ཡང་སྐྱར་ཡ་ཧོ་ཝཱས་མོ་ཤེ་ལ་འདི་སྐད་གསུངས་པ། ༢ ཨིས་ར་ཨེལ་གྱི་བུ་རྣམས་ཀྱི་ཚོགས་ཐམས་ཅད་ལ་འདི་སྐད་ཅེས་སྨྲོས་ཤིག ང་ནི་ཡ་ཧོ་ཝཱ་ཁྱེད་ཀྱི་དཀོན་མཆོག་དམ་པ་ཡིན་པ་ལྟར་ཁྱེད་ཀྱང་དམ་པ་ཡིན་པར་དགོས་སོ། ༣ ཁྱོད་རྣམས་ལས་རེས་རང་གི་ཕ་དང་མ་ལ་བཀུར་སྟི་བྱེད་པ་དང་། ངའི་ཤབ་བཱད་རྣམས་སྲུང་བར་དགོས། ང་ནི་ཡ་ཧོ་ཝཱ་ཁྱེད་ཀྱི་དཀོན་མཆོག་ཡིན་ནོ། ༤ ལྷ་རྣམས་ཀྱི་ཕྱོགས་སུ་མ་ལོག་དང་། བླུགས་སྐུ་རྣམས་ཁྱེད་ཀྱི་ཕྱིར་མ་བཟོས་ཤིག ང་ནི་ཡ་ཧོ་ཝཱ་ཁྱེད་ཀྱི་དཀོན་མཆོག་ཡིན་ནོ། ༥ ཡང་ཡ་ཧོ་ཝཱ་ལ་བདེ་བའི་མཆོད་པ་ཞིག་འབུལ་ན། ཁྱེད་ལ་མཉེས་པའི་ཕྱིར་འབུལ་བར་དགོས་སོ། ༦ མཆོད་པར་ཕུལ་བའི་ཉིན་དེ་རང་དང་དེའི་སང་ཉིན་ལ་ཟ་བར་དགོས་ཀྱི། ཞག་གསུམ་པའི་བར་དུ་ལུས་པ་ནི་མེས་སྲེག་པར་བྱའོ། ༧ ཅི་སྟེ་ཞག་གསུམ་པར་ཟ་ན། མི་གཙང་བ་ཡིན་པས་ཐུགས་སུ་མི་འབབ། ༨ ཟ་བའི་མི་ལ་ཉེས་ལན་ཕོག་འོས་ཏེ། ཡ་ཧོ་ཝཱའི་ཕྱིར་རྫས་དམ་པ་ཞིག་མི་གཙང་བར་བྱས་པས་དེའི་སེམས་ནི་རང་གི་མི་སྡེ་ལས་རྩད་ནས་གཅོད་པར་དགོས་སོ༎