༢ ཁོས་དེ་དག་ལ། ད་ལྟ་ངས་ཁྱོད་ཅག་གི་ལས་དང་སྡུར་ཏེ་ཅི་བྱས་པ་ཡིན། ཨེབ་ར་ཨིམ་གྱིས་མ་བསྒྲུགས་པའི་རྒུན་འབྲུམ་དེ་ནི་ཨ་བི་ཨེ་སེར་གྱི་རྒུན་འབྲུམ་གྱི་ལོ་ཐོག་ལས་ལེགས་པ་མི་འདུག་གམ། ༣ དཀོན་མཆོག་གིས་མིད་ཨན་གྱི་རྒྱལ་ཕྲན་ཨོ་རེབ་དང་ཟེབ་གཉིས་ཁྱོད་ཅག་གི་ལག་ཏུ་གནང་བས། ཁྱོད་ཅག་གི་ལས་དང་སྡུར་ན། ངས་ཅི་བྱེད་ཐུབ་པ་ཡིན། ཞེས་སྨྲས་པས། དེ་དག་གི་ཁྲོ་བ་ཞི་བར་གྱུར་ཏོ༎

༤ ཡང་གིད་ཡོན་་ཡོར་དན་དུ་འོངས་ནས། ཁོ་རང་དང་ཁོ་དང་མཉམ་ཡོད་པའི་མི་གསུམ་བརྒྱ་དེ་ཕ་རོལ་ཏུ་འཐོན་ཏེ། ཐང་ཆད་ཀྱང་། དེ་དག་དེད་དོ། ༥ དེ་རུ་ཁོས་སུ་ཀོད་པ་རྣམས་ལ། ང་དང་མཉམ་དུ་ཡོད་པའི་མི་རྣམས་ལ་བག་ལེབ་སྟེར་ཞིག ངས་མིད་ཨན་གྱི་རྒྱལ་པོ་ཟེ་བཱ་དང་ཟལ་མུ་ནཱ་གཉིས་ལ་དེད་པས། དེ་དག་ཐང་ཆད་པར་གྱུར་ཏོ་ཞེས་སྨྲས་ཀྱང་།

༦ སུ་ཀོད་ཀྱི་གྲོང་དཔོན་རྣམས་ཀྱིས། བདག་ཅག་གིས་ཁྱོད་ཀྱི་དམག་དཔུང་ལ་བག་ལེབ་སྦྱིན་པ་ལ། ཟེ་བཱ་དང་ཟལ་མུ་ནཱའི་ལག་པ་ད་ལྟ་ཁྱོད་ཀྱི་དབང་དུ་ཡོད་དམ།

༧ ཞེས་འདྲིས་པའི་ལན་དུ་གིད་ཡོན་གྱིས། ཡ་ཧོ་ཝཱས་ཟེ་བཱ་དང་ཟལ་མུ་ནཱ་གཉིས་ངའི་ལག་ཏུ་བཞག་པའི་ཚེ། ངས་ཁྱོད་རྣམས་ཀྱི་ཤ་དེ་ཚེར་རྒོད་དང་སེ་བའི་ཚེར་མ་ཡིས་གཅད་པར་བྱའོ་ཞེས་སྨྲས་ནས། ༨ ཁོ་ཡུལ་དེ་ནས་ཕེ་ནུ་ཨེལ་དུ་སོང་ནས། དེ་དག་ལ་དེ་བཞིན་དུ་སྨྲས་པ་དང་། ཕེ་ནུ་ཨེལ་པ་རྣམས་ཀྱིས་ཁོ་ལ་སུ་ཀོད་པ་རྣམས་ཀྱིས་ལན་བཏབ་པ་ལྟར་ལན་བཏབ་བོ། ༩ དེར་ཁོས་ཕེ་ནུ་ཨེལ་གྱི་མི་རྣམས་ལ། ང་ཁམས་བདེ་བར་ཕྱིར་ལོག་པའི་ཚེ། ངས་མཁར་འདི་འཇིག་པར་བྱ་ཞེས་སྨྲས་སོ༎

