ཡང་ངེད་ཆས་པ་ལས་བཱ་ཤན་གྱི་ལམ་ལ་གྱེན་དུ་སོང་བས། བཱ་ཤན་གྱི་རྒྱལ་པོ་ཨོག་བྱ་བ་རང་གི་མི་ཐམས་ཅད་དང་བཅས་པས་ངེད་ལ་དམག་འདྲེན་དུ་ཨེ་དྲེ་ཨི་རུ་ཚུར་འོངས་སོ། ༢ དེའི་ཚེ་ཡ་ཧོ་ཝཱས་ང་ལ། ངས་དེ་རང་དང་དེའི་མི་ཐམས་ཅད་དང་དེའི་ཡུལ་ཁྱོད་ཀྱི་ལག་ཏུ་བཏང་བས་མ་འཇིགས་ཤིག ཁྱོད་ཀྱིས་ཨ་མོར་པའི་རྒྱལ་པོ་སི་ཧོན་་ཧེས་བོན་ན་གནས་པ་ལ་བྱས་པ་དང་འདྲ་བར་དེ་ལ་ཡང་བྱེད་པར་འགྱུར་རོ་ཞེས་བཀའ་སྩལ་ཏོ། ༣ ཡང་ཡ་ཧོ་ཝཱ་ངེད་ཀྱི་དཀོན་མཆོག་གིས་བཱ་ཤན་གྱི་རྒྱལ་པོ་ཨོག་དང་དེའི་མི་ཐམས་ཅད་ངེད་ཀྱི་ལག་ཏུ་གནང་བས་ངེད་ཀྱིས་དེ་ལས་གཅིག་ཀྱང་མ་ལུས་པའི་བར་དུ་མེད་པར་བྱས་སོ། ༤ ཡང་ངེད་ཀྱིས་དེའི་དུས་སུ་ཁོའི་གྲོང་ཁྱེར་ཐམས་ཅད་བླངས་ནས། གྲོང་ཁྱེར་མ་བཅོམ་པ་གཅིག་ཀྱང་མ་ལུས་སོ། བཱ་ཤན་ན་ཨོག་གི་རྒྱལ་ཁམས་ཀྱི་གྲོང་ཁྱེར་དྲུག་ཅུ་ཡོད་པའི་ཨར་གོབ་ཀྱི་ཡུལ་འཁོར་ཐམས་ཅད་བླངས་སོ། ༥ གྲོང་ཁྱེར་དེ་ཐམས་ཅད་ལྕགས་རི་མཐོན་པོ་དང་རྒྱ་སྒོ་དང་ཨར་ཤིང་རྣམས་དང་ལྡན་པ་ཡོད་པ་ཡིན། དེ་མ་གཏོགས་པར་ལྕགས་རི་མེད་པའི་ཡུལ་ཚོ་ཤིན་ཏུ་མང་པོ་ཡོད་པ་ཡིན། ༦ ཡང་ངེད་ཀྱིས་ཧེས་བོན་གྱི་རྒྱལ་པོ་སི་ཧོན་ལ་བྱས་པ་བཞིན་དུ་དེ་དག་གི་གྲོང་ཁྱེར་རེའི་སྐྱེས་པ་དང་བུད་མེད་དང་བྱིས་པ་རྣམས་མེད་པར་བྱས་སོ། ༧ ཕྱུགས་ཐམས་ཅད་དང་གྲོང་ཁྱེར་རྣམས་ཀྱི་བཅོམ་ནོར་ངེད་ཀྱི་ཕྱིར་བླངས་པ་ཡིན། ༨ དུས་དེ་རང་ལ་ངེད་ཀྱིས་ཡོར་དན་ཆུའི་ཕ་རོལ་ན་ཡོད་པའི་ལུང་བ་གྲོག་པོ་ཨར་ནོན་ནས་རི་ཧེར་མོན་གྱི་བར་དུ་ཨ་མོར་པའི་རྒྱལ་པོ་གཉིས་ཀྱི་ལག་པ་ནས་ལེན་པ་ཡིན། ༩ ཧེར་མོན་དེའི་མིང་ཚི་དོན་པ་རྣམས་ཀྱིས་སིར་ཡོན་དང་ཨ་མོར་པ་རྣམས་ཀྱིས་སེ་ནིར་ཞེས་བཏགས་སོ། ༡༠ ཐང་ལ་ཡོད་པའི་གྲོང་ཁྱེར་ཐམས་ཅད་དང་གིལ་ཨད་ཡུལ་ཐམས་ཅད་དང་བཱ་ཤན་པ་ཨོག་གི་རྒྱལ་ཁམས་ཀྱི་གྲོང་ཁྱེར་སལ་ཀཱ་དང་ཨེ་དྲེ་ཨི་ཡི་བར་དུ་བཱ་ཤན་ཡུལ་ཐམས་ཅད་ངེད་ཀྱིས་བླངས་སོ། ༡༡ བཱ་ཤན་གྱི་རྒྱལ་པོ་ཨོག་གཅིག་པོ་གྱད་པ་རྣམས་ཀྱི་ལྷག་མ་ནས་ལུས་པ་ཡིན་ནོ། ལྟོས་ཤིག དེའི་མལ་ཁྲི་ནི་ལྕགས་ཀྱིས་བཟོས་པའི་མལ་ཁྲིའི་རིང་ཁྱད་མིའི་ཁྲུ་ཚད་བཞིན་དུ་ཁྲུ་དགུ། ཞེང་ཁྱད་ཁྲུ་བཞི་ཡིན་ཏེ། མལ་ཁྲི་དེ་ཨམ་མོན་གྱི་བུ་རྣམས་ཀྱི་ཡུལ་རབ་བཱ་བྱ་བ་རུ་མེད་དམ།