༧ ཡ་ཧོ་ཝཱས་ཁྱེད་ལ་ཐུགས་བྱམས་པ་མཛད་ཅིང་འདམས་པར་མཛད་པ་ནི། མི་སྡེ་ཐམས་ཅད་ལས་ཁྱེད་ཀྱི་གྲངས་ཆེ་བས་ནི་མ་ཡིན་ཏེ། མི་སྡེ་ཐམས་ཅད་ལས་ཁྱེད་ཀྱི་གྲངས་ཉུང་བ་ཡོད་པ་ཡིན་ནོ། ༨ འོན་ཀྱང་ཡ་ཧོ་ཝཱས་ཁྱེད་ལ་བརྩེ་བར་དགོངས་ཏེ་ཁྱེད་ཀྱི་མེས་པོ་རྣམས་ལ་དབུ་མནའ་བཞེས་པ་དེ་སྒྲུབ་པའི་ཕྱིར་ཡ་ཧོ་ཝཱའི་ཕྱག་ཐུག་ལྡན་གྱིས་ཁྱེད་ཕྱི་རོལ་ཏུ་ཁྲིད་དེ་བྲན་ཁོལ་གྱི་ཁང་པ་མི་སེར་ཡུལ་གྱི་རྒྱལ་པོ་ཕར་ཨོའི་ལག་པ་ལས་སྒྲོལ་བར་མཛད་དོ། ༩ དེས་ན་ཡ་ཧོ་ཝཱ་ཁྱོད་ཀྱི་དཀོན་མཆོག་ནི་དཀོན་མཆོག་ཡིན་པ་རྟོགས་པར་བྱོས། ཁོང་ལ་ཆགས་ཤིང་བཀའ་བཞིན་དུ་བྱེད་པ་རྣམས་ལ་བུ་ཚ་རབས་སྟོང་གི་བར་དུ་ཞལ་ཆད་སྲུང་ཞིང་བརྩེ་བར་དགོངས་པའི་དཀོན་མཆོག་གདེང་ཅན་དེ་ལགས་སོ། ༡༠ ཁོང་ལ་སྡང་བ་རྣམས་ལ་ངོ་གདོང་དུ་ལན་འཇལ་ཞིང་མེད་པར་མཛད་དོ། ཁོང་ལ་སྡང་བ་ལ་མ་འགོར་བར་ངོ་གདོང་དུ་ལན་མཇལ་བར་འགྱུར་རོ། ༡༡ དེའི་ཕྱིར་བཀའ་དང་སྤྱད་མཚམས་དང་ཁྲིམས། དེ་རིང་ངས་ཁྱེད་ཀྱིས་དེ་བཞིན་དུ་བྱོས་ཤིག་ཅེས་སྐུལ་བ་རྣམས་སྲུང་ཞིག

༡༢ དེ་བས་ན་ཁྱེད་ཀྱིས་གལ་ཏེ་བཀའ་ཁྲིམས་དེ་རྣམས་ལ་ཉན་ཏེ་སྲུང་ཞིང་དེ་བཞིན་དུ་བྱེད་ན། ཡ་ཧོ་ཝཱ་ཁྱོད་ཀྱི་དཀོན་མཆོག་གིས་མེས་པོ་རྣམས་ལ་དབུ་མནའ་བཞེས་པ་བཞིན་དུ་ཁྱོད་དང་མཛད་པའི་ཞལ་ཆད་དང་ཐུགས་རྗེ་སྲུང་བར་འགྱུར་རོ། ༡༣ ཡང་ཁོང་གིས་ཁྱོད་ལ་ཐུགས་བརྩེ་ཞིང་བྱིན་གྱིས་རློབ་སྟེ་སྤེལ་བར་མཛད་པ་འདི་ལྟར་རོ། ཁོང་གིས་ཁྱོད་ཀྱི་མེས་པོ་རྣམས་ལ། ངས་ཁྱོད་ལ་ཡུལ་འདི་གནང་འོང་ཞེས་དབུ་མནའ་བཞེས་ནས་ཡུལ་དེ་ན་ཁྱོད་ཀྱི་མངལ་གྱི་འབྲས་བུ་དང་། ཞིང་གི་ཐོག་དང་། འབྲུ་དང་། རྒུན་ཆང་དང་། འབྲུ་མར་དང་། ཕྱུགས་ནས་བྱུང་བའི་འཕེལ་དང་། ར་ལུག་ནས་བྱུང་བའི་འཕེལ་ལ་བྱིན་གྱིས་རློབ་པར་འགྱུར་རོ། ༡༤ མི་བརྒྱུད་ཐམས་ཅད་ལས་ཁྱོད་བྱིན་གྱིས་བརླབས་པར་འགྱུར། ཁྱོད་རང་དང་ཁྱོད་ཀྱི་ལུག་ཕྱུགས་ཀྱི་ཁྲོད་དུ་ས་བོན་མེད་པའམ་རབས་ཆད་གང་ཡང་མེད་པར་འགྱུར་རོ། ༡༥ ཡང་ཡ་ཧོ་ཝཱས་ཁྱོད་ནད་ཐམས་ཅད་ལས་སྲུང་སྟེ་ཁྱོད་ཀྱིས་ཤེས་པའི་མི་སེར་ཡུལ་གྱི་ནད་ངན་པ་ཐམས་ཅད་ཁྱོད་ལ་འཕོག་པར་མ་བཅུག་སྟེ་ཁྱོད་ལ་སྡང་བ་ཐམས་ཅད་ལ་འཕོག་འཇུག་ཡོང་། ༡༦ ཡང་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ཁྱོད་ཀྱི་ལག་ཏུ་གནང་བའི་མི་བརྒྱུད་ཐམས་ཅད་མེད་པར་བྱོས་ཤིག སྙིང་རྗེ་སྐྱེད་ཅིང་ཁྱོད་ཀྱི་མིག་གིས་དེ་དག་ལ་ལྟ་བའམ་དེ་དག་གི་ལྷ་རྣམས་ལ་རིམ་གྲོ་མ་བྱེད། ཅི་ལ་ཞེ་ན། དེ་ནི་ཁྱོད་འཛིན་པའི་རྙི་ལྟ་བུར་འགྱུར་བའི་ཕྱིར་རོ༎

༡༧ ཁྱོད་ཀྱིས་འདི་སྙམ་དུ། ང་ཅག་ལས་མི་བརྒྱུད་འདི་རྣམས་ཀྱི་གྲངས་ཆེ་བས་ཡུལ་ནས་ཇི་ལྟར་སྐྲོད་པར་སྲིད་ཅེས་བསམ་ནའང་། ༡༨ དེ་དག་ལ་མ་འཇིགས་ཤིག ཡ་ཧོ་ཝཱ་ཁྱོད་ཀྱི་དཀོན་མཆོག་གིས་ཕར་ཨོ་དང་མི་སེར་ཡུལ་ཐམས་ཅད་ལ་ཇི་ལྟར་མཛད་པ་ནི། ༡༩ ཁྱོད་ཀྱི་མིག་གིས་མཐོང་བའི་ཉམས་ཚོད་བཞེས་པའི་ཐབས་ཆེན་པོ་རྣམས་དང་ལྟས་དང་འཕྲིན་ལས་ངོ་མཚར་ཆེ་བ་རྣམས་དང་ཡ་ཧོ་ཝཱའི་ཕྱག་མཐུ་ལྡན་བརྐྱང་བས་ཁྱོད་ཕྱི་རོལ་ཏུ་འཁྲིད་ཚུལ་དེ་ཞིག་ཏུ་དྲན་པར་གྱིས་ཤིག ཁྱོད་གང་ལ་འཇིགས་པའི་མི་བརྒྱུད་ཐམས་ཅད་ལ་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་དེ་ལྟར་མཛད་ཡོང་། ༢༠ ཡ་ཧོ་ཝཱ་ཁྱོད་ཀྱི་དཀོན་མཆོག་གིས་དེ་དག་གི་ཁྲོད་དུ་སྤྲང་བུ་ལིང་གོལ་མ་རྣམས་ཡང་གཏོང་བས། དེ་དག་གི་ནང་ནས་ལུས་པ་དང་ཁྱོད་ཀྱི་དྲུང་ནས་གབ་པ་རྣམས་ཀྱི་བར་དུ་འཇིག་པར་བྱའོ། ༢༡ དེ་དག་ལ་མ་འཇིགས་ཤིག ཡ་ཧོ་ཝཱ་ཁྱོད་ཀྱི་དཀོན་མཆོག་ནི་དཀོན་མཆོག་དབང་ལྡན་ཞིང་འཇིགས་སུ་རུང་བ་དེ་ཁྱོད་ཀྱི་ཡུལ་ན་བཞུགས་ཡོད། ༢༢ ཡང་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་མི་བརྒྱུད་འདི་རྣམས་ཁྱོད་ཀྱི་མདུན་ནས་ཉུང་ངུ་དང་ཉུང་ངུ་ཞིག་སྐྲོད་པར་འགྱུར། ཁྱོད་ཀྱིས་མྱུར་དུ་དེ་དག་མེད་པར་བྱེད་པར་མི་ནུས་སོ། གང་ལ་ཞེ་ན། ཐང་གི་གཅན་གཟན་རྣམས་ཁྱོད་ཀྱིས་མི་ཐུབ་པ་ཙམ་དུ་མི་འཕེལ་བའི་ཕྱིར་རོ། ༢༣ འོན་ཀྱང་ཡ་ཧོ་ཝཱ་ཁྱོད་ཀྱི་དཀོན་མཆོག་གིས་དེ་དག་ཁྱོད་ཀྱི་དབང་དུ་གནང་བ་དང་། དེ་དག་མེད་པར་མ་གྱུར་བའི་བར་དུ་འཇིག་པ་དྲག་པོས་འཇིག་པར་མཛད་ཡོང་། ༢༤ ཡང་དེ་དག་གི་རྒྱལ་པོ་རྣམས་ཁྱོད་ཀྱི་ལག་ཏུ་གནང་བས་ཁྱོད་ཀྱིས་དེ་དག་གི་མིང་ཡང་ནམ་མཁའི་འོག་ནས་མེད་པར་བྱེད་པར་འགྱུར། ཁྱོད་ཀྱིས་དེ་དག་མེད་པར་མ་བྱས་པའི་བར་དུ། ཁྱོད་ཐུབ་པའི་མི་གང་ཡང་འབྱུང་མི་ཡོང་། ༢༥ དེ་དག་གི་ལྷའི་འདྲ་སྐུ་རྣམས་མེས་སྲེག་པར་བྱོས་ཤིག དེ་དག་ལ་བཏགས་པའི་དངུལ་ལམ་གསེར་ནི་ཡ་ཧོ་ཝཱ་ཁྱོད་ཀྱི་དཀོན་མཆོག་གི་སྤྱན་སྔར་མི་གཙང་བ་ཡིན་པའི་ཕྱིར་དེ་ལ་མ་ཧམ། རྫས་དེ་ནི་ཁྱོད་འཛིན་པའི་རྙི་རུ་མི་འགྱུར་བའི་ཕྱིར་ཁྱོད་ཀྱི་ཕྱིར་མ་ལེན་ཞིག ༢༦ ཁྱོད་ཀྱི་ཁང་པ་རུ་ཡང་རྫས་མི་གཙང་བ་ཞིག་མ་འཁྱེར་ཞིག ཇི་སྟེ་འཁྱེར་ན་རྫས་དེ་རང་དང་འདྲ་བར་ཁྱེད་ཀྱང་མེད་པར་འགྱུར་བར་འགྱུར་རོ། དམོད་བོར་བའི་རྫས་ཡིན་པས་དེ་ཁྱོན་ནས་སྤོང་བ་དང་མི་གཙང་བར་རྩི་བར་རུང་ངོ་༎