༣ གཅེས་པ་རྣམས། ང་ཚོ་ཡོངས་ཀྱི་ཐར་ལམ་གྱི་སྐོར་ལ་འབྲི་བར་ཤིན་དུ་སྤྲོ་བས། མཱ་ཤི་ཀ་པ་རྣམས་ལ་ཐེངས་གཅིག་ཏུ་གཏད་པའི་དད་པའི་ཕྱིར་ཁྱེད་ཚོས་འབད་རྩོལ་བྱེད་དུ་ཞུ་ཞིང་འབྲི་བ་ཁག་ཆེར་མཐོང་ངོ་། ༤ སྔར་ལུང་བསྟན་པ་བཞིན་ཆད་པས་གཅོད་རྒྱུ་ཡིན་པའི་ཆོས་མེད་ཁ་ཅིག་ཁྱེད་ཚོའི་དཀྱིལ་དུ་གསང་ནས་ཞུགས་ཏེ། ང་ཚོའི་དཀོན་མཆོག་གི་ཐུགས་རྗེ་དེ་འདོད་ཆགས་སུ་སྒྱུར་ཞིང་། ང་ཚོའི་བདག་པོ་དང་གཙོ་བོ་གཅིག་པོ་ཡེ་ཤུ་མཱ་ཤི་ཀ་ལ་མི་རྩིའོ༎

༥ ཁྱེད་ཚོས་དེ་ཐམས་ཅད་ཐེངས་གཅིག་ཏུ་རྟོགས་པ་ཡིན་ཀྱང་། ངས་འདི་དྲན་སྐུལ་བྱེད་པར་འདོད་དོ། གཙོ་བོས་མི་སེར་ཡུལ་ནས་མི་སྡེ་དེ་བསྒྲལ་བའི་འོག་ཏུ་དད་མེད་རྣམས་ཚར་བཅད་དོ། ༦ རང་གི་གོ་ས་མ་སྲུང་བར་འོས་པའི་གནས་སྤངས་པའི་ཕོ་ཉ་རྣམས་ཞལ་ཆེའི་ཉིན་མོ་ཆེན་པོའི་བར་དུ་རྟག་པའི་ལྕགས་སྒྲོག་གིས་བཅིངས་ཏེ་མུན་ནག་གི་ནང་དུ་བཞག་པར་མཛད་དོ། ༧ སོ་དོམ་དང་གོ་མོ་རཱ་དང་མཐའ་འཁོར་གྱི་གྲོང་ཁྱེར་རྣམས་དེ་བཞིན་དུ་ལོག་གཡེམ་དང་གཤིས་མིན་གྱི་འདོད་ཆགས་ནང་ལྷུང་ནས། མི་འཆི་བའི་མེའི་ཆད་པས་མནར་བའི་དཔེ་རུ་གྱུར་པ་བཞིན་ནོ༎

༨ དེ་ལྟར་མི་དེ་རྣམས་ཀྱིས་རང་གི་རྨོངས་པས་ལུས་མི་གཙང་བར་བྱེད། དབང་ལ་བརྙས་ཤིང་། གོ་འཕང་དང་ལྡན་པ་རྣམས་ལ་སྨད་དོ། ༩ ཕོ་ཉ་མཆོག་མི་ཀ་ཨེལ་གྱིས་མོ་ཤེའི་སྤུར་གྱི་ཕྱིར་བདུད་དང་རྩོད་པའི་ཚེ། ཁོ་ལ་སྨོད་པར་མ་སྤོབས་པར། ཁྱོད་ལ་གཙོ་བོའི་བཀའ་བཀྱོན་འབྱུང་བར་ཤོག་ཅིག་ཅེས་སྨྲས་སོ། ༡༠ འོན་ཀྱང་དེ་རྣམས་ཀྱིས་མི་ཤེས་པ་ལའང་སྨད་དོ། བློ་གྲོས་མེད་པའི་དུད་འགྲོ་ལྟར་རང་བཞིན་གྱི་ཤེས་པའི་འདུ་ཤེས་ཀྱི་རྐྱེན་གྱིས་རང་འཕུང་ངོ་། ༡༡ དེ་རྣམས་ཀྱེ་མ་ཧུད། དེ་རྣམས་ཀ་ཡིན་གྱི་རྗེས་སུ་འབྲང་། གླའི་ཕྱིར་བ་ལ་ཨམ་ལྟར་གོལ་སར་མཆོང་ངོ་། ཀོ་རཱ་ལྟར་ངོ་ལོག་གིས་མེད་པར་འགྱུར་རོ། ༡༢ ཁྱེད་ཚོའི་བྱམས་པའི་མགྲོན་ནང་ཁྱེད་ཚོ་མཉམ་དུ་ཟ་དུས་སུ། དེ་རྣམས་ཆུའི་ནང་གི་ཕ་བོང་མི་མཐོང་བ་དང་འདྲ་སྟེ། འཛེམ་བག་མེད་པར་རང་འབྲང་བ་བྱེད་ཅིང་། རླུང་གིས་འཁྱེར་བའི་ཆུ་མེད་པའི་སྤྲིན་དང་། ཤིང་ཏོག་མེད་པའི་སྟོན་འཇུག་གི་རྩི་ཤིང་རྩ་བ་ནས་བཏོན་པ་ཇི་ལྟར་བལྟས་ཀྱང་བསྐམས་ཤིང་ཤི་བ་དང་འདྲ། ༡༣ རང་གི་ངོ་ཚའི་ལྦུ་བ་ཕྱུང་བའི་རྒྱ་མཚོའི་རྦ་རླབས་དང་འདྲ། གང་གི་ཕྱིར་རྟག་ཏུ་མུན་ནག་ནང་ཡོད་པའི་སྐར་ཡན་དང་འདྲ།

