དུས་ཤིག་གི་རྗེས་སུ་གྲོ་རྔ་བའི་དུས་སུ། སམ་སོན་གྱིས་ར་ཕྲུག་ཅིག་ཁྲིད་ཅིང་རང་གི་ཆུང་མ་འཕྲད་དུ་སོང་སྟེ་འདི་སྐད་དུ། ང་ནང་དུ་རང་གི་ཆུང་མའི་མདུན་དུ་འགྲོ་བར་དགའ་སྨྲས་ཀྱང་། མོའི་ཕས་ཁོ་ནང་དུ་འགྲོ་བར་མ་བཅུག་གོ། ༢ མོའི་ཕ་ན་རེ། ཁྱོད་ཀྱིས་མོ་ལ་སྡང་བར་བྱེད་ཅེས་ངས་ངེས་པར་བསམས་པ་ཡིན། དེའི་ཕྱིར་ངས་བུ་མོ་དེ་ཁྱོད་ཀྱི་གྲོགས་པོ་ལ་བྱིན་པ་ཡིན། མོའི་ནུ་མོ་དེ་ལས་མཛེས་པ་མི་འདུག་གམ། དེའི་ཚབ་ཏུ་ནུ་མོ་ལེན་ཅིག་བསྐུལ་ཀྱང་། ༣ སམ་སོན་གྱིས་དེ་དག་ལ། ད་ལྟ་ངས་ཕེ་ལེ་ཤེད་པ་རྣམས་ལ་གནོད་པ་སྐྱེལ་ན་ཡང་། ངའི་སྐྱོན་མེད་དོ་ཞེས་སྨྲས་སོ། ༤ ཡང་སམ་སོན་སོང་བ་དང་། ཝ་མོ་གསུམ་བརྒྱ་བཟུང་སྟེ། གཉིས་གཉིས་ཀྱི་གཞུག་གུ་སྦྲེལ་ནས། གཞུག་གུ་གཉིས་ཀྱི་བར་ལ་སྤ་འབར་བཏགས་སོ། ༥ ཡང་ཁོས་སྤ་འབར་རྣམས་བཏག་ཚར་ཏེ། དེ་དག་ཕེ་ལེ་ཤེད་པའི་མ་རྔས་པའི་སྟོན་ཐོག་གི་ནང་དུ་བཏང་བས། ཕོན་པོ་དང་མ་རྔས་པའི་སྙེ་མ་རྣམས་དང་ཁ་སྐྱུར་པོའི་ཤིང་རྣམས་བསྲེགས་སོ། ༦ དེར་ཕེ་ལེ་ཤེད་པ་རྣམས་ཀྱིས། འདི་ནི་སུས་བྱས་ཤེས་འདྲིས་པས་དེ་དག་གིས། སམ་སོན་་ཐིམ་ནཱ་པའི་མག་པས་དེ་ལྟར་བྱས། དེས་ཁོའི་ཆུང་མ་ཕྲོགས་ནས། ཁོའི་གྲོགས་པོ་ལ་བྱིན་ཏོ་ཞེས་ཟེར་བས། ཕེ་ལེ་ཤེད་པ་རྣམས་ཡར་སོང་སྟེ། མོ་དང་དེའི་ཕ་གཉིས་མེར་བསྲེགས་སོ། ༧ དེར་སམ་སོན་གྱིས་དེ་དག་ལ། ཁྱོད་ཅག་གིས་དེ་ལྟར་བྱས་ན། ངས་ད་དུང་ཡང་ལན་མ་འཇལ་བའི་བར་དུ་ངལ་གསོ་བར་མི་བྱ་ཞེས་ཟེར་ཏོ། ༨ ཡང་ཁོས་དེ་དག་གི་བརླ་ཤ་དང་དཔྱི་མགོ་རྣམས་དྲག་པོར་བརྡུངས་ནས་བསད་དེ། མར་སོང་ནས། ཨེ་ཏམ་གྱི་བྲག་ཁུང་དུ་གནས་སོ༎