ཡང་ཡ་ཧོ་ཝཱས་མོ་ཤེ་ལ་འདི་གསུངས་པ། ༢ ཨ་རོན་དང་། དེའི་བུ་རྣམས་དང་། ཨིས་ར་ཨེལ་གྱི་བུ་རྣམས་ལ་འདི་སྐད་ཅེས་སྨྲོས་ཤིག ཡ་ཧོ་ཝཱས་བཀའ་གནང་བ་འདི་ལྟ་སྟེ། ༣ ཨིས་ར་ཨེལ་གྱི་ཁྱིམ་ནས་མི་སུས་ཀྱང་གླང་ངམ། ལུག་གམ། ར་མ་སྒར་གྱི་ནང་ན་བསད་པའམ། སྒར་གྱི་ཕྱི་རོལ་ན་བསད་པ། ༤ གལ་ཏེ་ཡ་ཧོ་ཝཱའི་བཞུགས་གནས་ཀྱི་མདུན་དུ་ཡ་ཧོ་ཝཱ་ལ་མཆོད་པར་འབུལ་བའི་ཕྱིར་འདུན་མའི་གུར་མཆོག་གི་སྒོའི་འགྲམ་དུ་མི་འབུལ་ན། ཁྲག་དེ་ནི་མི་དེ་ལ་ཉེས་པ་ལྟར་རྩི་བར་དགོས་ཤིང་། ཁྲག་ཕོས་པས་མི་དེ་ནི་རང་གི་མི་སྡེའི་དཀྱིལ་ནས་རྩད་ནས་གཅོད་པར་དགོས་སོ། ༥ ཅི་ལ་ཞེ་ན། ཨིས་ར་ཨེལ་གྱི་བུ་རྣམས་ཀྱིས་ཐང་ན་མཆོད་པ་འབུལ་བ་དང་གསོད་པའི་དུད་འགྲོ་རྣམས་ཡ་ཧོ་ཝཱའི་དྲུང་དུ་འདུན་མའི་གུར་མཆོག་གི་འགྲམ་དུ་བླ་མ་ལ་འཁྱེར་འོང་བ་དང་། ཡ་ཧོ་ཝཱ་ལ་བདེ་བའི་མཆོད་པ་རྣམས་འབུལ་བའི་ཕྱིར་རོ། ༦ ཡང་བླ་མས་ཁྲག་ནི་འདུན་མའི་གུར་མཆོག་གི་སྒོའི་འགྲམ་ན་ཡོད་པའི་ཡ་ཧོ་ཝཱའི་མཆོད་ཁྲི་ལ་གཡོག་པ་དང་། ཚིལ་ནི་ཡ་ཧོ་ཝཱའི་ཕྱིར་དྲི་ཞིམ་དུ་སྦར་བར་དགོས་སོ། ༧ ཡང་ཕྱིན་ཆད་དུ་ར་ཐུག་རྣམས་ལ་རྟེན་ཞིང་གཡེམ་པོ་ཡིན་པས་དེ་དག་ལ་མཆོད་པར་འབུལ་བའི་ཕྱིར་དུད་འགྲོ་རྣམས་གསོད་པར་མི་བྱའོ། དེ་ནི་དེ་དག་དང་རྗེས་སུ་འབྱུང་བའི་བུ་བརྒྱུད་ཀྱི་ཕྱིར་དུས་རྟག་ཏུ་ཚུལ་ཁྲིམས་ཡིན་ནོ༎