ཡང་ཞག་བརྒྱད་པ་ལ་མོ་ཤེས་ཨ་རོན་བུ་རྣམས་དང་ཨིས་ར་ཨེལ་གྱི་རྒན་པོ་རྣམས་དང་བཅས་པ་བོས་ནས། ༢ ཨ་རོན་ལ་འདི་སྐད་དུ། ཁྱོད་ཀྱི་དོན་དུ་སྡིག་བཤགས་བྱེད་པའི་ཕྱིར་བེའུ་ཕོ་སྐྱོན་མེད་པ་ཞིག་དང་། སྦྱིན་སྲེག་གི་ཕྱིར་ལུག་ཐུག་སྐྱོན་མེད་པ་ཞིག་བློངས་ལ། ཡ་ཧོ་ཝཱའི་ཞལ་ངོར་མཆོད་པར་ཕུལ་ཞིག ༣ ཡང་ཨིས་ར་ཨེལ་གྱི་བུ་རྣམས་ལ་འདི་སྐད་ཅེས་སྨྲོས་ཤིག ར་ཐུག་ཅིག་སྡིག་པའི་ཕྱིར་མཆོད་པར་འབུལ་བ་དང་། བེའུ་དང་ལུག་གཉིས་ལོ་གཅིག་པ་སྐྱོན་མེད་པ་སྦྱིན་སྲེག་གི་དོན་དུ་བློངས་ལ། ༤ ཡ་ཧོ་ཝཱའི་ཞབས་དྲུང་དུ་ཞི་བདེའི་མཆོད་པ་འབུལ་དུ་གླང་ཐུག་དང་ལུག་ཐུག་དང་མར་ཁུས་འདྲེས་པའི་ཞལ་ཟས་ཁྱེར་ཤོག དེ་ཅིའི་ཕྱིར་ཞེ་ན། དེ་རིང་ཡ་ཧོ་ཝཱ་ཁྱོད་རྣམས་ཀྱིས་མཐོང་བར་འགྱུར་བའི་ཕྱིར་རོ་ཞེས་གསུངས་པས། ༥ མོ་ཤེས་ཅི་དང་ཅི་གསུངས་པ་འདུན་མའི་གུར་མཆོག་གི་སྒོའི་འགྲམ་དུ་ཁྱེར་འོངས་པ་དང་། མི་ཚོགས་ཐམས་ཅད་ཉེ་བར་འོངས་ནས་ཡ་ཧོ་ཝཱའི་ཞལ་ངོར་བྱུང་ངོ་། ༦ ཡང་མོ་ཤེས་ནི་ཡ་ཧོ་ཝཱས་དེ་ལྟར་བྱོས་ཤིག་ཅེས་བཀའ་སྩལ་པ་བཞིན་དུ་ཁྱོད་ཅག་གིས་བྱེད་ན། ཡ་ཧོ་ཝཱའི་ལྷན་ནེ་བ་ཁྱོད་རྣམས་ཀྱིས་མཐོང་བར་འགྱུར་ཡོང་ཞེས་སྨྲས་སོ། ༧ ཡང་མོ་ཤེས་ཨ་རོན་ལ། ད་མཆོད་ཁྲིའི་མདུན་དུ་ཚུར་ཤོག་དང་། ཁྱོད་ཀྱི་དོན་དུ་སྡིག་པའི་ཕྱིར་མཆོད་པ་དང་སྦྱིན་སྲེག་ཕུལ་ཞིག ཡ་ཧོ་ཝཱས་བཀའ་གནང་བ་བཞིན་དུ་ཁྱོད་རང་དང་མི་སྡེའི་ཕྱིར་སྡིག་བཤགས་བྱོས་ལ། མི་སྡེའི་ཕྱིར་མཆོད་པ་འབུལ་ཞིང་སྡིག་བཤགས་བྱོས་ཤིག་ཅེས་སྨྲས་སོ༎