ཡང་ཡ་ཧོ་ཝཱས་མོ་ཤེ་ལ་གསུངས་པ། ༢ མི་ཞིག་གིས་སྡིག་པ་བྱེད་ཅིང་ཡ་ཧོ་ཝཱའི་དྲུང་དུ་ཉེས་པ་བྱས་ཏེ། མི་གཞན་མའི་བཅོལ་མའམ་ཕར་བཏང་ཚུར་ལེན་ནམ། འཕྲོག་བཅོམ་མམ། མི་གཞན་མ་ནས་གཡོ་སྒྱུའི་ཐབས་ཀྱིས་ཁྱེར་བའི་རྫས་གང་ཡིན་པ་མ་བརྙེད་ཅེས་རྫུན་དུ་སྨྲ་བའམ། ༣ རྫས་སྟོར་བ་ཞིག་བརྙེད་ནས་མ་བརྙེད་ཅེས་རྫུན་དུ་སྨྲ་བའམ་མིས་བྱས་པའི་ལས་གང་ལ་ཡང་རྟེན་ཏེ་རྫུན་གྱི་མནའ་བསྐྱེལ་ཞིང་སྡིག་པ་བྱས་ནས། ༤ གལ་ཏེ་དེ་ལྟ་བུའི་ཉེས་པས་ནོངས་པ་ཞིག་བྱས་ན། འཕྲོག་པར་ཁྱེར་བའམ་གཡོ་སྒྱུའི་ཐབས་ཀྱིས་ཁྱེར་བའམ་བཅོལ་མ་བརྙེད་པའམ་སྟོར་ནས་བརྙེད་པའི་རྫས་ཕྱིར་གཏོང་བའམ། ༥ གང་གི་རྫས་ལ་རྟེན་པའི་རྫུན་གྱི་མནའ་བསྐྱལ་བ་ཁོས་དེའི་རིན་འཇལ་བ་དང་། ལྔ་ཆ་གཅིག་སྣོན་ཞིང་བསྟེར་བར་དགོས། ནོངས་པའི་ཕྱིར་མཆོད་པ་འབུལ་བའི་ཉིན་མོར་རྫས་ཀྱི་བདག་པོ་ལ་འཇལ་བར་དགོས་སོ། ༦ ཡང་ནོངས་པའི་ཕྱིར་ཡ་ཧོ་ཝཱ་ལ་མཆོད་པར་འབུལ་བ་འདི་ལྟ་སྟེ། ལུག་རྣམས་ལས་ལུག་ཐུག་སྐྱོན་མེད་པ་ཞིག་ཁྱོད་ཀྱི་རིན་བཅད་པ་བཞིན་དུ་ནོངས་པའི་ཕྱིར་འབུལ་བྱའི་མཆོད་པ་རུ་བླ་མའི་མདུན་དུ་འཁྱེར་བ་དང་། ༧ བླ་མས་མི་དེའི་ཕྱིར་ཡ་ཧོ་ཝཱའི་དྲུང་དུ་སྡིག་བཤགས་བྱེད་པར་དགོས། དེ་ལྟར་མི་དེས་ནོངས་པ་གང་ཡང་བྱས་པའི་ཕྱིར་སྡིག་སེལ་ཐོབ་པར་འགྱུར་རོ་ཞེས་བཀའ་གནང་ངོ་༎