ཡང་ཡ་ཧོ་ཝཱས་མོ་ཤེ་དང་ཨ་རོན་ལ་བཀའ་གནང་ཞིང་འདི་སྐད་དུ། ༢ ལེ་ཝི་པའི་བུ་རྣམས་ལས་ཀོ་ཧད་ཀྱི་བུ་རྣམས་ཀྱི་གྲངས་རང་གི་བརྒྱུད་དང་ཕའི་ཁང་པ་རྣམས་བཞིན་དུ། ༣ ལོ་སུམ་ཅུ་པ་ནས་ལོ་ལྔ་བཅུ་པའི་བར་དུ་ལས་ཀ་བྱེད་དུ་རུང་བ་འདུན་མའི་གུར་མཆོག་ན་ཞབས་ཏོག་བྱེད་པ་ཐམས་ཅད་རྩིས་ཤིག ༤ ཀོ་ཧད་ཀྱི་བུ་རྣམས་ལ་འདུན་མའི་གུར་མཆོག་གི་ནང་ན་དམ་པའི་དམ་པ་རུ་ལས་ཚན་ནི་འདི་ཡིན། ༥ སྒར་འཕོ་བའི་ཚེ་ན་ཨ་རོན་དང་དེའི་བུ་རྣམས་ནང་དུ་འཇུག་ཅིང་ཡོལ་བ་ཕབ་ནས་དེས་དཔང་པོའི་སྒྲོམ་འགེབས་པ་དང་། ༦ དེའི་སྟེང་དུ་སྲམ་གྱི་པགས་པའི་སྟན་དང་དེའི་སྟེང་དུ་རས་སྔོན་སང་འདིང་བ་དང་། དེའི་གདང་བུ་གཉིས་དེ་ནང་འཇུག་པར་དགོས། ༧ ཡང་སྤྱན་གཟིགས་ཀྱི་བག་ལེབ་ཀྱི་གསོལ་ལྕོག་གི་སྟེང་དུ་རས་སྔོན་སང་ཞིག་བཏིང་ནས། དེའི་སྟེང་དུ་སྡེར་མ་དང་ཕོར་པ་དང་བུམ་པ་དང་མཆོད་ཞལ་སྐྱེམས་ཀྱི་མཆོད་པ་འབུལ་དུ་ཡོད་པ་རྣམས་འཇོག་པ་དང་། རྒྱུན་ཆད་མེད་པའི་བག་ལེབ་ཡང་དེའི་སྟེང་དུ་ཡོད་པར་དགོས། ༨ དེ་རྣམས་ཀྱི་སྟེང་དུ་སྣམ་བུ་མཚལ་ཁ་བཏིང་ནས་དེ་སྲམ་གྱི་པགས་པའི་སྟན་གྱིས་འགེབས་པ་དང་། དེའི་གདང་བུ་གཉིས་དེ་ནང་འཇུག་པར་དགོས། ༩ ཡང་སྣམ་བུ་སྔོན་པོ་བླངས་ནས་འོད་ཀྱི་སྟེགས་བུ་དང་སྒྲོན་མ་རྣམས་དང་སྐམ་ཆུང་དང་ཆན་པ་དང་ཞབས་ཏོག་བྱེད་དུ་འབྲུ་མར་གྱི་སྣོད་ཐམས་ཅད་སྣམ་བུས་འགེབས་པ་དང་། ༡༠ དེ་དང་དེའི་མཆོད་རྫས་དང་མཉམ་དུ་སྲམ་གྱི་པགས་པའི་སྟན་གྱིས་བསྒྲིལ་ནས་གདང་ལ་འཇོག་པར་དགོས། ༡༡ ཡང་གསེར་གྱི་མཆོད་ཁྲིའི་སྟེང་དུ་སྣམ་བུ་སྔོན་པོ་ཞིག་བཏིང་ནས་སྲམ་གྱི་པགས་པའི་སྟན་གྱིས་འགེབས་པ་དང་། གདང་བུ་གཉིས་འཇུག་པར་དགོས་སོ། ༡༢ ཡང་གནས་དམ་པ་རུ་ཞབས་ཏོག་བྱེད་པའི་ཕྱིར་དགོས་པའི་མཆོད་རྫས་ཐམས་ཅད་ལེན་པ་དང་སྣམ་བུ་སྔོན་པོས་བསྒྲིལ་ནས་སྲམ་གྱི་པགས་པའི་སྟན་གྱིས་འགེབས་པ་དང་གདང་ལ་འཇོག་པར་དགོས། ༡༣ ཡང་མཆོད་ཁྲིའི་ཐལ་བ་ཕྱག་དར་བྱས་ནས་དེའི་སྟེང་དུ་སྣམ་བུ་དམར་པོ་འདིང་བ་དང་། ༡༤ དེའི་ཁར་ཞབས་ཏོག་གི་ཕྱིར་དགོས་པའི་མཆོད་རྫས་མེ་ཕོར་དང་ཤ་འཛིན་དང་མེ་ཁྱེམ་དང་མཆོད་ཞལ་རྣམས་དང་མཆོད་ཁྲིའི་མཆོད་རྫས་ཐམས་ཅད་བཞག་ནས་དེའི་སྟེང་དུ་སྲམ་གྱི་པགས་པའི་སྟན་འདིང་བ་དང་། གདང་བུ་གཉིས་དེ་ལ་འཇུག་པར་དགོས་སོ། ༡༥ ཡང་སྒར་འཕོ་བའི་ཚེ་ན་ཨ་རོན་དང་དེའི་བུ་རྣམས་གནས་དམ་པ་དང་གནས་དང་པའི་རྫས་ཐམས་ཅད་འགེབས་ཟིན་ན། ཀོ་ཧད་ཀྱི་བུ་རྣམས་ཀྱིས་དེ་འཁུར་བའི་ཕྱིར་ནང་དུ་འཇུག་པར་བྱ། འོན་ཀྱང་དེ་དག་མི་འཆི་བའི་ཕྱིར་རྫས་དམ་པ་དེ་ལ་རེག་པར་མི་རུང་ངོ་། ཀོ་ཧད་ཀྱི་བུ་རྣམས་ཀྱིས་འདུན་མའི་གུར་མཆོག་གི་རྫས་འཁུར་བར་དགོས་པ་ནི་ལས་ཚན་དེ་ཡིན་ནོ༎