དེའང་ཡ་ཧོ་ཝཱའི་བྲན་པོ་མོ་ཤེ་ཚེ་འདས་པའི་འོག་ཏུ་ཡ་ཧོ་ཝཱས་མོ་ཤེའི་གཡོག་པོ་ནུན་གྱི་བུ་ཡོ་ཤུ་ཨ་ལ་འདི་སྐད་དུ། ༢ ངའི་བྲན་པོ་མོ་ཤེ་ཤི་བས། ད་ལོང་ལ་ཁྱོད་རང་མི་སྡེ་འདི་ཐམས་ཅད་དང་བཅས་པ་ངས་ཨིས་ར་ཨེལ་གྱི་བུ་རྣམས་ལ་གནང་བར་བྱ་བའི་ཡུལ་དུ་ཡོར་དན་ཆུའི་ཕ་རོལ་དུ་སོང་ཞིག ༣ ངས་མོ་ཤེ་ལ་གསུངས་པ་བཞིན་དུ་ཁྱོད་ཀྱི་རྐང་མཐིལ་གྱིས་ནོན་པའི་ས་ཆ་ཚང་མ་ངས་ཁྱོད་ཅག་ལ་གནང་བ་ཡིན། ༤ འབྲོག་སྟོང་དང་རི་ལི་བ་ནོན་འདི་ནས་བཟུང་ནས་ཡུབ་རཱད་བྱ་བའི་གཙང་པོ་ཆེན་པོ་དང་། ཧེད་པ་རྣམས་ཀྱི་ཡུལ་ཀུན་དང་། ནུབ་ཕྱོགས་སུ་རྒྱ་མཚོ་ཆེན་པོའི་བར་དུ་ཁྱེད་ཀྱི་ས་མཚམས་སླེབ་པར་འགྱུར་རོ། ༥ ཁྱོད་ནམ་འཚོ་བའི་བར་དུ་མི་སུས་ཀྱང་ཁྱོད་ཐུབ་པར་མི་འགྱུར། ང་མོ་ཤེ་དང་འགྲོགས་པ་ལྟར་ཁྱོད་དང་ཡང་འགྲོགས་ཤིང་ངས་རྒྱབ་ཏུ་ཡང་མི་སྐྱུར། ངས་སྤང་བར་ཡང་མི་བྱའོ། ༦ རེམ་ཞིང་སྙིང་རུས་སྐྱེད་ཅིག དེ་ཅིའི་ཕྱིར་ཞེ་ན། ཁྱོད་ཀྱིས་མི་སྡེ་འདི་ལ་ཡུལ་དེ་ས་སྐལ་དུ་གཏོང་བར་བྱ། ཡུལ་གང་ཞེ་ན། ངས་དེ་དག་གི་ཕ་མེས་རྣམས་ལ་གནང་བའི་ཕྱིར་མནའ་བཞེས་པ་དེ་ཡིན་ནོ། ༧ འོན་ཀྱང་ངའི་བྲན་པོ་མོ་ཤེས་ཁྱོད་ལ་བསྒོ་བའི་བཀའ་ཁྲིམས་ཐམས་ཅད་བཞིན་དུ་བྱེད་དུ་ཟོན་བྱེད་པའི་ཕྱིར་ཤིན་ཏུ་རེམ་ཞིང་སྙིང་རུས་སྐྱེད་ཅིག ཁྱོད་གང་དུ་འགྲོ་ནའང་ལས་དོན་འགྲུབ་ཕྱིར་བཀའ་ཁྲིམས་དེ་ལས་གཡས་སུ་ཡང་མ་ལྡོག གཡོན་དུ་ཡང་མ་ལྡོག་ཅིག ༨ བཀའ་ཁྲིམས་ཀྱི་མདོ་འདི་ཁྱོད་ཀྱི་ཁ་ལས་མ་འབྲལ་བར་དེའི་ནང་ན་བྲིས་པ་ཐམས་ཅད་བཞིན་དུ་སྤྱོད་དུ་ཟོན་བྱེད་ཅིང་ཉིན་མཚན་མེད་པར་སྒོམ་ཞིག དེ་བཞིན་དུ་བྱེད་ན་ཁྱོད་ཀྱི་ལམ་དོན་སྒྲུབ་སྟེ། ལས་དོན་ལེགས་པར་འགྲུབ་པར་འགྱུར་རོ། ༩ རེམ་པ་བྱེད་ཅིང་སྙིང་རུས་སྐྱེད་ཅིག་ཅེས་ངས་ཁྱོད་ལ་མ་སྨྲས་སམ། ད་མ་འཇིགས་པར་སྙིང་མ་ཆུང་ཞིག དེ་ཅིའི་ཕྱིར་ཞེ་ན། ཁྱོད་གང་དུ་འགྲོ་ཡང་ང་ཡ་ཧོ་ཝཱ་ཁྱོད་ཀྱི་དཀོན་མཆོག་ཁྱོད་དང་འགྲོགས་སོ་ཞེས་བཀའ་སྩལ་ཏོ༎