ཡ་ཧོ་ཝཱའི་སྒྲོམ་ནི་ཟླ་བ་བདུན་གྱི་བར་དུ་ཕེ་ལེ་ཤེད་པའི་ཡུལ་དུ་ཡོད་པ་ཡིན། ༢ དེ་ནས་ཕེ་ལེ་ཤེད་པས་བླ་མ་དང་ལྷ་པ་རྣམས་ལ་བོས་ནས་དེ་དག་ལ། ཡ་ཧོ་ཝཱའི་སྒྲོམ་དེ་དང་ངེད་རྣམས་ཀྱིས་ཅི་བྱ། རང་གི་གནས་སུ་ཇི་ལྟར་གཏོང་བར་བྱ་སྟོན་ཅིག ༣ ཡང་དེ་དག་གིས། གལ་ཏེ་ཁྱོད་རྣམས་ཀྱིས་ཨིས་ར་ཨེལ་གྱི་དཀོན་མཆོག་གི་སྒྲོམ་གཏོང་ན། སྟོང་པར་མ་གཏོང་ཞིག ཉེས་པའི་མཆོད་པ་ཞིག་མཉམ་དུ་ཐོང་ཞིག དེ་ནས་ཁྱོད་རྣམས་ཀྱི་ནད་གསོས་པར་འགྱུར་ཏེ། ཁོང་གི་ཕྱག་ནི་ཁྱོད་རྣམས་ནས་ཅིའི་ཕྱིར་ད་དུང་མ་འཐེན་པ་ཤེས་པར་འགྱུར། ༤ དེ་དག་གིས་སྡིག་པའི་ཕྱིར་འབུལ་འོས་པའི་མཆོད་པ་དེ་ཅི་ཞིག་ཡིན། ཅེས་འདྲིས་པའི་ལན་དུ་དེ་རྣམས་ཀྱིས། ཕེ་ལེ་ཤེད་པའི་དཔོན་པོ་རྣམས་ཀྱི་གྲངས་བཞིན་དུ། གསེར་ནས་བཟོས་པའི་ཤ་བུར་ལྔ་དང་། གསེར་ནས་བཟོས་པའི་བྱི་བ་ལྔ་ཕུལ་ཞིག དེ་ཅིའི་ཕྱིར་ཞེ་ན། ཁྱོད་རྣམས་དང་ཁྱོད་རྣམས་ཀྱི་དཔོན་པོ་རྣམས་ལ་ཕོག་པའི་ནད་ཡམས་གཅིག་རང་ཡིན། ༥ དེའི་ཕྱིར་ཁྱོད་རྣམས་ཀྱི་ཤ་བུར་དང་། ཡུལ་འདི་འཇིག་པར་བྱེད་པའི་བྱི་བའི་འདྲ་བཟོས་ནས། ཨིས་ར་ཨེལ་གྱི་དཀོན་མཆོག་ལ་སྟོད་པ་ཕུལ་ཞིག དེའི་སྒོ་ནས་ཁོང་ཉིད་ཀྱི་ཕྱག་ནི་ཁྱོད་རྣམས་དང་། ཁྱོད་རྣམས་ཀྱི་སྐུ་འདྲ་དང་། ཁྱོད་རྣམས་ཀྱི་ཡུལ་ནས་འཐེན་པར་འགྱུར། ༦ མི་སེར་པ་དང་རྒྱལ་པོ་ཕར་ཨོ་དེ་རྣམས་ཀྱིས་སྙིང་གྱོང་པོ་བྱས་པ་ལྟར། ཁྱོད་རྣམས་ཀྱིས་ཅིའི་ཕྱིར་སྙིང་གྱོང་པོ་བྱེད། ཁོང་གིས་ཕྲིན་ལས་ཡ་མཚན་ཅན་མཛད་ནས། དེ་དག་གིས་མི་བརྒྱུད་འགྲོ་མ་བཅུག་གམ། ཁོ་རྣམས་ནི་མ་སོང་ངམ། ༧ དེའི་ཕྱིར་ཤིང་རྟ་གསར་པ་ཞིག་བཟོས་ནས། འོ་མ་ཡོད་པའི་བ་གཉིས། གཉའ་ཤིང་གིས་ད་དུང་མ་གནན་མཁན་གཉིས་ཁྲིད་ནས། བ་གཉིས་པོ་དེ་ཤིང་རྟ་ལ་བཏགས་ཏེ། བེའུ་རྣམས་ཕྱིར་ཁང་པ་ལ་ཁྲིད་ཅིག ༨ ཡ་ཧོ་ཝཱའི་སྒྲོམ་བླང་སྟེ། ཤིང་རྟ་དེའི་ཁར་བཞག་ནས། ཉེས་པའི་མཆོད་པར་འབུལ་འོས་པའི་གསེར་གྱི་རིན་པོ་ཆེ་དེ་རྣམས་ནི་དེའི་ལོགས་སུ་སྒྲོམ་ཞིག་གི་ནང་དུ་བཞག་ནས། འགྲོ་བར་ཆུག་ཅིག ༩ ཡང་ལྟོས་ཤིག གལ་ཏེ་ཤིང་རྟ་དེ་རང་གི་ས་མཚམས་ཀྱི་ལམ་རྒྱུད་དེ་བེད་ཤེ་མེས་ཀྱི་ཕྱོགས་སུ་འགྲོ་ན། ཁོང་ཉིད་ཀྱིས་ངེད་རྣམས་ལ་སྡུག་བསྔལ་ཆེན་པོ་འདི་གནང་བ་ཡིན་པར་ཤེས་ཤིག གལ་ཏེ་དེར་མ་འགྲོ་ན། ཁོང་གི་ཕྱག་གིས་ངེད་རྣམས་ལ་རྡུང་བ་མིན་པར་ངེས་སོ། ངེད་རྣམས་ལ་བྱུང་བའི་འགལ་རྐྱེན་ཞིག་ཡོད་པར་ཤེས་ཤིག ཞེས་སྨྲས་པས།