༡༠ ཟེ་བཱ་དང་ཟལ་མུ་ནཱ་གཉིས་རང་གི་དམག་ཚོགས་དང་བཅས་ཀར་ཀོར་དུ་གནས་སོ། དེ་དག་གི་གྲངས་ནི། ཤར་ཕྱོགས་པའི་དམག་ཚོགས་ཐམས་ཅད་ལས་ལུས་པའི་མི་ནི་སྟོང་བཅོ་ལྔ་ཙམ་དང་། ཤི་བའི་གྲངས་ནི་མི་འབུམ་གཅིག་དང་སྟོང་ཉི་ཤུ་ཡོད་དེ། དེ་ཐམས་ཅད་ནི་རལ་གྲི་ཐོགས་མཁན་ལགས་སོ། ༡༡ དེ་ནས་གིད་ཡོན་་ནོ་བཱ་དང་ཡོག་བེ་ཧཱ་ཡི་ཤར་ཕྱོགས་ཀྱི་རྒྱ་ལམ་ལ་སོང་སྟེ། དམག་དཔུང་གིས་གཅང་པོ་མ་བྱས་པས། ཁོ་དམག་སྒར་ལ་འོངས་ནས། དེ་དག་འཕམ་པར་བྱས་སོ། ༡༢ ཟེ་བཱ་དང་ཟལ་མུ་ནཱ་བྲོས་ཀྱང་། ཁོས་དེ་དག་དེད་དེ། མིད་ཨན་པའི་རྒྱལ་པོ་ཟེ་བཱ་དང་ཟལ་མུ་ནཱ་གཉིས་བཟུང་ནས། དམག་ཚོགས་ཐམས་ཅད་ཐོར་དུ་བཅུག་གོ།

༡༣ ཉི་མ་མ་འཆར་བའི་དུས་སུ་ཧེ་རེས་ཀྱི་གྱེན་ན་ཡོ་ཨས་ཀྱི་བུ་གིད་ཡོན་དམག་ནས་ལོག་པ་དང་། ༡༤ སུ་ཀོད་པ་རྣམས་ནས་གཞོན་ནུ་ཞིག་བཟུང་ནས། དེ་ལ་དྲི་བ་འདྲིས་པ་དང་། དེས་ཁོའི་དོན་དུ་སུ་ཀོད་ཀྱི་གྲོང་དཔོན་དང་རྒན་མི་རྣམས་ཀྱི་མིང་བདུན་ཅུ་དོན་བདུན་ཡོད་པ་དེ་བཤད་དེ་བྲིས་སོ། ༡༥ དེ་ནས་སུ་ཀོད་པ་རྣམས་ཀྱི་མདུན་དུ་འོངས་ནས་དེ་དག་ལ། ལྟོས་ཤིག སྔོན་དུ་ཁྱོད་རྣམས་ཀྱིས་ང་ལ། ཐང་ཆད་པའི་མི་རྣམས་ལ་བག་ལེབ་སྦྱིན་པ་ལ། ཟེ་བཱ་དང་ཟལ་མུ་ནཱའི་ལག་པ་ཁྱོད་ཀྱི་དབང་དུ་ཡོད་དམ་འདྲིས་པ་དེ་ཚོ་ད་ལྟ་འདི་རུ་འདུག་ཅེས་སྨྲས་སོ། ༡༦ དེ་ནས་ཁོས་གྲོང་ཁྱེར་གྱི་རྒན་པོ་རྣམས་བཟུང་བ་དང་། ཚེ་རྒོད་དང་སེ་བའི་ཚེར་མ་བླང་སྟེ། སུ་ཀོད་པ་རྣམས་དེ་ཡིས་བཅུན་ཏོ། ༡༧ ཡང་ཁོས་ཕེ་ནུ་ཨེལ་གྱི་མཁར་བཤིག་ནས། གྲོང་ཁྱེར་གྱི་མི་རྣམས་བསད་དོ༎

༡༨ དེར་ཁོས་ཟེ་བཱ་དང་ཟལ་མུ་ནཱ་ལ། ཐ་བོར་དུ་ཁྱོད་གཉིས་ཀྱིས་བསད་པའི་མི་རྣམས་ག་འདྲ་ཡོད་པ་ཡིན་ཞེས་འདྲིས་པས། དེ་གཉིས་ཀྱིས་ལན་དུ། ཁོ་རྣམས་ཁྱེད་ལྟར་ཡོད་པ་ཡིན། མི་རེ་རེ་རྒྱལ་སྲས་ལྟར་ཡོད་པ་ཡིན་ཞུས་པས།

