ཡང་ཡ་ཧོ་ཝཱས་མོ་ཤེ་དང་ཨ་རོན་ལ་འདི་སྐད་ཅེས་གསུངས་པ། ༢ ཡ་ཧོ་ཝཱས་གནང་བའི་བཀའ་ཁྲིམས་ཀྱི་སྤྱད་མཚམས་འདི་ཡིན། ཨིས་ར་ཨེལ་གྱི་བུ་རྣམས་ལ་སྨྲོས་ཤིག བ་དམར་པོ་རྨེ་བ་དང་སྐྱོན་མེད་པ་དང་གཉའ་ཤིང་ནམ་ཡང་མ་བཀལ་བ་ཞིག་ངའི་རྩར་འཁྲིད་ཡོངས་ཤིག ༣ བ་དེ་ནི་བླ་མ་ཨེལ་ཨ་ཟར་ལ་གཏོང་དགོས། ཡང་དེས་བ་དེ་ནི་སྒར་གྱི་ཕྱི་རོལ་ཏུ་ཁྲིད་ནས། མི་ཞིག་གིས་ཁོང་གི་མཐོང་ས་ལ་གསོད་པར་བྱ། ༤ ཡང་བླ་མ་ཨེལ་ཨ་ཟར་དེའི་ཁྲག་མཛུག་གུས་བླངས་ཏེ། དེའི་ཁྲག་འདུན་མའི་གུར་མཆོག་གི་མདུན་ལོགས་ཀྱི་ཕྱོགས་སུ་ལན་བདུན་གཡོག་པ་དང་། ༥ མི་ཞིག་གིས་བ་གཞོན་པ་དེ་སྲེག་དགོས། དེའི་པགས་པ་དང་ཤ་དང་ཁྲག་དང་དེའི་ལྕི་བ་དང་བཅས་པ་སྲེག་པར་དགོས་སོ། ༦ ཡང་བླ་མས་ཤུག་ཤིང་དང་ཨི་སོབ་དང་མཚལ་ཁ་བླངས་ནས་བ་གཞོན་པ་འཚིག་པའི་མེའི་དཀྱིལ་དུ་དབྱུག་དགོས། ༧ དེ་ནས་བླ་མས་རང་གི་གོས་འཁྲུད་པ་དང་། རང་གི་ལུས་ཆུ་ལ་བཀྲུས་པའི་རྗེས་ལ་སྒར་དུ་ཡོང་ཆོག ཡང་དགོངས་མོའི་བར་དུ་བླ་མ་མི་གཙང་བར་འགྱུར། ༨ བ་སྲེག་པའི་མི་དེས་ཀྱང་རང་གི་གོས་འཁྲུད་དེ། རང་གི་ལུས་ཆུ་ལ་བཀྲུས་ནས། དགོངས་མོའི་བར་དུ་མི་གཙང་བར་འགྱུར། ༩ ཡང་གཙང་བ་ཡིན་པའི་མི་ཞིག་གིས་བ་གཞོན་པའི་ཐལ་བ་བསྡུ་བ་དང་། སྒར་གྱི་ཕྱི་རོལ་ཏུ་གནས་གཙང་བ་ཞིག་ཏུ་བཞག་པ་དང་། ཨིས་ར་ཨེལ་གྱི་བུ་རྣམས་ཀྱི་ཕྱིར་འདག་པར་བྱེད་པའི་ཆུ་ཞིག་ཡིན་པའི་དོན་དུ་བདོག་པར་བྱའོ། དེ་ནི་སྡིག་པའི་ཕྱིར་དུ་མཆོད་པ་ཞིག་གོ། ༡༠ ཡང་བ་གཞོན་པ་དེའི་ཐལ་བ་བསྡུ་བའི་མི་དེས་རང་གི་གོས་བཀྲུས་ནས། དགོངས་མོའི་བར་དུ་མི་གཙང་བར་འགྱུར། དེ་ནི་ཨིས་ར་ཨེལ་གྱི་བུ་རྣམས་དང་དེའི་ཁྲོད་དུ་སྡོད་པའི་ཕྱི་མིའི་ཕྱིར་དུ་རྒྱུན་དུ་གནས་པའི་སྤྱད་མཚམས་ཤིག་ཡོད་པར་དགོས་སོ༎