༡༤
ཡང་ངས་བལྟས་པ་དང་། རི་བོ་ཙི་ཨོན་གྱི་སྟེང་ན་ལུག་གུ་ནི་དཔྲལ་བ་ལ་ཉིད་ཀྱི་ཡབ་ཀྱི་མཚན་བྲིས་ཡོད་པའི་སྐྱེས་བུ་ཆིག་འབུམ་བཞི་ཁྲི་བཞི་སྟོང་བཅས་བཞུགས་ཡོད་པ་མཐོང་། ༢ ནམ་མཁའ་ནས་ཆུ་ཆེན་དང་འབྲུག་ཆེན་ལྡིར་བ་ལྟ་བུའི་སྒྲ་ཐོས་སོ། ཡང་ངས་གསུང་སྐད་དེ་པི་ཝང་གཏོང་བ་ལྟར་ཐོས་ཏེ། ༣ གཏོང་བ་དེ་རྣམས་ཀྱིས་རྒྱལ་ཁྲི་དང་སེམས་ཅན་བཞི་པོ་དང་རྒན་པོ་རྣམས་ཀྱི་དྲུང་དུ་མགུར་མ་གསར་པ་བླངས་སོ། ས་གཞི་ལས་རིན་གྱིས་བླུས་པའི་སྐྱེས་བུ་ཆིག་འབུམ་བཞི་ཁྲི་བཞི་སྟོང་གིས་མ་གཏོགས་པར་གཞན་སུས་ཀྱང་མགུར་མ་དེ་ཤེས་མ་ཐུབ་བོ། ༤ དེ་རྣམས་ནི་བུད་མེད་དང་མ་འགྲོགས་པའི་གཞོན་ནུ་གཙང་མ་ཡིན་ཏེ། ལུག་གུ་གར་ཕེབས་སར་ཞབས་རྗེས་སུ་འབྲངས་པ་རྣམས་ཡིན། དེ་རྣམས་ནི་དཀོན་མཆོག་དང་ལུག་གུའི་དོན་དུ་མིའི་ནང་ནས་ཐོག་ཕུད་དུ་འགྱུར་བའི་ཕྱིར་རིན་གྱིས་བླུས་པ་རྣམས་ཡིན། ༥ དེ་རྣམས་སྐྱོན་མེད་ཡིན་ཅིང་ཁ་ནས་རྫུན་མ་ཐོན་ནོ༎༦ ཡང་ངས་བར་སྣང་དུ་ཕོ་ཉ་གཞན་ཞིག་འཕུར་ཞིང་། ས་གཞིར་གནས་པ་རྣམས་དང་མི་སྡེ་དང་མི་རིགས་དང་སྐད་རིགས་དང་མི་བརྒྱུད་ཐམས་ཅད་ལ་སྒྲོག་ཕྱིར་མཐའ་མེད་པའི་ཕྲིན་བཟང་ཡོད་དེ། ༧ དེས་དཀོན་མཆོག་གི་ཞལ་ཆེའི་དུས་ལ་བབས་པས། ཁོང་ལ་འཇིགས་ཤིང་བསྟོད་ཅིག གནམ་ས་དང་རྒྱ་མཚོ་དང་ཆུ་མིག་མཛད་མཁན་ལ་བསྙེན་བཀུར་བྱོས་ཤིག་ཅེས་གསུང་བ་མཐོང་བྱུང་།
༨ དེའི་རྗེས་སུ་ཕོ་ཉ་གཉིས་པ་ཞིག་འཕུར་ཞིང་། མི་རིགས་ཐམས་ཅད་ལ་ཁོ་རང་གི་མི་གཙང་བའི་འདོད་ཆགས་ཀྱི་རྒུན་ཆང་འཐུང་དུ་འཇུག་པའི་བ་བི་ལོན་ཆེན་མོ་དེ་ལྷུང་ངོ་། རབ་ཏུ་ལྷུང་ངོ་ཞེས་གསུངས་སོ༎
༩ དེ་ནས་ཕོ་ཉ་གསུམ་པ་ཞིག་འཕུར་ཞིང་། གསུང་སྐད་ཆེན་པོས། སུ་ཞིག་གིས་གཅན་གཟན་དེ་དང་དེའི་འདྲ་སྐུ་ལ་བསྙེན་བཀུར་བྱེད་ཅིང་། དཔྲལ་བའམ་ལག་པ་ལ་རྟགས་རྒྱབ་འཇུག་ན། ༡༠ དཀོན་མཆོག་གི་ཐུགས་ཁྲོའི་མཆོད་ཞལ་གྱི་ནང་དུ་ཐུགས་ཁྲོའི་རྒུན་ཆང་མ་བསླད་པ་འཐུང་བར་འགྱུར་ཞིང་། ཕོ་ཉ་དམ་པ་རྣམས་དང་ལུག་གུའི་ཞལ་ངོར་མེ་དང་མུ་ཟིས་མནར་བར་འགྱུར་ཞེས་གསུངས་སོ། ༡༡ དེ་རྣམས་སྲེག་པའི་དུད་པ་དུས་རྒྱུན་དུ་འཐུལ་ཞིང་། གཅན་གཟན་དེ་དང་དེའི་འདྲ་སྐུ་ལ་བསྙེན་བཀུར་བྱེད་མཁན་དེའི་མིང་རྟགས་ལེན་མཁན་རྣམས་ཉིན་མཚན་མེད་པར་སྡུག་བསྔལ་ལོ། ༡༢ དཀོན་མཆོག་གི་བཀའ་སྲུང་ཞིང་ཡེ་ཤུ་ལ་དད་པ་བྱེད་པ་འདི་ནི་དམ་པ་རྣམས་ལ་བཟོད་པའི་སྐུལ་མའོ༎
༡༣ ཡང་ནམ་མཁའ་ལ་ང་ལ་སྒྲ་ཞིག་གིས་གསུངས་པ། ཕྱིན་ཆད་གཙོ་བོ་ལ་དད་ཅིང་འགྲོངས་པ་རྣམས་བདེའོ། ཐུགས་ཉིད་ཀྱིས། དེ་ཚོའི་ལས་རྣམས་དེ་ཚོར་འབྲང་བས། དེ་རྣམས་དཀའ་ལས་ལས་ངལ་གསོ་ཐོབ་པར་འགྱུར་རོ་གསུང་བ་བྲིས་ཤིག
༡༤ ཡང་ངས་བལྟས་པ་ལས། སྤྲིན་དཀར་པོ་ཞིག་དང་། དེའི་ཁར་དབུ་ལ་གསེར་གྱི་གཙུག་རྒྱན་དང་ཕྱག་ཏུ་ཟོར་བ་རྣོན་པོ་བསྣམས་པའི་མིའི་བུ་ལྟ་བུ་ཞིག་མཇལ་བྱུང་། ༡༥ མཆོད་ཁང་གི་ནང་ནས་ཕོ་ཉ་གཞན་ཞིག་ཐོན་ཏེ། སྤྲིན་གྱི་སྟེང་དུ་བཞུགས་པ་ལ། ས་གཞིའི་སྟོན་ཐོག་རབ་ཏུ་སྨིན་ཞིང་། རྔ་བའི་དུས་རན་པས། ཟོར་བ་རྒྱབ་ཅིང་རྔ་བར་མཛོད་ཅིག་ཅེས་འབོད་བསྒྲགས་པ་དང་། ༡༦ སྤྲིན་གྱི་སྟེང་ན་བཞུགས་པ་དེས་ས་གཞི་ལ་ཟོར་བ་བརྒྱབས་ནས་བརྔས་སོ༎
༡༧ དེ་ནས་ནམ་མཁའི་མཆོད་ཁང་ནས་ཟོར་བ་རྣོན་པོ་ཡོད་པའི་ཕོ་ཉ་གཞན་ཞིག་འཐོན་བྱུང་། ༡༨ དེ་ནས་མཆོད་ཁྲི་ལས་མེ་ལ་དབང་ཡོད་པའི་ཕོ་ཉ་གཞན་ཞིག་འཐོན་ནས། ཟོར་བ་རྣོན་པོ་ཡོད་པ་ལ་སའི་རྒུན་འབྲུམ་རབ་ཏུ་སྨིན་པས། ཟོར་བ་རྣོན་པོ་དེ་ས་གཞི་ལ་བརྒྱབས་ནས་རྒུན་ཆང་རྣམས་སྡུས་ཤིག་ཅེས་འབོད་བསྒྲགས་པས། ༡༩ ཕོ་ཉ་དེས་ས་གཞི་རུ་ཟོར་བ་བརྒྱབས་ནས་རྒུན་ཤིང་གི་ཤིང་ཏོག་བསྡུས་ནས། དཀོན་མཆོག་གི་ཐུགས་ཁྲོའི་འཆག་གཞོང་ཆེན་པོའི་ནང་དུ་བླུགས་སོ། ༢༠ གྲོང་ཁྱེར་གྱི་ཕྱི་རོལ་དུ་འཆག་གཞོང་དེ་ནང་རྒུན་འབྲུམ་བཙིར་ནས། རྒྱང་གྲགས་ཆིག་སྟོང་དྲུག་བརྒྱར་རྟའི་སྲབ་ལ་ཐུག་པའི་ཁྲག་འཐོན་བྱུང་ངོ་༎