ཡང་ཡ་ཧོ་ཝཱས་མོ་ཤེ་ལ་བཀའ་གནང་ཞིང་འདི་སྐད་དུ། ༢ ཨིས་ར་ཨེལ་གྱི་བུ་རྣམས་ཀྱི་དོན་དུ་མིད་ཨན་པ་རྣམས་ལ་ལན་འཇལ་བར་བྱོས་ཤིག་དང་། དེའི་རྗེས་ལ་ཁྱོད་ནི་རང་གི་མི་དང་འཛོམ་པར་འགྱུར་གསུངས་ནས། ༣ མོ་ཤེས་མི་སྡེ་ལ། ཁྱོད་ཚོས་རང་གི་ནང་ནས་དམག་གི་ཕྱིར་དམག་ཆས་སྤྲོད་ཅིག་དང་། དེ་དག་གིས་མིད་ཨན་པ་རྣམས་ལ་འཐབ་ནས་ཡ་ཧོ་ཝཱས་མིད་ཨན་ལ་ལན་འཇལ་བའི་ཕྱིར་རོ། ༤ ཁྱེད་ཀྱིས་ཨིས་ར་ཨེལ་གྱི་སྡེ་ཐམས་ཅད་ཀྱི་ནང་ནས་སྡེ་རེ་རེ་ལས་མི་སྟོང་རེ་རེ་དམག་ལ་གཏོང་ཞིག་གསུངས་པས། ༥ དེ་ལྟར་ཨིས་ར་ཨེལ་གྱི་སྟོང་རྣམས་ཀྱི་ནང་ནས་སྡེ་རེ་ནས་སྟོང་ཞིག་ཟེར་ན། སྟོང་བཅུ་གཉིས་མཚོན་ཆ་དང་ལྡན་པ་དམག་གི་དོན་དུ་བྱུང་ངོ་། ༦ ཡང་མོ་ཤེས་སྡེ་རེ་ནས་སྟོང་ཅིག་དམག་ལ་བཏང་། དེ་དག་དང་བླ་མ་ཨེལ་ཨ་ཟར་གྱི་བུ་ཕི་ནེ་ཧས་དམ་པའི་བཞུགས་གནས་ཀྱི་སྣོད་དང་འུར་སྒྲ་བྱེད་པའི་ཕྱིར་དུང་རྣམས་དང་བཅས་པ་དམག་ལ་བཏང་ངོ་། ༧ ཡང་ཡ་ཧོ་ཝཱས་མོ་ཤེ་ལ་བཀའ་གནང་བ་བཞིན་དུ་མིད་ཨན་ལ་དམག་འཐབ་པ་དང་། ཕོ་ཡོད་པ་ཐམས་ཅད་བསད་དོ། ༨ ཡང་ཨེ་ཝི་དང་། རེ་ཁེམ་དང་། ཙུར་དང་། ཧུར་དང་། རེ་བཱ་ནི་མིད་ཨན་པའི་རྒྱལ་པོ་ལྔ་དང་བཅས་ཚོ་བསད་པ་རྣམས་ཀྱི་ཕྱི་ལུས་དག་ཀྱང་བསད་དོ། བེ་ཨོར་གྱི་བུ་བ་ལ་ཨམ་ཡང་རལ་གྲིས་བསད་དོ། ༩ ཡང་ཨིས་ར་ཨེལ་གྱི་བུ་རྣམས་ཀྱིས་མིད་ཨན་གྱི་བུད་མེད་དང་དེ་དག་གི་ཕྲུ་གུ་ཆུང་བ་དང་། ཕྱུགས་ཐམས་ཅད་དང་། ཁྱུ་ཐམས་ཅད་དང་། དེ་དག་གི་དངོས་པོ་ཐམས་ཅད་བཅོམ་ནོར་དུ་ཁྱེར་ཏོ། ༡༠ ཡང་དེ་དག་གནས་པའི་གྲོང་ཁྱེར་དང་སྒར་རྣམས་མེས་བསྲེགས་སོ། ༡༡ ཁོ་རྣམས་ཀྱིས་མི་དང་དུད་འགྲོ་བཅོམ་ནས་བཅོམ་ནོར་ཐམས་ཅད་བཟུང་ངོ་། ༡༢ ཡང་ཁོ་རྣམས་ཀྱིས་བཙོན་པ་ཐམས་ཅད་དང་། བཅོམས་པ་གང་ཡོད་པ་ཐམས་ཅད་མོ་ཤེ་དང་བླ་མ་ཨེལ་ཨ་ཟར་དང་། ཨིས་ར་ཨེལ་གྱི་བུ་རྣམས་ཀྱི་ཆོས་ཚོགས་ཚང་མ་ཡོར་དན་གྱི་འགྲམ་ལ་ཡོད་པའི་ཡེ་རི་ཀོ་་མོ་ཨབ་ཀྱི་ཐང་ལ་བཏབ་ཡོད་པའི་སྒར་ལ་དེ་ཚོའི་དྲུང་དུ་འཁྱེར་ཡོངས་སོ༎