དེ་ནས་ཤ་མུ་ཨེལ་གྱིས་སྣུམ་གྱི་སྣོད་ཅིག་བླང་ནས། ཤ་ཨུལ་གྱི་མགོ་ལ་བླུག་སྟེ། འོ་བྱས་ཤིང་སྨྲས་པ། ཡ་ཧོ་ཝཱས་ཁྱོད་ནི་ཁོང་ཉིད་ཀྱི་མི་བརྒྱུད་ཀྱི་རྗེ་དཔོན་དུ་བྱུགས་པར་མ་མཛད་དམ། ཁྱོད་ཀྱིས་ཡ་ཧོ་ཝཱའི་མི་བརྒྱུད་ཀྱི་ཐོག་ཏུ་དབང་བྱས་ཏེ། དགྲ་བོ་ཐམས་ཅད་ཀྱི་ལག་ནས་སྒྲོལ་བར་བྱའོ། ༢ ཡང་ཁྱོད་ཀྱིས་བདེན་པར་ཡ་ཧོ་ཝཱའི་མི་བརྒྱུད་ལ་དབང་བྱེད་པའི་རྟགས་འདི་ཡིན། དེ་རིང་ཁྱོད་ངའི་མདུན་ནས་ཕྱིན་ནས་བེན་ཡ་མིན་གྱི་ས་མཚམས་ཀྱི་ཙེལ་ཙཱ་རུ། ར་ཧེལ་གྱི་དུར་ས་ཡི་གནས་སུ་མི་གཉིས་དང་འཕྲད་ནས། དེ་གཉིས་ཀྱིས་ཁྱོད་ལ། ཁྱོད་ཀྱིས་བཙལ་བའི་བོང་བུ་རྣམས་བརྙེད་ཟིན། ཡང་ལྟོས་ཤིག ཁྱོད་ཀྱི་ཕ་ནི་བོང་བུའི་ཕྱིར་ཚེར་ཟིན་ནས། ངའི་བུའི་ཕྱིར་ཅི་ལྟར་བྱ་ཞེས་འབོད་ཀྱིན་དང་འཚེར་རོ། སྨྲ་བར་བྱ། ༣ གནས་དེ་ནས་ཁྱོད་ཕྱིན་ནས། ཐ་བོར་གྱི་བེ་ཤིང་གི་མདུན་དུ་སླེབ་པར་ཙམ་གྱིས། བེད་ཨེལ་གྱི་ཕྱོགས་སུ་དཀོན་མཆོག་ལ་ཞུ་བར་འགྲོ་བའི་མི་གསུམ་དང་འཕྲད་པར་འགྱུར། མི་དེ་གསུམ་གྱི་ནང་ནས་གཅིག་གིས་རི་གུ་གསུམ། གཞན་དེས་བག་ལེབ་གསུམ་དང་། གསུམ་པས་རྒུན་ཆང་གི་རྐྱལ་པ་ཞིག་འཁུར་འོང་བར་བྱ། ༤ དེ་དག་གིས་ཁྱོད་ལ་ཁམས་བཟང་ངམ་ཞེས་ཞུས་ནས། བག་ལེབ་གཉིས་འབུལ་བ་དང་། ཁྱོད་ཀྱིས་དེ་དག་གི་ལག་ནས་ལེན་པར་རུང་ངོ་། ༥ དེ་ནས་ཁྱོད་ཕེ་ལེ་ཤེད་པའི་སོ་པ་ཡོད་པའི་ལྷ་རིའི་མདུན་དུ་སླེབ་ནས། དེ་རུ་གྲོང་ཁྱེར་དུ་འགྲོ་བར་ཙམ་གྱིས། ལུང་སྟོན་པའི་ཚོགས་གནས་མཐོ་བ་ནས་འབབ་པ་ཞིག་དང་འཕྲད་པར་འགྱུར། དེ་དག་གིས་པི་ཝང་དང་རྔ་དང་གླིང་བུ་དང་སྒྲ་སྙན་འཁྲོལ་ཞིང་ལུང་སྟོན་པར་བྱ། ༦ ཡང་ཡ་ཧོ་ཝཱའི་ཐུགས་ཉིད་དབང་དང་ལྡན་པར་ཁྱོད་ལ་འབབ་ནས། དེ་དག་དང་བཅས་སུ་ལུང་སྟོན་ཞིང་། ཁྱོད་མི་གསར་པ་ཞིག་ཏུ་འགྱུར་བར་འགྱུར། ༧ ཡང་ངས་ཁྱོད་ལ་བསྟན་པའི་རྟགས་དེ་རྣམས་འགྲུབ་པའི་ཚེ། དཀོན་མཆོག་ཁྱོད་དང་མཉམ་དུ་བཞུགས་པས། ཁྱོད་ལ་བྱུང་བ་བཞིན་བྱོས་ཤིག ༨ ཁྱོད་ངའི་སྔོན་དུ་གིལ་གལ་དུ་སོང་ཞིག་དང་། ཀྱེ་ཧོ། ངས་དེ་རུ་སྦྱིན་སྲེག་འབུལ་བ་དང་། ཞི་བདེའི་མཆོད་པ་འབུལ་བའི་ཕྱིར་ཁྱོད་ཀྱི་མདུན་དུ་འོང་བར་འགྱུར། ང་ཁྱོད་ཀྱི་མདུན་དུ་མ་སླེབ་པའི་བར་དུ་ཞག་བདུན་སྒུག་དགོས། དེ་ནས་ཁྱོད་ཀྱིས་ཅི་བྱ་བར་འོས་པ་དེ་ངས་སྟོན་པར་བྱའོ་ཞེས་གསུངས་སོ༎