༡༩ ཁོ་ན་རེ། དེ་དག་ངའི་སྤུན་ཟླ་དང་ངའི་མ་ཡི་བུ་ཡོད་པ་ཡིན། ཡ་ཧོ་ཝཱ་གསོན་པོར་ངེས་པ་ལྟར། ཁྱོད་གཉིས་ཀྱིས་དེ་དག་གསོན་པོར་བཞག་པ་ཡིན་ན། ངས་ཁྱོད་གཉིས་མི་གསད་ཅེས་ཟེར་བ་དང་། ༢༠ ཁོས་རང་གི་སྔོན་སྐྱེས་ཡེ་ཐེར་ལ། ལོངས་ལ། དེ་གཉིས་སོད་ཟེར་ཀྱང་། གཞོན་ནུ་དེས་རང་གི་རལ་གྲི་མ་བཏོན། དེ་ཅིའི་ཕྱིར་ཞེ་ན། ཁོ་ད་དུང་ཕྲུ་གུ་ཡིན་པས་འཇིགས་སོ༎

༢༡ དེ་རུ་ཟེ་བཱ་དང་ཟལ་མུ་ནཱས་སྨྲས་པ། ཁྱོད་རང་ལོངས་ལ་ང་གཉིས་སོད་ཅིག ཅི་ལ་ཞེ་ན། སྐྱེས་པ་ཡིན་པ་ལྟར་ཁོའི་ཤེད་ཀྱང་ཡིན། དེའི་ཕྱིར་གིད་ཡོན་ལངས་ཏེ། ཟེ་བཱ་དང་ཟལ་མུ་ནཱ་བསད་དེ། དེ་གཉིས་ཀྱི་རྔ་མོང་རྣམས་ཀྱི་མཇིང་པར་ཡོད་པའི་རྒྱན་རྣམས་བླངས་སོ༎

༢༢ དེ་ནས་ཨིས་ར་ཨེལ་པ་རྣམས་ཀྱིས་གིད་ཡོན་ལ། ཁྱེད་ཀྱིས་བདག་ཅག་ལ་སྲིད་བྱོས་ཤིག ཁྱེད་རང་དང་ཁྱེད་ཀྱི་བུ་དང་བུའི་བུས་ཀྱང་དེ་ལྟར་བྱོས་ཤིག དེ་ཅིའི་ཕྱིར་ཞེ་ན། ཁྱེད་ཀྱིས་བདག་ཅག་མིད་ཨན་པའི་ལག་ནས་ཐར་དུ་བཅུག་པ་ཡིན།

༢༣ ཞེས་ཞུས་པའི་ལན་དུ་གིད་ཡོན་གྱིས་དེ་དག་ལ། ངས་ཁྱོད་ཅག་ལ་སྲིད་མི་བྱའི། ཡ་ཧོ་ཝཱས་ཁྱོད་ཅག་ལ་སྲིད་མཛད་པར་རུང་ངོ་ཞེས་སྨྲས་སོ། ༢༤ ཡང་གིད་ཡོན་གྱིས་དེ་དག་ལ་འདི་སྐད་དུ། ངས་ཁྱོད་ཅག་ལ་ཞུ་བ་ཞིག་འབུལ། ཁྱོད་ཅག་མི་རེ་རེས་བཅོམ་པའི་ཨ་ལོང་རྣམས་ང་ལ་བྱིན་ཅིག ཅི་ལ་ཞེ་ན། དེ་དག་ཨིས་མ་ཨེལ་པ་ཡིན་པས། དེ་དག་ལ་གསེར་གྱི་ཨ་ལོང་ཡོད་པ་ཡིན།

