ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ཁྱོད་ལ་བདག་ཏུ་འཛིན་པར་གནང་བའི་ཡུལ་ན་གལ་ཏེ་བསད་པའི་མི་ཞིག་གི་རོ་ཐང་ལ་ཡོད་པ་ཞིག་རྙེད་ནས་སུས་དེ་བསད་པ་ཡིན་གཏོལ་མེད་ན། ༢ ཁྱོད་ཀྱི་རྒད་པོ་རྣམས་དང་ཞལ་ཆེ་བ་རྣམས་མདུན་དུ་འོངས་ནས། བསད་པའི་རོ་ཡོད་པའི་གནས་ནས་ཉེ་འཁོར་ལ་ཡོད་པའི་གྲོང་ཁྱེར་རྣམས་ཀྱི་རྒྱང་རིང་ཐུང་གི་ཚོད་ལེན་པར་དགོས། ༣ ཡང་བསད་པའི་མི་དང་ཉེ་བའི་གྲོང་ཁྱེར་གྱི་རྒན་པོ་རྣམས་ཀྱིས་བེའུ་མོ་ལས་ཀ་ནམ་ཡང་མ་བྱས་པ། གཉའ་ཤིང་ནམ་ཡང་མ་འཁུར་བ་ཞིག་འཁྱེར་འོང་བ་དང་། ༤ གྲོང་ཁྱེར་དེའི་རྒད་པོ་རྣམས་ཀྱིས་བེའུ་མོ་དེ་ནམ་ཡང་མ་རྨོས་པ་ས་བོན་ནམ་ཡང་མ་བཏབ་པའི་གནས་སུ་གྲོག་པོའི་འགྲམ་དུ་ཁྲིད་ནས། གྲོག་པོ་དེ་རུ་བེའུ་མོའི་སྐེ་འབྲེག་པར་དགོས། ༥ ཡང་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ལེ་ཝི་པས་རང་གི་ཞབས་ཏོག་བྱེད་པ་དང་། ཡ་ཧོ་ཝཱའི་མཚན་གྱི་ངང་ན་བྱིན་རླབས་བྱེད་པ་དང་། རྩོད་པ་དང་རྡུང་བའི་རྒྱུ་ཐམས་ཅད་ཀྱི་ཕྱིར་དེ་དག་གི་ཁས་ཐག་གཅོད་པར་འདམས་པར་མཛད་པས། བླ་མ་དང་ལེ་ཝི་ཡི་བུ་རྣམས་དྲུང་དུ་འོང་སྟེ། ༦ བསད་པའི་མི་དང་ཉེ་བའི་གྲོང་ཁྱེར་གྱི་རྒན་པོ་ཐམས་ཅད་ཀྱིས་གྲོག་པོ་ལ་སྐེ་བྲེགས་པའི་བེའུ་མོའི་གོང་དུ་ལག་པ་ཁྲུས་ནས། ༧ ལན་འདེབས་ཤིང་འདི་སྐད་དུ། ངེད་ཀྱི་ལག་གིས་ཁྲག་འདི་མ་བླུགས། ངེད་ཀྱི་མིག་གིས་བྱ་བ་དེ་མ་མཐོང་བས། ༨ ཀྱེ་ཡ་ཧོ་ཝཱ་ཁྱེད་ཀྱིས་བསྒྲལ་བར་མཛད་པའི་ཨིས་ར་ཨེལ་གྱི་བུ་བརྒྱུད་ལ་ཐུགས་བརྩེ་བར་དགོངས་ཤིག ནོངས་མེད་པའི་ཁྲག་གི་ཁག་ཨིས་ར་ཨེལ་གྱི་མི་བརྒྱུད་ལ་འགེལ་བར་མ་མཛད་ཅིག་ཅེས་ཞུས་ནས། ཁྲག་དེའི་ལན་དེ་དག་ལས་སེལ་བར་འགྱུར་རོ། ༩ དེ་བཞིན་དུ་ཁྱོད་ཀྱིས་ཡ་ཧོ་ཝཱའི་ཞལ་ངོར་རིགས་པ་གང་ཡིན་པ་བྱེད་ན། ཁྱེད་ཀྱི་དཀྱིལ་ནས་ནོངས་མེད་པའི་ཁྲག་གི་ལན་སེལ་བར་རུང་ངོ་༎