ཡང་ཡ་ཧོ་ཝཱས་མོ་ཤེ་ལ་འདི་སྐད་དུ། ཨིས་ར་ཨེལ་གྱི་བུ་རྣམས་ལ་འདི་སྐད་ཅེས་སྨྲོས་ཤིག ༢ གལ་ཏེ་ཡ་ཧོ་ཝཱས་མ་བྱེད་ཅིག་ཅེས་བཀའ་གནང་བ་རྣམས་ཀྱི་ནང་ནས་སུ་ཞིག་གིས་མ་ཤེས་པར་དེ་དག་ལས་གཅིག་དང་འགལ་ཞིང་སྡིག་པ་བྱེད་ན། ༣ བྱུགས་པས་བྱུགས་པའི་བླ་མས་སྡིག་པ་བྱས་ཏེ་མི་སྡེའི་ཐོག་ཏུ་ཉེས་པ་འདྲེན་ཡོང་ན། དེས་རང་གིས་བྱས་པའི་སྡིག་པའི་དོན་དུ་གླང་ཐུག་སྐྱོན་མེད་པ་ཞིག་ཡ་ཧོ་ཝཱ་ལ་སྡིག་པའི་ཕྱིར་མཆོད་པར་འབུལ་བར་དགོས་སོ། ༤ ཡང་གླང་ཐུག་དེ་འདུན་མའི་གུར་མཆོག་གི་སྒོའི་འགྲམ་དུ་ཡ་ཧོ་ཝཱའི་དྲུང་དུ་འཁྲིད་པ་དང་། གླང་ཐུག་གི་མགོ་ལ་རང་གི་ལག་པ་བཞག་ནས་ཡ་ཧོ་ཝཱའི་ཞལ་ངོར་གླང་ཐུག་དེ་གསོད་པར་བྱ། ༥ ཡང་བྱུགས་ཀྱིས་བྱུགས་པའི་བླ་མས་གླང་ཐུག་གི་ཁྲག་ནས་བླངས་ནས་འདུན་མའི་གུར་མཆོག་གི་ནང་དུ་འཁྱེར་འོང་བ་དང་། ༦ བླ་མས་རང་གི་མཛུབ་མོ་ཁྲག་གི་ནང་དུ་བཅུག་ནས་ལན་བདུན་ཡ་ཧོ་ཝཱའི་ཞལ་ངོར་དམ་པའི་སྒོ་ཡོལ་གྱི་མདུན་དུ་འགྲེམ་པར་བྱ། ༧ ཡང་བླ་མས་འདུན་མའི་གུར་མཆོག་གི་ནང་ན་ཡོད་པའི་བདུག་སྤོས་དྲི་ཞིམ་བདུག་པའི་མཆོད་ཁྲིའི་རུ་བ་རྣམས་ལ་ཡ་ཧོ་ཝཱའི་དྲུང་དུ་ཁྲག་དེ་ལས་གཡོག་པ་དང་། གླང་ཐུག་གི་ཁྲག་ཐམས་ཅད་འདུན་མའི་གུར་མཆོག་གི་སྒོའི་ཕྱི་རོལ་ན་ཡོད་པའི་སྦྱིན་སྲེག་གི་མཆོད་ཁྲིའི་འགྲམ་དུ་བླུག་པར་དགོས་སོ། ༨ ཡང་སྡིག་པའི་ཕྱིར་ཕུལ་བའི་གླང་ཐུག་གི་ཚིལ་ཐམས་ཅད་ནི་ནང་ཆ་འགེབས་པའི་ཚིལ་དང་རྒྱུ་མའི་ཚིལ་ཐམས་ཅད་དང་། ༩ མཁལ་མ་གཉིས་དེ་དག་གི་ཚིལ་རྐེད་པ་ལ་ཡོད་པ་དང་བཅས་པ་དང་། མཆིན་ཡོལ་དེ་མཁལ་མ་གཉིས་ཀྱི་བར་དུ་བཅད་ནས། ༡༠ ཇི་ལྟར་ཞི་བདེའི་མཆོད་པར་ཕུལ་པའི་གླང་ཐུག་ནས་བླངས་པ་བཞིན་དུ་གླང་ཐུག་འདི་ནས་ཀྱང་བླངས་ནས་བླ་མས་སྦྱིན་སྲེག་གི་མཆོད་ཁྲིའི་ཁར་སྦར་བར་དགོས་སོ། ༡༡ ཡང་གླང་ཐུག་གི་པགས་པ་དང་ཤ་ཐམས་ཅད་མགོ་དང་རྐང་ལག་དང་ལྕི་བ་བཅས་པ། ༡༢ གླང་ཐུག་ཧྲིལ་པོ་ཚོགས་རའི་ཕྱི་རོལ་ཏུ་ས་གནས་མི་གཙང་བ་མེད་པ་ཞིག་ཏུ་འཁྱེར་བར་དགོས། ཐལ་བ་བླུག་པའི་ས་གནས་དེར་ཤིང་གི་སྟེང་དུ་མེས་སྲེག་ཐལ་བླུག་ས་ནས་སྲེག་པར་བྱའོ༎