༢༥ དེར་དེ་དག་གིས། བདག་ཅག་དགའ་ཞིང་ཁྱེད་ལ་སྦྱིན་པར་བྱ། སྨྲས་ཤིང་གཟན་གོས་ཤིག་བཏིང་ནས། མི་རེ་རེས་རང་གི་བཅོམ་ནོར་གྱི་ཨ་ལོང་རྣམས་དེའི་ཁར་དབྱུགས་སོ། ༢༦ ཡང་ཟླ་བ་འདྲ་བའི་རྒྱན་རྣམས་དང་། རྣ་བ་ལ་བཏགས་པའི་རྒྱན་རྣམས་དང་། ལོང་ཟི་དམར་པོའི་གོས་མིད་ཨན་པའི་རྒྱལ་པོ་རྣམས་ཀྱིས་གྱོན་པ་དང་། དེ་དག་གི་རྔ་མོང་རྣམས་ཀྱི་མཇིང་པར་བཏགས་པའི་ཉག་ཐག་རྣམས་མ་གཏོགས་པར། ཁོས་གནོང་ཞིག་ཞུས་པའི་གསེར་གྱི་ཨ་ལོང་རྣམས་ཀྱི་སྐར་ཚད་ཤེ་ཀེལ་སྟོང་གཅིག་དང་བདུན་བརྒྱ་བྱུང་ངོ་། ༢༧ དེ་ནས་གིད་ཡོན་གྱིས་དེ་རྣམས་ནས་ཨེ་ཕོད་ཅིག་བཟོས་ནས། རང་གི་གྲོང་ཁྱེར་ཨོབ་རཱ་རུ་བཞག་སྟེ། ཨིས་ར་ཨེལ་ཐམས་ཅད་དེར་ཁོའི་རྗེས་སུ་སྤྱོད་ངན་བྱེད་མཁན་དུ་གྱུར་ནས། དེ་ནི་གིད་ཡོན་དང་ཁོ་རང་གི་བརྒྱུད་ཀྱི་ཕྱིར་རྙི་རུ་གྱུར་ཏོ༎

༢༨ དེ་ལྟར་མིད་ཨན་པ་རྣམས་ཨིས་ར་ཨེལ་གྱི་བུ་རྣམས་ཀྱི་མདུན་དུ་འཕམ་སྟེ། ཕྱིར་མགོ་མ་བཏེགས་སོ། ཡང་གིད་ཡོན་གྱི་ཚེའི་དུས་སུ་ལོ་བཞི་བཅུའི་བར་དུ་ཡུལ་དུ་ཞི་བདེ་བྱུང་ངོ་༎

༢༩ དེ་ནས་ཡོ་ཨས་ཀྱི་བུ་ཡེ་རུབ་བ་ཨཱལ་སོང་ནས། རང་གི་ཁང་པར་གནས་སོ། ༣༠ གིད་ཡོན་ལ་ཆུང་མ་མང་པོ་ཡོད་པས། རང་བུ་ཕྲུག་ཚོ་བདུན་ཅུ་ཁོ་ལ་ཡོད་པ་ཡིན། ༣༡ ཡང་ཁོའི་ལྐོག་གི་ཆུང་མ་སི་ཀེམ་དུ་གནས་པ་དེ་ལའང་བུ་ཞིག་སྐྱེས་པ་དང་། དེའི་མིང་ཨ་བི་མེ་ལེག་བཏགས་སོ། ༣༢ དེ་ནས་ཡོ་ཨས་ཀྱི་བུ་གིད་ཡོན་ཤིན་ཏུ་རྒས་ཏེ། ཚེ་འདས་ནས། ཨ་བི་ཨེས་རི་པ་རྣམས་ཀྱི་ཨོབ་རཱ་རུ་རང་གི་ཕའི་དུར་དུ་བཅུག་གོ།

༣༣ ཡང་འདི་ལྟར་བྱུང་། གིད་ཡོན་ནོངས་མ་ཐག་ཏུ། ཨིས་ར་ཨེལ་གྱི་བུ་རྣམས་སྤྱོད་པ་བསྲུང་ཏེ། བ་ཨཱལ་རྣམས་ཀྱི་རྗེས་སུ་ཕྱིན་ཏེ། སྡིག་པ་བྱས་ཏེ། བ་ཨཱལ་བེ་རེད་རང་གི་དཀོན་མཆོག་ཏུ་བྱས་སོ། ༣༤ ཨིས་ར་ཨེལ་གྱི་བུ་རྣམས་ཀྱིས་ཡ་ཧོ་ཝཱ་རང་གི་དཀོན་མཆོག་ཕྱོགས་བཞིའི་དགྲ་བོ་ཐམས་ཅད་ཀྱི་ལག་ནས་ཐར་བར་མཛད་མཁན་དེ་མ་དྲན་ཏོ། ༣༥ ཡེ་རུབ་བ་ཨཱལ་ལམ་གིད་ཡོན་གྱིས་ཨིས་ར་ཨེལ་པ་རྣམས་ལ་ཕན་ཐོགས་པའི་ལས་བྱས་པ་བཞིན་དུ། དེ་དག་གིས་ཁོའི་བརྒྱུད་ལ་དྲིན་མ་བགྱིས་སོ༎