ཡང་བྱ་བ་དེ་ཐམས་ཅད་ངས་ཁྱེད་ཀྱི་མདུན་དུ་བཞག་པའི་བྱིན་རླབས་དང་དམོད་པ་ཁྱོད་ལ་འབབ་པ་དང་། ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ཁྱོད་གང་མི་བརྒྱུད་ཐམས་ཅད་ཀྱི་ཁྲོད་དུ་བསྐྲད་པ་དེ་རུ་དྲན་ཞིང་། ༢ ཁྱོད་དང་ཁྱོད་ཀྱི་བུ་བརྒྱུད་ཀྱིས་སྙིང་ཚང་མ་ནས་ཡ་ཧོ་ཝཱ་ཁྱོད་ཀྱི་དཀོན་མཆོག་གི་ཕྱོགས་སུ་ཕྱིར་ལོག་སྟེ། ངས་དེ་རིང་ཁྱོད་ལ་སྐུལ་བ་ཐམས་ཅད་བཞིན་དུ་ཁོང་གི་བཀའ་ལ་ཉན་ན། ༣ ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ཁྱོད་བཙོན་གྱི་ཚུལ་དེ་མེད་པར་མཛད་དེ། ཁྱོད་ལ་ཐུགས་བརྩེ་བར་དགོངས་ནས་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་གང་མི་བརྒྱུད་ཐམས་ཅད་ཀྱི་ཁྲོད་དུ་ཁྱོད་གཏོར་བ་དེ་ནས་ཕྱིར་ལོག་འཁྲིད་ཅིང་སྡུད་པར་འགྱུར་རོ། ༤ ཁྱོད་ལས་སུ་ཞིག་ས་གཞིའི་མཐའ་མ་ལ་འཁྱར་ཡོད་ནའང་། དེ་ནས་ཀྱང་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ཁྱོད་བསྡུས་ནས་ཕྱིར་འཁྲིད་པར་འགྱུར། ༥ ཡང་ཁྱོད་ཀྱི་ཕ་མེས་ཀྱིས་བདག་ཏུ་བཟུང་བའི་ཡུལ་དུ་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ཕྱིར་ཁྲིད་ནས་ཁྱོད་ཀྱིས་བདག་པར་འགྱུར། ཁོང་གིས་ཁྱོད་ལ་བཀའ་དྲིན་མཛད་དེ། ཁྱོད་ཀྱི་ཕ་མེས་ལས་ཀྱང་ཁྱོད་རྒྱས་པར་མཛད་པར་འགྱུར་རོ། ༦ ཡང་ཡ་ཧོ་ཝཱ་ཁྱོད་ཀྱི་དཀོན་མཆོག་ལ་སྙིང་ཚང་མ་དང་སེམས་ཚང་མ་ནས་གཅེས་པར་འཛིན་ཞིང་འཚོ་བར་འགྱུར་བའི་དོན་དུ་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ཁྱོད་ཀྱི་སྙིང་དང་ཁྱོད་ཀྱི་བུ་བརྒྱུད་ཀྱི་སྙིང་གི་མདུན་ལྤགས་གཅོད་པར་འགྱུར། ༧ ཡང་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་དམོད་པ་དེ་ཐམས་ཅད་ཁྱོད་ཀྱི་ཕ་རོལ་པ་རྣམས་དང་ཁྱོད་ལ་སྡང་ཞིང་འཚེ་བ་རྣམས་ལ་འབེབས་པར་འགྱུར། ༨ ཡང་ཁྱོད་ཕྱིར་ལོག་སྟེ་ཡ་ཧོ་ཝཱའི་གསུང་ལ་ཉན་ཞིང་ཁོང་གི་བཀའ་ངས་དེ་རིང་ཁྱོད་ལ་སྒོ་བ་ཐམས་ཅད་སྒྲུབ་པར་འགྱུར་རོ། ༩ ཡང་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ཁྱོད་ཀྱི་ལག་པའི་ལས་ཀུན་དང་། ཁྱོད་ཀྱི་ལུས་ཀྱི་འབྲས་བུ་དང་། ཕྱུགས་ཀྱི་འབྲས་བུ་དང་། ཞིང་གི་འབྲས་བུ་ཁྱོད་ཀྱི་དོན་དུ་འཕེལ་བར་མཛད་པར་འགྱུར་རོ། གང་ལ་ཞེ་ན། ཡ་ཧོ་ཝཱས་ཕ་མེས་ལ་ཐུགས་དགྱེས་པ་དང་འདྲ་བར། ཁྱོད་ལ་བཀའ་དྲིན་མཛད་པའི་དོན་དུ་སླར་ཐུགས་དགྱེས་པར་འགྱུར། ༡༠ ཁྱོད་ཀྱིས་གལ་ཏེ་ཡ་ཧོ་ཝཱ་ཁྱོད་ཀྱི་དཀོན་མཆོག་གི་གསུང་ལ་ཉན་ཏེ་བཀའ་ཁྲིམས་ཀྱི་གླེགས་བམ་ནང་བྲིས་པའི་བཀའ་དང་སྤྱད་མཚམས་རྣམས་སྲུང་བ་དང་། ཡ་ཧོ་ཝཱ་ཁྱོད་ཀྱི་དཀོན་མཆོག་གི་ཕྱོགས་སུ་སྙིང་ཚང་མ་དང་སེམས་ཚང་མ་ནས་ཕྱིར་ལོག་ན། དེ་བཞིན་དུ་འབྱུང་བར་འགྱུར་རོ༎