དེའི་ཚེ་ཨིས་ར་ཨེལ་ལ་རྒྱལ་པོ་མེད་པ་ཡིན། ཡང་ཨེབ་ར་ཨིམ་གྱི་རིའི་ཁྲོད་དུ་གནས་པའི་ལེ་ཝི་པ་ཞིག་གིས་བེད་ལེ་ཧེམ་ཡ་ཧུ་དཱ་ནས་ལྐོག་གི་ཆུང་མ་ཞིག་བླངས་ནས། ༢ ལྐོག་གི་ཆུང་མ་དེས་ཁོ་ལ་ལོག་པར་བྱས་ཏེ། ཁོའི་མདུན་ནས་རང་གི་ཕའི་ཁང་པར་བེད་ལེ་ཧེམ་ཡ་ཧུ་དཱ་རུ་སོང་ནས། ཟླ་བ་བཞི་ཧྲིལ་པོར་དེར་གནས་སོ། ༣ དེ་ནས་མོའི་ཁྱོ་ལངས་ཏེ། མོ་ལ་གཏམ་འཇག་པོ་བྱེད་པ་དང་། ལོག་འཁྲིད་པའི་ཕྱིར་མོའི་རྗེས་སུ་སོང་སྟེ། ཁོ་དང་མཉམ་དུ་གཡོག་པོ་ཞིག་དང་བོང་བུ་གཉིས་ཡོད་པ་ཡིན། ཡང་མོས་དེ་ནི་རང་གི་ཕ་ཡི་ཁང་པར་ཁྲིད་དེ། མོའི་ཕས་ཁོ་མཐོང་བ་དང་། ཁོ་དང་འཕྲད་པར་ཤིན་ཏུ་དགའ་བར་གྱུར་ཏོ། ༤ ཁོའི་གྱོས་པོའམ་མོའི་ཕས་ཁོའི་ལག་པ་ནས་བཟུང་ཞིང་། ནང་དུ་ཁྲིད་དེ། དེ་ནི་ཞག་གསུམ་གྱི་བར་དུ་ཁོ་དང་མཉམ་བསྡད་དེ། ཟ་ཞིང་བཏུང་སྟེ། དེར་གནས་སོ། ༥ དེ་ནས་ཞག་བཞི་པ་ལ་དེ་དག་ཤིན་ཏུ་སྔ་དྲོ་ལངས་ཏེ། ཁོ་འགྲོ་བར་བསམས་སོ། དེ་རུ་བུ་མོའི་ཕས་མག་པ་ལ། ཁྱོད་ཀྱིས་རང་གི་སྙིང་བག་ལེབ་ཁམ་གཅིག་གིས་ཚིམ་པར་གྱིས། དེའི་རྗེས་སུ་ལམ་དུ་ཞུགས་ཤིག་བསྐུལ་བས། ༦ དེ་གཉིས་བསྡད་ཅིང་ལྷན་ཅིག་ཏུ་ཟ་ཞིང་འཐུང་ངོ་། དེ་ནས་བུ་མོའི་ཕས་མི་དེ་ལ། སེམས་ཚིམ་པར་མཚན་གང་སྡོད། ཁྱོད་ཀྱི་སྙིང་དགའ་བར་གྱིས་ཤིག་ཅེས་བསྐུལ་ཏོ། ༧ དེ་ནས་མི་དེ་འགྲོ་བར་ལངས་པའི་ཚེ། ཁོའི་གྱོས་པོས་ཁོ་ལ་ཨུ་ཚུགས་བྱས་ནས། ཁོ་དེར་ད་དུང་བསྡད་དོ། ༨ ཡང་ཞག་ལྔ་པར་སྔ་དྲོ་འགྲོ་བའི་ཕྱིར་ལངས་པའི་ཚེ། བུ་མོའི་ཕས་དེ་ལ། ཁྱོད་ཀྱི་སེམས་ཚིམ་པར་གྱིས་ཏེ། ཉི་མ་བཞུད་པའི་བར་དུ་སྡོད་ཅིག་ཅེས་བསྐུལ་བས། གཉིས་ཀས་བཟས་སོ། ༩ ཡང་མི་དེ་དང་ཁོའི་ལྐོག་གི་ཆུང་མ་དང་གཡོག་པོ་འགྲོ་བར་ལངས་པའི་ཚེ། ཁོའི་གྱོས་པོའམ་བུ་མོའི་ཕས་ཁོ་ལ། ལྟོས་ཤིག ད་ཉི་མ་བཞུད་ཀྱི་འདུག ཁྱོད་གཉིས་མཚན་ལ་སྡོད། ལྟོས་ཤིག ཉི་མ་རྒས་ཚར། ཁྱོད་ཀྱི་སྙིང་དགའ་བའི་ཕྱིར་མཚན་ལ་འདིར་སྡོད། སང་ཞོག་ཁྱོད་ཀྱི་ཁྱིམ་དུ་འགྲོ་བའི་ཕྱིར་སྔ་དྲོ་ལམ་དུ་ཞུགས་ཤིག་ཅེས་སྨྲས་ཀྱང་།