དེ་ནས་ང་ལ་དབྱུག་པ་དང་འདྲ་བའི་རིང་ཐུང་འཇལ་བའི་ཤིང་ཞིག་གནང་ནས། ལོངས་ལ་དཀོན་མཆོག་གི་མཆོད་ཁང་དང་། མཆོད་ཁྲི་དང་། དེར་བསྙེན་བཀུར་བྱེད་པ་རྣམས་འཇོལ་ཞིག ༢ མཆོད་ཁང་གི་ཕྱི་རོལ་གྱི་སྡེ་ཡངས་ཕྱི་པ་རྣམས་ལ་གནང་བས། རྒྱལ་ས་དམ་པ་ཟླ་བ་ཞེ་གཉིས་ཀྱི་བར་དུ་དེ་རྣམས་ཀྱི་རྐང་པས་རྫི་བར་འགྱུར་བས། དེ་ཞོག་ལ་མ་འཇལ་ཞིག ༣ ངས་ཉིད་ཀྱི་དཔང་པོ་གཉིས་ལ་རེ་སྣམ་གྱོན་ཞིང་ཉིན་ཞག་ཆིག་སྟོང་ཉིས་བརྒྱ་དྲུག་ཅུ་ལུང་སྟོན་པའི་དབང་གནང་བར་འགྱུར་ཞེས་ང་ལ་གསུངས་བྱུང་། ༤ འདི་གཉིས་པོ་ནི་ས་གཞིའི་གཙོ་བོའི་དྲུང་དུ་འགྲེང་བའི་ཁ་སྐྱུར་པོའི་སྡོང་པོ་གཉིས་དང་ལ་སྟེགས་གཉིས་པོའོ། ༥ དེ་ལ་སུས་གནོད་འཚེ་བྱེད་ན། ཞལ་ནས་མེ་འཐོན་ཏེ་དགྲ་རྣམས་སྲེག་པར་བྱེད་དོ། སུས་ཇི་ལྟར་གནོད་འཚེ་བྱེད་པ་དེ་ལྟར་དེ་འཆི་བར་འགྱུར། ༦ ལུང་བསྟན་པའི་ཞག་རྣམས་ནང་ཆར་པ་མི་འབབ་པའི་ཕྱིར་གནམ་གྱི་སྒོ་གཅོད་པའི་དབང་དང་། ཆུ་ཁྲག་ཏུ་སྒྱུར་བ་དང་། ལན་ཙམ་འདོད་ཀྱང་ས་གཞི་ལ་ནད་ཡམས་སྣ་ཚོགས་གཏོང་བའི་དབང་ཡོད་དོ། ༧ དཔང་པོ་བྱས་ཟིན་པ་དང་། གཏིང་མཐའ་མེད་པའི་དོང་ལས་འཐོན་པའི་སེམས་ཅན་གྱིས་འཐབ་ཅིང་རྒྱལ་ནས་དེ་གཉིས་གསོད་པར་བྱའོ། ༨ གང་དུ་དེ་དག་གཙོ་བོ་རྒྱང་ཤིང་བརྐྱངས་པ། དཔེ་བརྗོད་དུ་སོ་དོམ་དང་མི་སེར་བྱ་བའི་གྲོང་ཁྱེར་ཆེན་པོའི་ལམ་སྲང་དུ་དེ་གཉིས་ཀྱི་སྤུར་ལུས་པར་འགྱུར་རོ། ༩ ཞག་ཕྱེད་དང་བཞིའི་བར་དུ་མི་སྡེ་དང་མི་རིགས་དང་སྐད་རིགས་དང་མི་བརྒྱུད་རྣམས་ཀྱིས་སྤུར་ལ་བལྟ་ཞིང་དུར་དུ་འཇུག་པར་མི་གཏང་ངོ་། ༡༠ ལུང་སྟོན་པ་འདི་གཉིས་ཀྱི་རྐྱེན་གྱིས་འཇིག་རྟེན་པ་རྣམས་མནར་བས། འཇིག་རྟེན་པ་རྣམས་ཁོང་བསད་པས་དགའ་ཞིང་སྐྱིད་ཅིང་ཕན་ཚུན་ལག་རྟགས་སྐུར་བར་འགྱུར་རོ། ༡༡ ཞག་ཕྱེད་དང་བཞིའི་འོག་ཏུ། དཀོན་མཆོག་ལས་དབུགས་འབྱུང་སྟེ་དེ་གཉིས་ཀྱི་ནང་དུ་ཞུགས་ནས། རྐང་པ་བཙུགས་ནས་ལངས་པ་དང་། དེ་མཐོང་བ་རྣམས་འཇིགས་སྐྲགས་པ་ངས་མཐོང་སྟེ། ༡༢ ནམ་མཁའ་ནས་སྒྲ་ཞིག་གིས་སྟེང་དུ་ཤོག་ཅིག་ཅེས་འབོད་བསྒྲག་པ་ཐོས་ནས། དགྲ་བོ་རྣམས་ཀྱི་མཐོང་སར་སྤྲིན་གྱི་ནང་ལ་ནམ་མཁར་འཕགས་སོ། ༡༣ དེའི་ཚེ་ས་གཡོ་བ་ཆེན་པོ་ཞིག་བྱུང་ནས། གྲོང་ཁྱེར་དེའི་བཅུ་ཆ་གཅིག་བརྡིབས་སོ། ས་གཡོ་དེས་མི་སྟོང་ཕྲག་བདུན་བསད་པ་དང་། ལྷག་མ་རྣམས་ཀྱིས་འཇིགས་ནས་ནམ་མཁའི་དཀོན་མཆོག་ལ་ཕྱག་བཙལ་ཏོ༎