ཡང་ཡ་ཧོ་ཝཱས་མོ་ཤེ་དང་ཨ་རོན་ལ་འདི་སྐད་དུ། ༢ མི་ཞིག་གི་ལུས་ཀྱི་པགས་པ་ལ་སྐྲང་འབུར་རམ་ཤུ་བའམ་ཐིག་ལེ་ལྷག་ལྷག་བྱུང་ནས་མི་དེའི་ལུས་ཀྱི་པགས་པ་རུ་མཛེ་གཉན་གྱི་རྟགས་སུ་འགྱུར་ན། བླ་མ་ཨ་རོན་ཡང་ན་དེའི་བུ་བླ་མ་བྱེད་པ་རྣམས་ཀྱི་དྲུང་དུ་འཁྲིད་དགོས་སོ། ༣ ཡང་བླ་མས་ལུས་ཀྱི་པགས་པ་ལ་ཡོད་པའི་རྟགས་ལ་བལྟས་ནས་རྟགས་ལ་ཡོད་པའི་བ་སྤུ་རྣམས་དཀར་པོར་འགྱུར་ཞིང་ལུས་ཀྱི་པགས་པ་ལས་རྟགས་དེ་དམའ་བར་འགྱུར་བར་མཐོང་ན། མཛེ་གཉན་གྱི་རྟགས་ཡིན་པས། བླ་མས་དེ་ལ་བལྟས་ནས་མི་དེ་མི་གཙང་བ་ཡིན་ཞེས་སྒྲོག་པར་དགོས། ༤ ཡང་གལ་ཏེ་ལུས་ཀྱི་པགས་པ་ལ་ཐིག་ལེ་དཀར་པོ་ཞིག་ཡོད་ཅིང་པགས་པ་ལས་དམའ་བར་མ་མཐོང་བ་དང་། བ་སྤུ་རྣམས་ཀྱང་དཀར་པོར་གྱུར་པ་མ་ཡིན་ན། རྟགས་དང་ལྡན་པའི་མི་དེ་བླ་མས་ཞག་བདུན་གྱི་བར་དུ་དགར་བར་དགོས། ༥ ཡང་ཞག་བདུན་པ་ལ་བླ་མས་དེ་ལ་བལྟས་ནས་རྟགས་ཀྱི་གཟུགས་མ་གྱུར་བར་སྔར་ལྟར་གནས་ཤིང་པགས་པ་རུ་རྟགས་མ་འཕེལ་བར་མཐོང་ན། བླ་མས་མི་དེ་ཡང་ཞག་བདུན་གྱི་བར་དུ་དགར་བར་དགོས། ༦ ཡང་ཞག་བདུན་པར་བླ་མས་དེ་ལ་སླར་ཡང་བལྟས་ནས་རྟགས་སྐྱ་བོར་གྱུར་ཞིང་པགས་པ་རུ་རྟགས་མ་འཕེལ་བར་མཐོང་ན། བླ་མས་མི་དེ་གཙང་མ་ཡིན་ཞེས་སྒྲོག་པར་དགོས། ཅི་ལ་ཟེར་ན། ཤུ་བ་ཡིན་པའི་ཕྱིར་རོ། མི་དེས་གོས་རྣམས་ཁྲུས་ནས་གཙང་བ་ཡིན་ནོ། ༧ འོན་ཀྱང་བླ་མས་དེ་ལ་བལྟས་པས་གཙང་བ་ཡིན་ཟེར་ནས་ཀྱང་དེའི་འོག་ཏུ་པགས་པ་ལ་འཕེལ་ན་སླར་ཡང་བླ་མས་མི་དེ་ལ་ལྟ་དགོས། ༨ ཡང་བླ་མས་དེ་ལ་བལྟས་ནས་པགས་པའི་ཤུ་བ་འཕེལ་བར་མཐོང་ན་མཛེ་ནད་ཡིན་པས་བླ་མས་མི་དེ་ནི་མི་གཙང་བ་ཡིན་ཞེས་སྒྲོག་པར་དགོས།