ཁྱོད་ཀྱི་ཕ་རོལ་པ་རྣམས་ལ་གཡུལ་འགྱེད་དུ་འགྲོ་བའི་རྟ་དང་ཤིང་རྟ་རྣམས་དང་མི་བརྒྱུད་ཁྱོད་རང་ལས་ཆེ་བ་ཞིག་མཐོང་ན་དེ་དག་ལ་མ་འཇིགས་ཤིག ཁྱོད་མི་སེར་ཡུལ་ནས་གྱེན་དུ་ཁྲིད་པའི་ཡ་ཧོ་ཝཱ་ཁྱོད་ཀྱི་དཀོན་མཆོག་ཁྱོད་དང་འགྲོགས་སོ། ༢ ཡང་ཁྱོད་ཀྱིས་གཡུལ་འགྱེད་པ་དང་ཉེ་བར་འོང་བའི་ཚེ་བླ་མ་ཚུར་འོངས་ནས་མི་ཚོགས་ལ་གཏམ་བྱེད་པར་དགོས། ༣ དེས་དེ་དག་ལ་འདི་སྐད་དུ། ཀྱེ་ཨིས་ར་ཨེལ་ཉོན་ཞིག ཁྱེད་ཀྱིས་ད་ལྟ་ཕ་རོལ་པ་རྣམས་ལ་དམག་འཐབ་པས། ཁྱེད་ཀྱི་སྙིང་ཆུང་བར་མ་བྱེད་མ་འཇིགས། དེ་དག་ལ་ཉམས་མ་ང་སྟེ་དངང་སྐྲག་མ་སྐྱེད་ཅིག ༤ ཅི་ལ་ཞེ་ན། ཡ་ཧོ་ཝཱ་ཁྱེད་ཀྱི་དཀོན་མཆོག་ཁྱེད་དང་འགྲོགས་ཏེ་གཤེགས་ཤིང་ཁྱེད་ལ་སྐྱབས་མཛད་པའི་ཕྱིར་ཁྱེད་ཀྱི་དོན་དུ་འཐབ་པར་འགྱུར་རོ་ཞེས་སྐུལ་བར་དགོས། ༥ ཡང་འགོ་བྱེད་རྣམས་ཀྱིས་མི་ཚོགས་ལ་འདི་སྐད་དུ། ཁང་པ་གསར་བ་ཞིག་བརྩིགས་ནས་རབ་གནས་མ་བྱས་པའི་མི་སུ་ཡོད། མི་དེ་དམག་འཐབ་པའི་སྐབས་སུ་ཤི་ནས་མི་གཞན་ཞིག་གིས་རབ་གནས་བྱེད་པའང་སྲིད་པས། ཁང་པར་ཕྱིར་ལོག་པར་དགོས། ༦ ཡང་རྒུན་ཚལ་བཙུགས་ནས་དེའི་འབྲས་བུ་མ་ཟོས་པའི་མི་སུ་ཡོད། མི་དེ་དམག་འཐབ་སྐབས་སུ་ཤི་ནས་མི་གཞན་ཞིག་གིས་འབྲས་བུ་ཟ་བའང་སྲིད་པས། ཁང་པར་ཕྱིར་ལོག་པར་དགོས། ༧ ཡང་བག་མ་ཐོབ་ཀྱང་། བཟའ་མི་ད་རུང་མ་བྱས་པའི་མི་སུ་ཡོད། མི་དེ་དམག་འཐབ་སྐབས་སུ་ཤི་ནས་མི་གཞན་ཞིག་གིས་མོ་ཆུང་མར་ལེན་པའང་སྲིད་པས། ཁང་པར་ཕྱིར་ལོག་པར་དགོས་ཤེས་སྨྲ་བར་དགོས། ༨ དེ་ནས་འགོ་བྱེད་རྣམས་ཀྱིས་ཡང་སྐྱར་མི་ཚོགས་ལ་འདི་སྐད་དུ། འཇིགས་ཤིང་ཉམས་ཆུང་བ་སུ་ཡོད་པ། མི་དེ་རང་གི་སྙིང་ཉམས་ཆུང་བ་དང་འདྲ་བར་སྤུན་གྱི་སྙིང་ཡང་ཉམས་ཆུང་བར་མི་བྱེད་པའི་ཕྱིར་ཁང་པར་ཕྱིར་ལོག་པར་དགོས། ༩ དེས་འགོ་བྱེད་རྣམས་ཀྱིས་མི་ཚོགས་ལ་ཟེར་ཚར་ནས། མི་ཚོགས་འཁྲིད་པའི་དམག་དཔོན་རྣམས་འཇོག་པར་བྱའོ༎