ཡང་ཡ་ཧོ་ཝཱས་མོ་ཤེ་དང་ཨ་རོན་ལ་འདི་སྐད་ཅེས་གསུངས་པ། ༢ ཨིས་ར་ཨེལ་གྱི་བུ་རྣམས་ཀྱིས་རེ་རེ་རང་གི་དར་པོ་ཆེ་དང་ཕ་རྣམས་ཀྱི་ཁང་པའི་དར་ཆེན་གྱི་མདུན་དུ་གུར་འབུབས་དགོས། འདུན་མའི་གུར་མཆོག་སྐོར་ཏེ་དེའི་ཐད་དུ་གུར་འབུབས་པར་དགོས་སོ། ༣ ཡང་ཉི་མ་ཤར་བའི་ཕྱོགས་སུ་གུར་འབུབས་པ་རྣམས་ནི་ཡ་ཧུ་དཱ་ཡི་སྒར་ཚོགས་ཀྱི་དར་པོ་ཆེ་དང་། ཡ་ཧུ་དཱ་ཡི་བུ་རྣམས་ཀྱི་སྡེ་དཔོན་ཨ་མི་ནཱ་དབ་ཀྱི་བུ་ན་ཧ་ཤོན་དང་། ༤ དེའི་ཚོགས་དང་གྲངས་བརྩིས་པའི་མི་རྣམས་བདུན་ཁྲི་བཞི་སྟོང་དྲུག་བརྒྱའོ། ༥ དེ་རྣམས་དང་སྒྲིག་སྟེ་གུར་འབུབས་པ་རྣམས་ནི་སྡེ་ཡིས་ཀར་དང་། ཨི་ས་གར་གྱི་བུ་རྣམས་ཀྱི་སྡེ་དཔོན་ཚུ་ཨར་གྱི་བུ་ནེ་ཐན་ཨེལ་དང་། ༦ དེའི་ཚོགས་དང་གྲངས་བརྩིས་པའི་མི་ལྔ་ཁྲི་བཞི་སྟོང་བཞི་བརྒྱའོ། ༧ སྡེ་ཟེ་བུ་ལོན་དང་། ཟེ་བུ་ལོན་གྱི་བུ་རྣམས་ཀྱི་སྡེ་དཔོན་ཧེ་ལོན་གྱི་བུ་ཨེ་ལི་ཨབ་དང་། ༨ དེའི་ཚོགས་དང་གྲངས་བརྩིས་པའི་མི་རྣམས་ལྔ་ཁྲི་བདུན་སྟོང་བཞི་བརྒྱའོ། ༩ ཡ་ཧུ་དཱ་ཡི་སྒར་ལས་གྲངས་བརྩིས་པའི་མི་ཐམས་ཅད་རང་གི་ཚོགས་བཞིན་དུ་འབུམ་གཅིག་བརྒྱད་ཁྲི་དྲུག་སྟོང་བཞི་བརྒྱའོ། དེ་དག་ནི་སྔོན་དུ་འགྲོ་བར་དགོས་སོ༎