༡༤-༡༥ ཨ་དམ་ནས་མི་རབས་བདུན་པའི་ཧེ་ནོག་གིས་ཀྱང་དེ་རྣམས་ཀྱི་སྐོར་ལ། ལྟོས་ཤིག ཐམས་ཅད་ཀྱི་ཞལ་ཆེ་གཅོད་པ་དང་། ཆོས་མེད་རྣམས་ཀྱིས་བྱས་པའི་ཆོས་མེད་པའི་ལས་ཐམས་ཅད་དང་། ཆོས་མེད་ཀྱི་སྡིག་ཅན་རྣམས་ཀྱིས་ཁོང་ལ་ཞུས་པའི་རྒོལ་ཚིག་ཐམས་ཅད་ཀྱི་ཕྱིར་བཀའ་ཆད་གནང་དུ། གཙོ་བོ་ནི་ཉིད་ཀྱི་དམ་པ་ཁྲི་ཁྲག་མང་པོ་དང་བཅས་སུ་བྱོན་ཏོ་ཞེས་ལུང་བསྟན་ཏོ། ༡༦ དེ་རྣམས་ནི་འབར་མཁན་དང་། མི་ཚིམ་མཁན་དང་། རང་གི་འདོད་པ་བཞིན་སྤྱོད་མཁན་དང་། ཁ་ཕོ་ཆེ་དང་། རང་ལ་ཕན་ཕྱིར་མིའི་ངོ་སོ་བྱེད་མཁན་ནོ༎

༡༧ གཅེས་པ་ཁྱེད་ཚོས་གཙོ་བོ་ཡེ་ཤུ་མཱ་ཤི་ཀའི་སྐུ་ཚབ་རྣམས་ཀྱིས་གསུངས་པ་རྣམས་ཡིད་ལ་བཟུང་ཞིག ༡༨ ཁོང་ཚོས་མཐའ་མའི་དུས་སུ་རང་གི་ཆོས་མིན་གྱི་འདོད་པ་ལ་སྤྱོད་པའི་བདེན་ཆོས་ལ་འཕྱ་མཁན་འབྱུང་བར་འགྱུར་ཞེས་གསུངས་པ་ཡིན་ནོ། ༡༩ དེ་རྣམས་ནི་དབྱེན་པ་བྱེད་མཁན་དང་། འཇིག་རྟེན་པའི་སེམས་དང་ལྡན་ཞིང་། ཐུགས་ཉིད་དང་མི་ལྡན་པ་རྣམས་སོ། ༢༠ གཅེས་པ་ཁྱེད་རྣམས། ཤིན་ཏུ་དད་པ་དམ་པ་སྐྱེད་ཅིག དམ་པའི་ཐུགས་ཉིད་ཀྱི་མཐུས་སྨོན་ལམ་ཐོབ་ཅིག ༢༡ དཀོན་མཆོག་གི་བྱམས་པའི་ནང་རང་སྲུང་ཞིག ཚེ་མཐའ་མེད་པའི་དོན་དུ་ང་ཚོའི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེའི་ཕྱིར་སྒུག་ཅིག ༢༢ ཐེ་ཚོམ་ཡོད་པ་ལ་ཐེ་ཚོམ་ཁྲོལ། ༢༣ མེ་ནང་ཡོད་པ་མེ་ལས་སྐྱོབ། སྙིང་རྗེ་བྱེད་དགོས་པ་ལ་བྱེད་ཅིང་། སྡིག་པས་སྦགས་པའི་གོས་ལའང་འཇིགས་ཤིང་འཛེམ་ཞིག

༢༤ ད་ཁྱེད་ལྟུང་བ་ལས་སྐྱོབ་ཐུབ་པ་དང་། ཁོང་ཉིད་ཀྱི་གཟི་བརྗིད་ཀྱི་སྤྱན་སྔར་སྐྱོན་མེད་པར་དགའ་མགུའི་ནང་དུ་འཇོག་ཐུབ་པའི། ང་ཚོའི་སྐྱབས་མགོན་དཀོན་མཆོག་གཅིག་པོ་ཁོང་ལ། ༢༥ ང་ཚོའི་གཙོ་བོ་ཡེ་ཤུ་མཱ་ཤི་ཀའི་སྒོ་ནས་སྙན་གྲགས་དང་། ཆེ་བ་དང་། དབང་དང་། མངའ་ཐང་། བསྐལ་པ་ཐམས་ཅད་ཀྱི་སྔོན་དང་། ད་ལྟ་དང་། རྒྱུན་ནས་རྒྱུན་དུའོ། ཨ་མེན༎ ༎