ཡོ་ཤུ་ཨ་ཚེ་འདས་པའི་རྗེས་སུ་ཨིས་ར་ཨེལ་གྱི་བུ་རྣམས་ཀྱིས་ཡ་ཧོ་ཝཱ་ལ། ཀ་ན་ཨན་པ་རྣམས་ལ་འཐབ་འཛིང་བྱེད་པའི་ཕྱིར་བདག་ཅག་གི་ནང་ནས་སྔོན་དུ་སུ་འགྲོ་བར་བྱ། ཞེས་ཐུགས་བརྟག་ཞུས་པ་དང་། ༢ ཡ་ཧོ་ཝཱས་གསུངས་པ། ཡ་ཧུ་དཱ་འགྲོ་བར་རུང་། ལྟོས་ཤིག ཡུལ་དེ་ཁོའི་ལག་ཏུ་བཏད་པ་ཡིན་ནོ། ༣ དེར་ཡ་ཧུ་དཱས་རང་གི་སྤུན་ཤིམ་ཨོན་ལ་འདི་སྐད་དུ། ཁྱོད་ང་དང་མཉམ་དུ་ངའི་ས་སྐལ་ཡོད་ས་ལ་ཤོག་ལ། ངེད་གཉིས་ཀྱིས་ཀ་ན་ཨན་པ་རྣམས་ལ་འཐབ་འཛིང་བྱེད་པར་བྱ། དེ་ནས་ང་ཡང་ཁྱོད་དང་མཉམ་དུ་ཁྱོད་ཀྱི་ས་སྐལ་ལ་འགྲོ་བར་འགྱུར། ཞེས་སྨྲས་ནས་ཤིམ་ཨོན་དེ་དང་མཉམ་དུ་ཕྱིན་ཏོ། ༤ ཡང་ཡ་ཧུ་དཱ་ཡར་སོང་ནས། ཡ་ཧོ་ཝཱས་ཀ་ན་ཨན་པ་དང་ཕེ་རི་ཟི་པ་རྣམས་དེ་དག་གི་ལག་ཏུ་གནང་ནས། དེ་དག་གིས་བེ་ཙེག་ཏུ་དམག་མི་ཁྲི་གཅིག་འཕམ་པར་བྱས་སོ། ༥ བེ་ཙེག་ཏུ་ཨ་དོ་ནི་བེ་ཙེག་དང་ཕྲད་པ་ལས། དེ་དང་འཐབ་འཛིང་བྱས་ཏེ། ཀ་ན་ཨན་པ་དང་ཕེ་རི་ཟི་པ་རྣམས་འཕམ་པར་བྱས་སོ། ༦ ཨ་དོ་ནི་བེ་ཙེག་བྲོས་པ་དང་། དེ་དག་རྗེས་སུ་དེད་ཅིང་བཟུང་ནས། རྐང་ལག་གཉིས་ཀྱི་མཐེ་བོ་རྣམས་བཅད་དོ། ༧ དེར་ཨ་དོ་ནི་བེ་ཙེག་གིས་འདི་སྐད་དུ། རྐང་ལག་གཉིས་པོའི་མཐེ་བོ་རྣམས་བཅད་ཡོད་པའི་རྒྱལ་པོ་བདུན་ཅུས་ངའི་རྒྱ་ལྕོག་གི་འོག་ཏུ་ཤའི་དུམ་བུ་བསྒྲུགས་པ་ཡིན། ང་རང་གིས་བྱས་པ་ལྟར་དཀོན་མཆོག་གིས་ང་ལ་ལན་གནང་བྱུང་ཞེས་སྨྲས་སོ། ཡང་དེ་དག་གིས་ཁོ་ཡེ་རུ་ཤ་ལེམ་དུ་ཁྱེར་ནས་དེ་རུ་ཤིའོ༎