ངས་དེ་རིང་ཁྱོད་ལ་སྐུལ་བའི་བཀའ་རྣམས་སྲུང་ལ་དེ་བཞིན་དུ་བྱོས་ཤིག་དང་། ཁྱོད་འཚོ་ཞིང་འཕེལ་བར་འགྱུར་ཞིང་། ཡ་ཧོ་ཝཱས་ཁྱོད་ཀྱི་མེས་པོ་རྣམས་ལ་དབུ་མནའ་བཞེས་པ་བཞིན་དུ་ཡུལ་དེ་བདག་ཏུ་འཛིན་པའི་ཕྱིར་དེར་འགྲོ་བར་འགྱུར་རོ། ༢ ཡང་ཡ་ཧོ་ཝཱ་ཁྱེད་ཀྱི་དཀོན་མཆོག་གིས་ཁྱེད་ཀྱི་སེམས་སྨད་དུ་འཇུག་པ་དང་ཁྱོད་ཀྱི་ཉམས་ཚོད་བཞེས་པ་དང་། ཁྱོད་ཀྱི་སྙིང་གི་གནས་ཚུལ་ནི་ཁྱོད་ཀྱིས་ཁོང་གི་བཀའ་སྲུང་ངམ་མི་སྲུང་རྟོགས་པའི་ཕྱིར་ལོ་བཞི་བཅུ་དེའི་བར་དུ་འབྲོག་སྟོང་ན་ཁྲིད་པར་མཛད་པའི་ལམ་ཚང་མ་དྲན་པར་གྱིས་ཤིག ༣ ཡང་ཁོང་གིས་ཁྱོད་ཀྱི་སེམས་སྨད་དུ་འཇུག་པ་དང་བཀྲེས་སུ་འཇུག་པ་དང་། ཁྱོད་རང་དང་ཁྱོད་ཀྱི་མེས་པོ་རྣམས་ཀྱིས་སྔར་མ་ཤེས་པའི་མན་ནཱ་ནི་ཟ་རུ་བཅུག་གོ། གང་ལ་ཞེ་ན། བག་ལེབ་འབའ་ཞིག་གིས་མི་ནི་མི་འཚོའི། ཡ་ཧོ་ཝཱའི་ཞལ་ནས་འབྱུང་བའི་བཀའ་ཐམས་ཅད་ཀྱིས་འཚོ་བ་ནི་ཁྱོད་ལ་སློབ་པར་མཛད་པའི་ཕྱིར་རོ། ༤ ཁྱོད་ཀྱིས་གོན་པའི་གོས་རྣམས་ལོ་བཞི་བཅུ་དེའི་བར་དུ་མ་བརྙིངས། རྐང་པ་ཡང་མ་བསྐྲངས་སོ། ༥ ཡང་མི་ཞིག་གིས་རང་གི་བུ་འདུལ་བ་ལྟར་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ཁྱོད་འདུལ་བར་མཛད་པ་སྙིང་ལ་ཆོང་ཞིག ༦ དེ་བས་ན་ཡ་ཧོ་ཝཱ་ཁྱོད་ཀྱི་དཀོན་མཆོག་གི་བཀའ་རྣམས་སྲུང་ལ། ཁོང་གི་ལམ་རྣམས་ལ་འགྲུལ་ཞིང་ཁོང་ལ་འཇིགས་ཤིག ༧ ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ཁྱོད་གང་གི་ཡུལ་བཟང་པོ་རུ་འཁྲིད་པར་འགྱུར་བའི་གནས་ཚུལ་འདི་ལྟར་རོ། ཡུལ་དེ་ན་གྲོག་པོ་དང་ལུང་པ་དང་རི་རྣམས་ལས་འཐོན་པོའི་ཆུ་མིག་དང་གཙང་པོ་རྣམས་ཡོད། ༨ གྲོ་ནས་དང་རྒུན་ཤིང་དང་སེ་ཡབ་དང་སེ་འབྲུ་དང་། ཁ་སྐྱུར་པོ་དང་སྦྲང་རྩི་མང་པོ། ༩ ཡུལ་དེ་ན་ཁྱོད་ལ་ཟ་རྒྱུ་དཀོན་པ་མེད་དེ། དེར་མེད་མཁན་ཅིའང་མེད། ཡང་ཡུལ་དེའི་རྡོ་བ་ནི་ལྕགས་ཡིན་ཏེ། རི་རྣམས་ལས་ཟངས་འབྲུ་བར་ཐུབ། ༡༠ ད་ཁྱོད་ཀྱིས་ཟོས་ནས་འགྲང་བར་གྱུར་པའི་དུས་སུ་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ཁྱོད་ལ་གནང་བའི་ཡུལ་བཟང་པོའི་ཕྱིར་ཁོང་ལ་སྟོད་བསྔགས་པའི་རིགས་སོ༎