དེ་ནས་ཕྲུ་གུ་ཤ་མུ་ཨེལ་གྱིས་ཨེ་ལིའི་མདུན་དུ་ཡ་ཧོ་ཝཱ་ལ་ཞབས་ཏོག་བྱས་སོ། དེའི་དུས་སུ་ཡ་ཧོ་ཝཱའི་བཀའ་ནི་དཀོན་པ་ཡིན་ཏེ། ཞལ་གཟིགས་ཀྱང་མངོན་སུམ་དུ་མ་བྱུང་ངོ་། ༢ དེ་ནས་[འདི་ལྟར་བྱུང་ངོ་།]ཨེ་ལི་ནི་རང་གི་མལ་ས་ལ་ཉལ་ཞིང་ཁོའི་མིག་ཤེད་ཉམས་ནས་མཐོང་མ་ཐུབ་པའི་ཚེ་ན། ༣ ཡ་ཧོ་ཝཱའི་མཆོད་ཁང་ན་དཀོན་མཆོག་གི་སྒྲོམ་ཡོད་ས་རུ། དཀོན་མཆོག་གི་སྒྲོན་མེ་བསྣམས་མ་ཟིན་པར། ཤ་མུ་ཨེལ་དེར་གཉིད་ལོག་པའི་ཚེ། ༤ ཡ་ཧོ་ཝཱས། ཤ་མུ་ཨེལ་ཞེས་བཀའ་སྩལ་བས་དེས་ལན་དུ། ང་འདིར་ཡོད་ཞུས་ནས། ༥ ཨེ་ལིའི་མདུན་དུ་བརྒྱུགས་ནས། ང་འདི་རུ་ཡོད། ཁྱེད་ཀྱིས་ང་ལ་བོས་པ་ཡིན། ཞེས་ཞུས་པའི་ལན་དུ་དེས་ནི། ངས་མ་བོས། སླར་ཡང་གཉིད་ལོག་ཏུ་སོང་ཞིག་ཅེས་བསྐུལ་བས། ཁོ་སོང་སྟེ་གཉིད་ལོག་གོ། ༦ ཡ་ཧོ་ཝཱས་སླར་ཡང་ཤ་མུ་ཨེལ་ཅེས་བོས་སོ། ཡང་ཤ་མུ་ཨེལ་ལངས་ནས། ཨེ་ལིའི་མདུན་དུ་སོང་སྟེ། ང་འདི་རུ་ཡོད། ཁྱེད་ཀྱིས་ང་ལ་བོས་པ་ཡིན། ཞེས་ཞུས་སོ། དེས་ལན་དུ། ངའི་བུ། ངས་མ་བོས། སླར་ཡང་གཉིད་ལོག་ཏུ་སོང་ཞིག་ཅེས་བསྒོའོ། ༧ ཤ་མུ་ཨེལ་གྱིས་དེའི་བར་དུ་ཡ་ཧོ་ཝཱ་ངོ་མ་ཕྲོད་པ་མ་ཟད། ཡ་ཧོ་ཝཱའི་བཀའ་ཡང་དེའི་བར་དུ་ཁོ་ལ་མ་བབས་སོ། ༨ ཡང་ལན་གསུམ་པ་རུ་ཡ་ཧོ་ཝཱས་ཤ་མུ་ཨེལ་ལ་བོས་པས། ཁོ་ལངས་ནས། ཨེ་ལིའི་མདུན་དུ་སོང་སྟེ། ང་འདི་རུ་ཡོད། ཁྱེད་ཀྱིས་ང་ལ་བོས་པ་ཡིན་ཞེས་ཞུས་སོ། དེར་ཨེ་ལིས། ཕྲུ་གུ་ལ་འབོད་མཁན་དེ་ནི་ཡ་ཧོ་ཝཱ་ལགས་པར་བརྟགས་སོ། ༩ དེའི་ཕྱིར་ཨེ་ལིས་ཤ་མུ་ཨེལ་ལ། ད་སོང་ལ། ཉལ་ནས་སྡོད། ཕྱིར་ཡང་ཁྱོད་ལ་སྐད་ཅིག་འབྱུང་ཞིང་འབོད་ན། འདི་ལྟར་ཞུས་ཤིག ཀྱེ་ཡ་ཧོ་ཝཱ། གསུང་བར་མཛོད། ཁྱེད་ཀྱི་བྲན་པོས་ཉན་ནོ་ཞེས་སྨྲོས་ཤིག་བསྐུལ་བས། ཤ་མུ་ཨེལ་སོང་སྟེ། རང་གི་མལ་ས་ལ་ཉལ་ཏོ༎