྱོད་རྣམས་ཕྱོགས་གཅིག་ཏུ་སྡོད་ཅིག་དང་། ང་རང་དང་། རང་གི་བུ་ཡོ་ན་ཐན་ཡང་ཕྱོགས་གཅིག་ཏུ་སྡོད་པར་བྱ་ཞེས་སྨྲས་པས། མི་རྣམས་ཀྱིས་ཤ་ཨུལ་ལ། ཁྱེད་ཀྱི་སྤྱན་དྲུང་དུ་བཟང་པོ་གང་ལགས། དེ་བཞིན་དུ་མཛོད་ཅིག་ཅེས་ཞུས་སོ། ༤༡ དེའི་ཕྱིར་ཤ་ཨུལ་གྱིས་ཡ་ཧོ་ཝཱ་ཨིས་ར་ཨེལ་གྱི་དཀོན་མཆོག་ལ། ངེས་པར་རྟོགས་པར་གནོང་ཞིག་ཅེས་ཞུས་ཤིང་། རྟགས་རིལ་བརྒྱབ་ནས། ཤ་ཨུལ་དང་ཡོ་ན་ཐན་གཉིས་ལ་བབས་ཏེ། མི་རྣམས་ཐར་རོ། ༤༢ དེར་ཤ་ཨུལ་གྱིས། ད་ལྟ་ངའི་བུ་ཡོ་ན་ཐན་དང་ང་རང་གཉིས་ཀྱི་བར་དུ་རྟགས་རིལ་རྒྱོབ་ཅིག་སྨྲས་ནས། ཡོ་ན་ཐན་ལ་བབ་བོ༎

༤༣ དེར་ཤ་ཨུལ་གྱིས་ཡོ་ན་ཐན་ལ། ཁྱོད་ཀྱིས་ཅི་བྱས་པ་ཡིན་ང་ལ་ཤོད་ཅེས་སྨྲས་པས། ཡོ་ན་ཐན་གྱིས་བཤད་དེ་ཁོང་ལ། ངས་ནི་རང་གི་ལག་ཏུ་ཡོད་པའི་དབྱུག་པའི་རྩེ་མོ་ལ་སྦྱར་བའི་སྦྲང་རྩི་ནས་ཅུང་ཟད་ཅིག་མྱངས་པས། ང་འཆི་བར་ངེས་སོ་ཞེས་ཞུས་སོ། ༤༤ དེ་ནས་ཤ་ཨུལ་གྱིས། དཀོན་མཆོག་གིས་འདི་ལྟ་བུའམ་དེ་ལས་ལྷག་པ་ཞིག་མཛད་ཀྱང་། ཀྱེ་ཡོ་ན་ཐན། ཁྱོད་ནི་འཆི་བར་ངེས་སོ་ཞེས་སྨྲས་སོ། ༤༥ དེའི་ཕྱིར་མི་རྣམས་ཀྱིས་ཤ་ཨུལ་ལ། ཡོ་ན་ཐན་་ཨིས་ར་ཨེལ་ལ་སྐྱབས་ཆེ་བ་མཛད་མཁན་དེ་ནི་འཆི་བར་འགྱུར་རམ། དཀོན་མཆོག་གིས་དེ་ལྟར་འབྱུང་བར་མ་གནོང་ཞིག ཡ་ཧོ་ཝཱ་གསོན་པོ་ལགས་པའི་ཕྱིར། དེའི་མགོའི་སྐྲ་ཉག་གཅིག་ཀྱང་ས་རུ་འབུད་པར་མ་གྱུར་ཅིག ཁོང་གིས་དེ་རིང་གི་ཉིན་པར་དཀོན་མཆོག་དང་བཅས་སུ་འཕྲིན་ལས་མཛད་དོ་ཞེས་ཞུས་པས། མི་བརྒྱུད་ཀྱིས་ཡོ་ན་ཐན་འཆི་བ་ལས་ཐར་དུ་བཅུག་གོ། ༤༦ དེ་ནས་ཤ་ཨུལ་་ཕེ་ལེ་ཤེད་པའི་ཕྱི་བཞིན་འདེད་པ་ནས་ལོག་སྟེ་ཕྱིན་པ་དང་། ཕེ་ལེ་ཤེད་པ་རྣམས་རང་གི་ཡུལ་དུ་སོང་ངོ་༎

༤༧ དེ་ལྟར་ཤ་ཨུལ་ལ་ཨིས་ར་ཨེལ་གྱི་རྒྱལ་སྲིད་ཀྱི་དབང་ཐོབ་སྟེ། ཕྱོགས་བཞི་རུ་གནས་པའི་དགྲ་བོ། མོ་ཨབ་དང་། ཨམ་མོན་གྱི་བུ་རྣམས་དང་། ཨེ་དོམ་དང་། ཙོ་བཱ་ཡི་རྒྱལ་པོ་དང་། ཕེ་ལེ་ཤེད་པ། དེ་ཐམས་ཅད་ལ་དམག་དྲངས་སོ། གང་དུ་ཕེབས་པ་དེར་རྒྱལ་ཏོ། ༤༨ ཡང་ཤ་ཨུལ་གྱིས་སྤོབས་པ་སྐྱེད་ཅིང་། ཨ་མ་ལེག་པ་རྣམས་ལས་རྒྱལ་བར་གྱུར་ཏེ། ཨིས་ར་ཨེལ་བཅོམ་པའི་ལག་ནས་བསྒྲལ་ལོ༎

༤༩ ཤ་ཨུལ་གྱི་སྲས་རྣམས་ནི། ཡོ་ན་ཐན་དང་། ཡི་ཤ་ཝི་དང་། མལ་ཀི་ཤུ་ཨ་གསུམ་ཡོད་པ་ཡིན། ཡང་ཁོང་གི་སྲས་མོ་གཉིས་ནི། སྔོན་སྐྱེས་ཀྱི་མིང་ནི་མེ་རཱབ་དང་། ནུ་མོའི་མིང་ནི་མི་ཁལ་བྱ་བའོ། ༥༠ ཤ་ཨུལ་གྱི་ཆུང་གྲོགས་ཀྱི་མིང་ཨ་ཧི་ནོ་ཨམ་ཞེས་བྱ་བ་དེ་ནི་ཨ་ཧི་མ་ཨས་ཀྱི་སྲས་མོ་ཡིན་ནོ། དམག་ཚོགས་ཀྱི་དཔོན་པོའི་མིང་ཨབ་ནེར་ཞེས་བྱ་བ་དེ་ནི་ཤ་ཨུལ་གྱི་ཞང་པོ་ནེར་གྱི་བུ་ཡིན་ནོ། ༥༡ ཤ་ཨུལ་གྱི་ཕ་ཀིས་དང་། ཨབ་ནེར་གྱི་ཕ་ནེར་བྱ་བ་དེ་གཉིས་ཨ་བི་ཨེལ་གྱི་བུ་ཡོད་པ་ཡིན།

༥༢ ཤ་ཨུལ་གྱི་ཚེའི་དུས་སུ་ཕེ་ལེ་ཤེད་པ་དང་དམག་དྲག་པོ་གཏོང་དགོས་བྱུང་ངོ་། ཤ་ཨུལ་གྱིས་མི་ལུས་སྟོབས་ཆེ་བའམ་སྙིང་རུས་ཅན་ཞིག་མཐོང་ན། མི་དེ་རང་དང་མཉམ་དུ་ཁྲིད་པར་བྱས་སོ༎